Hechos 2:1-34

¹Chaypitam Pascua fiestapita pichga chrunca junag pasashachrüga chraramura ‘Pentecostés fiesta’ ningan. Chayga cara Israel castacunapa fiestanmi. Nätan chay fiesta galayunan junagmi Jesusman yupachicugcunaga juc wayilachru goturarcayara lapan.

²Chaypitam mayänipita mayacaramun jana pachapita juc alisca walyay wagarignuy chay carcayangan wayiman.

³Chaura wayichru lapan cayag runacunam ricapapäcusha Santu Espirituta, achicyayar juc ninanuy lapancunaman chragta.

⁴Chauraga lapan goturarcayag runacunam ricacarärin Santu Espiritupa munayninchru. Jinarcurmi galayarärin tucuy casta rimaycuna rimayta mana yachrapäcunganta, Santu Espíritu rimachiptin.

⁵Chaura Jerusalenchru chay fiestamanga lapan nacionpitam aywapäcamusha cara Dios manchacug Israel castacuna.

⁶Chay wagarigta mayarärirga achcam runacuna juntacarärimun chay wayicagman. Chaura chay runacuna lapanpa rimaynincunachru cama rimapäcugta mayarärirga manam tantiayta atipapäcurachu ima pasayangantas.

⁷Jinamanmi pasay manchacasha nirag capäcurga cay ninacurcara: “Lapansi cay rimarcayagcunaga Galilea ninganchru yachragmi carcayan.

⁸¿Imanaypatag cananga nätan rimayninchichru cama lapanchitas rimapayämanchi?

⁹Caychrüga cayanchitag Partiapita, Mediapita, Elampita, Mesopotamiapita, Judeapita, Capadociapita, Pontopita, Asiapita,

¹⁰Frigiapita, Panfiliapita, Egiptopita, Cirenepa wac lädun Libia ninganpita. Carcayantan Romapita aywacamusha Israel castacunas, nätan juc casta runacuna Israel castaman muyushacunas.

¹¹Jinaman carcayantan Cretapitas, Arabiapitas. Nätan cananga lapanchitan mayayanchi rimayninchichru cama Tayta Dios noganchipag ima-aygata rurayangantas” ninacurcaram.

¹²Chay runacuna lapansi manchacasha, jinaman mayacasha nirag capäcurga quiquincamam tapunacurcara: “¿Imatag cay runacunawan pasayan?” nir.

¹³Nätan waquin runacunam asipapäcura “Shincararcayanmau” nir.

¹⁴Nipäcuptinmi Pedroga shayurun jinaman shayaräriratan chay chrunca jucniyog Jesuspa cachran rurag-mayincunas. Chaypitam Pedroga gayacuypanuy cay nira: “Israel castäcuna, jinaman cay Jerusalén marcachru lapay yachrayagcuna, cananga shumag mayacarcämay imata nipäcunagtas:

¹⁵Gamcunaga ‘Shincararcayanmi’ nircayämanquim. Nogacunaga manam shincashachu capäcü. Chayragtag nachrgayan goya jamaymansi.

¹⁶Antis cay ricarcayangayga ruracayan Diospa unay willacugnin Joel isquirbingannuymi.

¹⁷Paywan Tayta Diosga isquirbichira cay nirmi: “Ushanan junagcunachrümi cachramushag Santu Espirituta lapan runacunaman. Chaura paymi lapan wamraycunata, warmitas, olgotas Diospita rimachinga. Nätan mözuycunatam ricapachishag ima-aygatas, jinaman auquincunatam imatas sueñuyninchru ricachishag.

¹⁸Chay junagcuna cachramushag Santu Espirituta servimagnïcunamanmi warmimansi, olgomansi. Chaymi ningäta rimapäcunga.

¹⁹Jana pachachrümi ricacächimushag manchacuypagcunata, nätan cay pachachrümi canga yawarla, nina rupayla, jinaman goshchrila. Chaynuy ruracanga chay ali willapa Diospita cangan tantiapäcunanpagmi.

²⁰Intim yanauyagman muyunga, nätan quillam muyunga yawarmannuy. Chaycuna ruracanga Munayniyog Dios aywamunan junag nachrgarayämuptinmi.

²¹Chaura pi maysi Munayniyog Diosta ‘Cuyapämaynar’ nigga salvasham canga” niram Diosga.

²²“Chaura Israel casta runacuna, cay rimangäta shumag mayapäcamay: Nazaret marcapita Jesusga cara Dios cachramungan runam. Chaymi musyapäcungaynuysi payga mana pi runas ruray atipänancunata ima-aygatas rurara gamcunachru.

²³Paytam gamcunaga charircur wanurärichiray chay tucuy jucha rurag runacunawan cruzman clävachiypa. Nätan unaylapitam Tayta Diosga munara, jinaman musyara paywan chaynuy ruracänanpitaga.

²⁴Nätan Tayta Diosga Jesusta cawacarachimura munayninwanmi mana chaynuy wanushala cananpag.

²⁵Chay cawacächimunanpita Rey Davidga isquirbira cay nirmi: ‘Munayniyog Diosga, nogawan chaynuylam cayan. Payga cayan derëcha läduchrümi mana pisi manchachimänanpag.

²⁶Chaymi alisca cushirayä, nätan alawayäsi cushicuypita jinaman cuerpüsi jamanga gamta shuyacuyälarmi.

²⁷Gamga manam dëjamanquichu wanuptïsi wanushacuna cacunanchrüga. Amatan munanquichu Dioslapag cawag servigniquipa cuerpü ismunantas.

²⁸Gamga musyarachimanquim imaycamas cawacugla canäta. Gam nogawan captiquiga alisca alisca cushisham cashag’ niram.

²⁹Chauraga Israel casta-mayïcuna, unay Reyninchi David wanuruptin, payta enterraräriram, jinaman canancamam noganchicagchru chay enterrapäcungan cayan.

³⁰Davidga chaynuy rimara Diospa willacugnin runa carmi. Pay musyara shumagmi Dios razonpa cay ninganta: ‘Gampa castaypitam jucta acrashag gamnuysi rey cananpag’.

³¹Chaypitas Davidga isquirbira nä pasay ricayagnuytan. Chaymi Diospa acrashan Jesús cawacämunanpita isquirbira: ‘Manam pay cangachu enterrapäcungancagchru, manatan cuerpunsi ismungachu’ nin.

³²Chaura Rey David isquirbingannuymi Jesusta Diosga cawacächimura. Nätan chay cawacämushata lapämi nogacunaga ricapäcurä.

³³Chaura mandag cananpag Dios chruraptinmi, jinaman Santu Espirituta ‘Gammi cachranqui’ Dios nisha captinmi, Jesusga Santu Espirituta cachraramun. Chaytam canan gamcunaga mayarcayanqui.

³⁴Chaura Jesús mandag cananpitaga Rey Davidga jana pachata mana jegarayarsi isquirbira cay nirmi: ‘Tayta Diosmi nira Munayniyognïta: “Gam tayucuy cay derëcha läduman mandag canaypag.