Hechos 2:18-33

¹⁸Chi punzhagunaibiga ñucata catic runagunama ñuca Samaita cachashami, carigunamas, huarmigunamas. Chasna tucucpi paiguna ñucamanda cuintanaungami, chasnami Dios nishca.

¹⁹Manzhanayactagunatas cieloibi ricuchishami. Chasnallata cai allpaibiga rahuaihuanbas ninahuanbas cushnihuanbas manzhanayactagunatas rashami ñuca ushaiyuc acta ricuchishami canguna ñaupacpi.

²⁰Diospa jatun taripana punzha mana pactamugllaita indi ansayangami, quilla pucayangami rahuaicuinta. Chi punzha tucui runaguna ñaupacpi manzhanayacta punzha angami.

²¹Chasna acpi tucui Diospa shutihuan mañaccuna quishpishca tucungaunami. Dios chasna rimashcata Joel quillcashcami.

²²Chimandami Pedro mas rimasha catira, Uyaichi ñuca cuintangaraushcata israel runaguna. Dios paihua ushac yuyaita cura Nazaretmanda Jesusta. Chasna cucpi Jesusca cangunahuacpi ashca mana pihuas rashcagunata Diospa ushaihuan rasha janbira. Tucuimi chigunataga ricusha pai Diospagmanda shamushcata alita yachanguichimi.

²³Chasna agllaita Dios munashcamandami Jesusta canguna maquibi saquishca tucura. Dios ñaupata yachashcamanda canguna mana ali runaguna yanapashcahuan paita huanchiranguichi.

²⁴Canguna huanchigllaita Dios cuti causachira. Huañuiga mana usharachu Jesusta binsinata, chiraicu pai cuti causarira.

²⁵Ñáa israelgunata mandac amu David chasna Jesus cuti causarina ashcamanda unai ñaupata quillcara casna nisha: Tucui uras Yaya Dios ñucahuan tiyaunmi ñucata yanapangahua. Paiga ñuca ali maqui partima tiyaunmi ama ñuca imatahuas manzhachun nisha.

²⁶Chasna acpi ñuca yapa ashcata cushiyarani. Ñáuca cushi shimihuan rimarani. Ñáuca aicha huañucpihuas Dios ñucata cuti causaringaraushcata yuyarisha cushiyani.

²⁷Can ñuca causaita mana saquisha cambagma apangaraungui. Cambac ashcamanda ñuca aichata mana saquingachuraungui ismuchun nisha.

²⁸Canhuan causanata yachachihuashcangui. Can ñucahuan aushcamandami cushiyachihuangaraungui. Chasnami David quillcara Jesucristo causarinamanda.

²⁹Pedro mas cuintara, Sirtumi rimani huauquiguna. Ñáucanchi huañuc apayayagunata mandac rey amu David huañushcai pambanaura. Paita pambashca juctu chara aunmi.

³⁰David ñaupa uraspi Dios rimashcata pasachic runa ara imasna huasha tucungaraushcata yachasha. Pai Dios sirtu rimashcata yachasha paihua miraimandallata shuc jatun paicuinta mandac shamunata yachara.

³¹David chita yachashami Jesus cuti causarinata ricushcacuinta rimara quishpichighua causai mana huiñai huañushca saquiringachu, chasnallata paihua aicha mana ismungachu nisha rimara.

³²Diosca cai Jesusta huañuimanda causachirami. Chita ricusha ñucanchi paimanda rimaccuna anchi.

³³Dios Jesusta tucuigunamanda mas yalita balichira. Chasnallata Diospa Samaitas paima cura pai ñaupa rimashcacuinta. Pai randi ñucanchima cucpi cunan canguna tucui ricushcatas uyashcatahuas Jesusmi rara.