Hechos 8:18-32

¹⁸Simonka rikurka apostolkuna makinkunata churashpankuna kirikkunapi Yaya Diospa Espíritun yaykuhukta. Chasna rikushpan kullkita apamurka apostolkunata kunanpa.

¹⁹Chay kullkita rikuchishpan rimarka: Ñukatapas kuwaychi chay yachayta, ñukapas makinita maykanpipas churashpayni Yaya Diospa Espíritun yaykunanpa.

²⁰Chasna nishpan Pedroka aynirka: Yaya Diospa kushkan yachayta rantisha nishpaykika chay nina mana wañukma rinayki tiyan kullkikiwa pakta.

²¹Kanka mana atipankichu ñukanchishina Yaya Diospa yachayninwa kawsanata. Shunkuykika Yaya Diospa rikushkanpika manami alichu.

²²Millaypata yuyarihushkaykimanta llakirishpayki sakiy Yaya Dios munashkanshinana yuyarinaykipa. Chaymantapas Yaya Diosta mañay shunkuykipi yuyarishkaykita pay munashpanka llakichinanpa.

²³Yapa tukuymanta atun yachayyu kanayashpaykimi millaypa yuyayllawa watarishka kahuktashina rikuni kanta.

²⁴Chasna Pedro rimashpan Simonka aynirka: Kankuna Yaya Diosta ñukarayku mañapaychi mana rimashkaykishina pasanaynipa.

²⁵Pedroka Juanwa Jesusmanta sumakta yachachishkankunawasha chasnallatata Yaya Diospa shiminta yachachishpa Jerusalenma kutirkakuna. Kutihushpankuna Samaria allpapi achka llaktakunapi Yaya Diospa shiminta yachachishpa rirkakuna.

²⁶Chaywasha Yaya Diospa shuk angel Felipeta rimarka: Atarishpayki Jerusalenmanta urayma riy, Gasa llaktama rina ñampita. Chay ñampika chunlla chakishka allpa chawpita rin.

²⁷Chasna rimashkanta kasushpan Felipeka rirka. Chaypi shuk Etiopiamanta runata tinkurka. Payka kaparishka karka. Etiopiapi kamachik atun apu warmi Kandase shutiyupa kamachinan karka. Paypa churashkan shuk atun kamachik karka. Chasnallatata chay warmi apupa kullkinta wakaychak karka. Chay runaka Jerusalenpi Yaya Diosta mañanapa rishkanwasha kutihurka.

²⁸Kaballu aysashka karronpi tiyarishpan Yaya Diospa shimin killkarishkata leyishpa kutihurka. Chay killkaka ñawpa Yaya Diospa yachayninwa yachachik Isaiaspa killkashkan karka.

²⁹Chaypi Yaya Diospa Espíritun Felipeta rimarka: Kayllayay chay karrota.

³⁰Chasna nishpan Felipeka kayllayak rirka chay karrota. Kayllayashpan Isaiaspa killkashkanta leyihukta uyashpan tapurka: ¿Leyihushkaykita alita asirtankichu?

³¹Chasna Felipe tapushpan Etiopiamanta runaka aynirka: Nima pi yachachiwashpanka imashnata atipasha asirtanata. Chasna nishpan Felipeta sikachirka karronpi paypa kuchunpi tiyarinanpa.

³²Chay runa leyihushkan killkapi shuk parti kasna nin: Payta obehatashina wañuchinankunapa pusharkakuna. Imashnami willmanta pitihushpankuna obehaka mana kuchparinchu, nima kaparinchu, chasnallatatami paypas chunlla kiparirka.