Ioane 6:17-30

¹⁷Waga esau eai se gerusae, gabogabo se tataawasi se lau Kaperenauma tehana eai. I masigirigudui, Iesu sora nige i laoma aridi eai.

¹⁸Mana lailai abo ie toa, arinai gabogabo i wowori.

¹⁹Isi abo se eare e, doha maila haiona e hasi abotai abo Iesu se ita, gabogabo potana eai i laulau: i hanahanauidi abo se matausi.

²⁰Ie ribalau isi aridi eai i ene, “Eau ede, tabu au matausi.”

²¹Ma nualolodi ia se abi waga eai; arinai waga wa ie duna edi aba lau wa geregerena eai.

²²Mara‐ie‐tom moutuadi wa se totoro hari sana awasi eai, se ita nige waga esau metai, esega mo ede arinai heaheatayao wa se geru, hinage se ita Iesu maedi nige se lau waga eai, isibom mo se lau:

²³(Taiede waga headi Tiberia eai se laoma se duna falawa edi aba aina eai wa, Guiau i lautoi wa murina eai).

²⁴Moutuadi wa Iesu nei eai nige se ita, eo ena heaheatayao hinage nige se itadi, isi hinage edi waga eai se geru, se laoma Kaperenauma, Iesu se eooi.

²⁵Abo se lobai hari sana awasi eai, ia se heriba, si ene, “Rabi e, huia esana u laoma inai?”

²⁶Iesu ie ribalau isi aridi eai i ene, “Mamohoi, mamohoi, ea heribamiu ta, omi au eooigu ta heiheinoidi au itadi wa nige au nuatuidi, na paana ede falawa au aidi wa, eo bogamiu se sese hinage.

²⁷Tabu au paisoa aiai posaposana bena au abi, na au paisoa aiai mia‐tahitahina i lau e mauri nige nosina, au abi. Ia ede Tau Natuna abo i leawa, ia arinai Tamana, Eaubada, heiheinoina i toreyao.”

²⁸Isi ia se heriba si ene, “Saha abo ai abi Eaubada ana paisoa abo ai paisoaei?”

²⁹Iesu ie ribalau isi aridi eai i ene, “Eaubada ana paisoa ede ina, ia i hetamariama au sunusunumaei.”

³⁰Isi ia se heriba si ene, “Heiheinoi saha hage u heitamai abo ai ita abo ai sunusunumaei? Saha abo u ginauri?