1Nitama sosi puni niꞌajihiꞌina natohwa emaaꞌe iji pijahuꞌe hura emaa ꞌahoꞌijihi punijihunaꞌe Godoni unaꞌi niꞌajihuna. ꞌEjukame pura puni swara kaꞌene ꞌeka roe vajahujaho hura ꞌeke punijihunaꞌe Godoni swasa venana. ꞌEne kúꞌo puni sisei jihuni swara kaꞌene ꞌeka roe vajahujaho hura ꞌeke puni sisei jihunaꞌe swasa venana.
2ꞌEne hu emaaꞌomo hu areri kiviꞌi ea kaꞌene pivusahiꞌina ꞌee ani ani ro vaiꞌiniji niꞌajihuna. Ijihuni maijaho hu ijaꞌini jihuni hahi hu areri niꞌajihuna.
3Ijihuni hahi hu ea ꞌahopuni sisei jihuni swasa vene ꞌee huni sisei jihuni swasa ꞌuꞌo venuna.
4Ei pini hu maoriꞌini urareje niꞌajihiꞌina natohwa rejakame ea na taꞌaroriha roꞌamajaho hu parehuna. ꞌEnakaivo Godira Eroni iji pijaha jaꞌinaꞌe pijaꞌamaji rehuna.
5Ijihuni hahi Kerisoho Hu oriꞌini taꞌarosaravakame ijihunaꞌe Niꞌajihiꞌina Natohwa rehuna pana. ꞌEnavo Godi kaꞌene ikaꞌina ꞌwaramajara A Nuni Hariha ꞌee Na iviasi Oni Oma ꞌwamajara iji pijahana ꞌwamana.
6ꞌEnakaivo ea pina Godoni ira vaji vena ikaꞌina Hu rona ꞌwaramana. A Merakisiteka oni amujaꞌomo Niꞌajihiꞌina Natohwa kaꞌene majama hina apena vahunijina ꞌwamana.
7Vea kaꞌene Hu iki mweꞌi hinajino Hu pakwahuniji niꞌajaꞌamarono Godoni siporua ꞌonarena ira ajira ꞌee niraviꞌi jarimana. Hu Godoni siporua ꞌonajihuni maijaho Hura Huhusu niꞌajahuni jihunaꞌe ꞌonana. ꞌEjumakame Godi Huni siporua henajihuni maijaho Hu Godoni hura venana.
8Jesu Godoni Hariha vo ahija kaꞌene Hu apena jihunaꞌe Omahoni ira hene vejiꞌina renana.
9Ijihuni hahi Godira vejume Hu Niꞌajúhiꞌina Natohwa ariramaa renana. ꞌEnaꞌomo Jesuho majama hihuni Anesuraꞌomo ea irara Huni ira hena veꞌamajaho hu majama hihuna.
10Jesu Merakisiteka oni amujaꞌomo Godira Hu iji pijahume Hu Niꞌajúhiꞌina Natohwa renana.
11Nú Huni vuꞌa ꞌahoꞌa mapoka ꞌwarahuna vo ja pahehuna kivu. Ijihunaꞌe nú icháꞌina vuꞌa ja ꞌwarave heꞌeja?
12Ja Godoni ea nitama ora. ꞌEnaꞌomo ja areri ea ꞌahoꞌa najahune saꞌina. ꞌEnavo ea ꞌahopo roe ja niꞌajihe Godoni ea maiꞌo rejare puni vuꞌijaho ja kúꞌo ꞌwarahuna. Ja areri musia saꞌinaꞌomo ja musaru iju kaivo ꞌiruma kaisina ja paijura.
13ꞌEnaꞌomo ea irara musaru ijiꞌi hinujaho hu maiꞌo Godoni ira ariramaijaho areri pahenu jihunaꞌe hu musia.
14Godoni ea emaakina rejajija puni ꞌirumijaho kisina. Pu opuipo rakijara maa ꞌee rakijara siseijaho nasarama hena kaviꞌi maijiru vejura.
