6 Hutuma ese harihari-bada tauna ena lalo-namo e tahuamu, bona taunimanima iboudiai na herahia e henimu tauna turana.
7 Ogoḡami tauna na tadikakana iboudiai ese e inai heniamu; benaini, turana ese e heautaniamu, dauha e laomu; e boi henidiamu, to idia na lasihidia.
8 Aonega e abiamu tauna na sibona e heura-henimu; lalo-parara e abia tarika-tarikamu tauna na ena namo baine bada.
9 Hahebade koikoi tauna ese mata-hakani basine reaia; bona hereva koikoi tauna na baine mase.
10 Kavakava tauna baine noho loḡea na dia namo; bona hesiai tauna ese lohia baine biagudia na dika herea.
11 Lalo-maoromaoro dainai tau ta na badu ai baine halahe, bona kara dika ilalo-negena na ia hairaina.
12 Pavapava ena badu na leona e ḡoumu na heto; ena lalo-namo na hunu rei latanai na heto.
13 Kavakava merona ese tamana e hadikaia vaitanimu; bona hahine ena hepapahuahu na medu e hetuturu hanaihanaimu na heto.
14 Ruma bona taḡa na tamada edia amo ta abimu; a mai darana hahinena na Iehova ena amo.
15 Lahedo ese taunimanima e hamahutadia hedavauhemu, bona lahedo tauna na baine hitolo.
16 Haheḡani e badinaiamu tauna na baine mauri, a hereva e dadaraiamu tauna na baine mase.
17 Ogoḡami taudia e bogadia hisimu tauna ese Iehova enai e heni torehaimu; Iehova ese ena kara davana do baine henia.
18 Natumu matana ba hakania, helaro na doini e miamu negana ai; lalomu basio hadaia ia baine dika.
19 Badu dikadika tauna ese davana baine abia; badina be boma hamauria, to ma boma karaia lou.
20 Hahealo herevadia ba kamonaidia, hahediba herevadia bavabidia dae; unu amo aonega bavabia, nega gabena ena.
21 Tau ta ena lalo-hadai na momo, a Iehova ena ura mo baine gini.
22 Tau ta enai ta ura heniamu ḡauna na heabidadama; ogoḡami tauna ena namo ese koikoi tauna ena e hereaiamu.
23 Iehova igari-henina ese mauri dalana ai e hakauda laomu; ienai e miamu tauna na lalona baine heḡereḡere, hahedika ta ienai basine kau.
24 Lahedo tauna ese imana na dihu ai e dau dobimu, bona basine abia isi uduna ai.
25 Ḡonaḡona tauna ba botaia, bena lalo-duhu taudia lalodia bae parara; lalo-parara tauna ba sisiba henia, bena ena aonega baine bada.
26 Tamana e daḡedaḡe heniamu bona sinana e luluamumerona ese hemarai bona gwaugwau e havaradiamu.
27 Natugu e, hahediba herevadia ikamonaina boma hadokoa, bena aonega herevadia amo ba raka oho danu.
