Hechos de los Apóstoles 2:8-42

⁸¿Nɨese naimacɨna cacadɨcaɨ? Caɨ uaido dajerie ñaɨana cacadɨcaɨ —raitɨmacɨ.

⁹Dɨga comɨnɨ imɨiaɨ itɨmacɨ: Partos, Medos, Elamitas, Mesapotamia imacɨ, Judea imacɨ, Capadocia imacɨ, Ponto imacɨ, Asia imacɨ,

¹⁰Frigia imacɨ, Panfilia imacɨ, Egipto imacɨ, Libia imacɨ. Libia imacɨ enɨrue Cirenemo ruica eruaɨde. Romamona jamai macaritɨno jɨaɨ itɨmacɨ.

¹¹Judíuaɨ itɨmacɨ. Judíuaɨñedɨno jɨaɨ itɨmacɨ. Judíuaɨ isoi Jusiñamuina jai sedadɨmacɨ. Cretenses itɨmacɨ. Arabes itɨmacɨ. —Caɨ uaido Jusiñamui ie ebirede fɨnoca rafuena cacadɨcaɨ —raitɨmacɨ.

¹²Nana eo raijicaidɨmacɨ. Danɨrie jɨcanododɨmacɨ: —¿Bue ite?

¹³Jɨaɨe comɨnɨ jɨfanoduano, raitɨmacɨ: —Jɨfaidɨmacɨ. Ie jira iese ebena ñaɨtɨmacɨ.

¹⁴Ie facaise ie once nabaiñɨaɨ naimɨe ecɨmo illanona, Pedro nainomo como ofidɨnomo ado llote: —Caɨmacɨ, ua nana Jerusalén imacɨ, cue lluamo cacarei. Naie rafuena lloitɨcue.

¹⁵Omoɨ comecɨaɨna omoɨ facaja isoi, jɨfaiñedɨcaɨ. Jitoma nia fuirɨ daidemo, bu jaca jɨfairaɨnina.

¹⁶Joel mɨcorɨ bie rafuena jaie llote. Joel mɨcorɨ Jusiñamui rafuena lloraɨma. Naimɨe jaie lloga rafue birui caɨmo jai suide.

¹⁷Llote: Jusiñamui caɨmo llote: “Jɨaɨruido bie rafue suite. Cue Joreñona dɨga comɨnɨmo fecajitɨcue. Iedo omoɨ uruiaɨ cue lluana lloitɨmacɨ. Iemona omoɨ coniruiaɨna nɨcaɨritaitɨcue. Iemona omoɨ einamacɨna jɨaɨ nɨcaɨritaitɨcue.

¹⁸Ua nana cuena sedadɨnomo cue Joreñona fecajitɨcue. Naimacɨ cue lluana lloitɨmacɨ.

¹⁹Monamo eo jacɨrede rafuena ɨco suiñotaitɨcue. Enɨruemo eo jacɨrede rafuena ɨco jɨaɨ suiñotaitɨcue. Comɨnɨ jobairillemona, enɨruemo comɨnɨ dɨruedɨ eo iite. Naie facaise daje dɨese enɨrue boojite. Bouamona uillɨe eo iite.

²⁰Jitoma llɨgaiñoñeite. Fɨvui dɨruena eruaɨte. Nana bie suite, Cristo billa facaise nia iñenia. Naie facaise dɨga jacɨrede rafue suite;

²¹iadedɨ birui cuemo bu jɨcaia, ie jeacɨnomona naimɨena jillotaitɨcue” Jusiñamui llote. Ie Joreño caɨmo birui illamona, Joel mɨcorɨ llogacɨno jai suide.

²²’Caɨmacɨ, bie uaina omoɨ cacarei. Nazaret ie Jesúna ñaɨtɨcue. Jusiñamuidɨ omoɨ motomo naimɨena siño rafuena jai fɨnotate. Iena jai uiñotomoɨ.

²³Jusiñamui comecɨ jaie facaja isoi, Jusiñamui jitailla isoi, Jusiñamui naimɨena omoɨmo fecade. Jesúna coraɨtatomoɨ. Jusiñamuina ɨɨnoñedɨnona naimɨena meinetadomoɨ;

²⁴iadedɨ fiodaillamona naimɨena Jusiñamui jillotajano, llegɨ ie cacajamona naimɨe jillobide. Naimɨe fiodaite; iadedɨ fiodaillamona nainomo iñoiñede.

²⁵David mɨcorɨ naimɨena jaie llote: Jusiñamui cue dɨga jaca illana uiñotɨcue. Cue ecɨmo naimɨe ite, cue comecɨna ocuiñotallena.

²⁶Ie jira cue comecɨ caɨmare ite. Eo iobidɨcue. Cue marena illemo jai jɨaɨ ocuiridɨcue,

²⁷raɨafomo cue joreñona naimɨe faɨnonocaiñena jira, ie mare Jito abɨ rɨfaillana naimɨe jitaiñena jira.

²⁸Naimɨe cuena jilloitallena uiñotɨcue. Cue dɨga naimɨe illa jira, cue comecɨ caɨmare iite.

²⁹’Caɨmacɨ, caɨ usuma David mɨcorɨna marefodo ñaɨtɨcue. David mɨcorɨ ñaɨa, dama naimɨe facaina ñaɨñede. Jesúna ñaɨte. David mɨcorɨ jaie fiodaite. Raɨafomo jonega. Naifo bene nia illamona, naimɨedɨ Jesúna ñaɨana uiñotɨcaɨ.

³⁰Ie ia David mɨcorɨ Jusiñamui rafuena llote. Naimɨe mɨcorɨdɨ Jusiñamui naimɨemo uanaicɨnona lluana uiñote. Jaie Jusiñamui naimɨemo llote: “O uruiaɨmona damɨe illaɨmana illanona, ie comɨnɨna sedajite” llote.

³¹Cristona ñaɨte. David mɨcorɨ nia suiñede rafuena llote. Naimɨe mɨcorɨ Cristo jilloillena llote: “Raɨafo Jusiñamui fiodaillanomo Cristo Joreño faɨnonocaiñeite. Cristo abɨ rɨfaiñeite” llote.

³²Jesúna ñaɨte. Jusiñamui Jesúna jai jillotate. Nana caɨ iena cɨodɨcaɨ. Ie jira iena llotɨcaɨ.

³³Ie ecɨmo Jesúna jai dane itatajanona, Jusiñamui naimɨena iobitade. Ie Moo llua isoi, Jesús jai ie Moo Joreño caɨmo jai fecade, omoɨ birui cɨua isoi, omoɨ birui cacaja isoi.

³⁴Naimɨe abɨ monamo jaiñena jira, David mɨcorɨ dama naimɨe facaina ñaɨñede; ia Cristona ñaɨte. Ero, jaie David mɨcorɨ raite: Jusiñamui Cristomo llote: “Cue ecɨmo ana raɨ.

³⁵Ona ɨɨnoñedɨnona o anamo itataitɨcue” raite. David mɨcorɨ llua isoi, birui jai suide.

³⁶Pedro nia ñaɨte: —Jesúna coraɨdomoɨ; iadedɨ Jusiñamui naimɨena caɨ Namana itatate. Naimɨena caɨ Jilloitaraɨmana jai itatate. Nana judíuaɨ comɨnɨ naiena uiñuana jitaidɨcue.

³⁷Pedro lluana cacajano, naimacɨ comecɨaɨmo rɨire baite. Pedromo iena jɨcanotɨmacɨ. Ie nabaiñɨaɨmo jɨaɨ jɨcanotɨmacɨ: —Caɨmacɨ, o lluana jai cacadɨcaɨ. ¿Bue fɨnoitɨcaɨ?

³⁸Pedro uai ote: —Omoɨ comecɨaɨ iuaina meido. Iemei Jusiñamui omoɨmo ite jeacɨnuaɨna dotajite. Jesucristo facaina omoɨ bautizallomoɨ. Jusiñamui Joreñona jɨaɨ feiñoitomoɨ.

³⁹Omoɨmo ie Joreño fecallena navui llote. Omoɨ uruiaɨmo jɨaɨ fecaite. Jɨaɨe naɨraɨaɨ itɨnomo jɨaɨ fecaite. Ua nana Jusiñamui fetocanomo jɨaɨ fecaite.

⁴⁰Dɨga uai naimacɨmo Pedro llote. Raite: —Ailluena comɨnɨ maraiñede rafuena birui fɨnocana jaidɨmacɨ. Faɨfitɨmacɨ. Naimacɨ isoi jaiñeno; iadedɨ cue lluana omoɨ cacajamona, iena ɨɨno.

⁴¹Dɨga comɨnɨ ie lloga uaina feiñuano, bautizadɨmacɨ. Nairuido nɨbaɨ tres mil comɨnɨ creyentiaɨna jaidɨmacɨ.

⁴²Cristo oretagano llofuiana fueouidɨmacɨ. Cristo oretaganona eo nabaidɨmacɨ. Nagarui ofillanona, Jesús fiodaillana comecɨuidɨmacɨ. Jusiñamuimo jɨɨuidɨmacɨ.