Hechos 28 - Xasasti talacaxlan

¹Acxni̠ chú hua̠katá xactacutni̠tanchá̠hu nac xquilhtú̠n chúchut ni̠ xli̠maka̠s cqui̠catzí̠hu pi̠ a̠má pu̠latama̠n xuanicán isla de Malta.

²Ama̠ko̠lh cristianos hua̠nti̠ antá xtalamá̠nalh nac a̠má isla la̠li̠huán tzúculh tatamacxtumi̠y; cumu luu tla̠n xtapa̠xuhuá̠n xtahuani̠t la̠li̠huán tama̠macxtúmi̠lh quihui, tama̠lhcúyulh xlacata nacskoná̠hu porque luu li̠pe̠cua la̠ta xlonknuma.

³Pero cumu Pablo na̠ quí̠sacli pa̠tzú xascahuahua quihui acxni̠ chú xca̠ma̠quincapu̠ma nac lhcúya̠t antá kostaxtuchi tantum lu̠hua, li̠tamakásnatli Pablo y macáxcalh.

⁴Acxni̠ a̠ma̠ko̠lh cristianos xalac Malta taúcxilhli pi̠ Pablo li̠tamakásnatli lu̠hua y macáxcalh, chiné tzúculh tahuán: —Tamá chixcú ma̠x makni̠nani̠t, porque ma̠squi ni̠ mú̠xtulh nac pupunú pero cumu lhu̠hua tala̠kalhí̠n tlahuani̠t Dios ni̠ ma̠xqui̠y quilhtamacú calatáma̠lh.

⁵Pero Pablo lhken ma̠kósulh a̠má lu̠hua y antá poklh tamacpu̠chá nac lhcúya̠t, y ni̠para tzinú túcu lánilh.

⁶Xlacán xtalacpuhuán pi̠ la̠n nali̠macacún y ni̠para xali̠tacatzí̠n acxni̠ nama̠lakchu̠hui̠y, maktum natama̠ya̠chá xaní̠n. Pero cumu maka̠s la̠ta lacatzá̠lalh quilhtamacú y nítú xlanima huata chiné tzucupaj tahuán: —¡Tamá chixcú ma̠x cha̠tum Dios porque ni̠para tzinú túcu tlahuánilh xveneno lu̠hua!

⁷Nac Malta xuí cha̠tum gobernador xuanicán Publio, cumu xlá xkalhíy xpu̠cuxtu nac xquilhtú̠n pupunú pus antá chú nac xpu̠cuxtu ctacutchá̠hu. Acxni̠ cátzi̠lh hua̠ntu̠ xquinca̠akspulani̠tán xlá luu tla̠n quinca̠catzi̠nín y aktutu quilhtamacú quinca̠ta̠hua̠yán.

⁸Quinca̠huanicán pi̠ xtla̠t Publio xkalhi̠y palha lhcúya̠t y xli̠lama takalhni̠sti. Pablo alh lakata̠yay, acxni̠ chú xlá kalhtahuakaniko̠lh Dios, liacchípalh xmacán y tuncán ma̠tlá̠nti̠lh.

⁹Acxni̠ xli̠hua̠k cristianos tacátzi̠lh hua̠ntu̠ xtlahuani̠t Pablo la̠li̠huán tzúculh tamín xli̠hua̠k ta̠tatlaní̠n hua̠nti̠ xtahuilá̠nalh nac a̠má ca̠chiquí̠n y hua̠k ca̠ma̠tla̠ntí̠calh.

¹⁰Caj la̠ta hua̠ntu̠ xtlahuani̠t Pablo lhu̠hua cristianos hua̠nti̠ xtapa̠xcatcatzi̠nimá̠nalh, y acxni̠ chú aya ctaca̠xkó̠hu xlacata nacquilhta̠yaparayá̠hu quintijicán luu lhu̠hua hua̠ntu̠ quinca̠ta̠i̠cán la̠qui̠ ni̠tu̠ naquinca̠tzanka̠niyá̠n nac tiji hasta naccha̠ná̠hu antanícu xacama̠náhu.

¹¹Aya xle̠ma xliaktutu papá la̠ta xaclama̠náhu nac a̠má pu̠latama̠n y acxni̠ chú ctaca̠xui antá ctajú̠hu nac aktum barco xuanicán Los Gemelos xalac Alejandría, xlá na̠ antá xtamakxtekni̠t nac Malta li̠huán ti̠taxtuko̠lh a̠má xquilhta ca̠lonkni, pus huá chú cpu̠háhu.

¹²Luu caj lacapala cchá̠hu nac Siracusa, y antá ctamakxtekui aktutu quilhtamacú.

¹³Acxni̠ chú antá ctaca̠xparáhu cli̠tamakspitui eé pu̠latama̠n y cchá̠hu nac Regio, li̠cha̠lí chú tzucupaj u̠nún pero huata caj quinca̠makta̠yán porque la̠li̠huán tzúculh sakalé̠n quibarcucán y caj li̠cha̠lí cchá̠hu nac aktum ca̠chiquí̠n huanicán Puteoli.

¹⁴Antá chú nac eé ca̠chiquí̠n ca̠ma̠noklhúhu makapitzí̠n nata̠lán hua̠nti̠ na̠ xtali̠pa̠huán Jesús xlacán quinca̠huanín xlacata pi̠ antá cactamakxtekui ca̠na̠caj aktum xama̠na; acali̠stá̠n chú ctaca̠xparáhu, caj ctla̠huaáhu y cchá̠hu nac Roma.

¹⁵Xli̠hua̠k a̠ma̠ko̠lh cristianos xalac Roma hua̠nti̠ xtali̠pa̠huán Jesús, acxni̠ xlacán tacátzi̠lh pi̠ aya xaccha̠ma̠náhu nac xca̠chiqui̠ncán, pu̠tum támilh quinca̠pa̠xtoká̠n; makapitzí̠n xquinca̠kalhi̠má̠n lacatum antanícu huanicán Foro de Apio, y makapitzí̠n antá tachinchá lacatum antanícu huanicán Las Tres Tabernas. Acxni̠ Pablo ca̠úcxilhli pi̠ xli̠ca̠na xtapa̠xqui̠y la̠n pa̠xúhualh y pa̠xcatcatzí̠nilh Dios caj xpa̠lacata hua̠ntu̠ xlá xtlahuani̠t y li̠huaca kálhi̠lh li̠camama.

¹⁶Acxni̠ chú cchá̠hu nac Roma capitán Julio ca̠macamá̠sta̠lh tachí̠n nac xlacatí̠n hua̠nti̠ naca̠maktakalha, pero huata xlá má̠xqui̠lh talacasquín Pablo xlacata pi̠ lacatunu xlá catáhui antanícu ma̠tla̠nti̠y, pero ma̠squi chuná ankalhi̠ná xmaktakalhma cha̠tum tropa.

¹⁷Li̠tu̠xama xli̠cha̠ncani̠t Pablo nac Roma acxni̠ xlá ca̠ma̠tasaní̠nalh xanapuxcun judíos antá xalaní̠n nac Roma, y acxni̠ aya pu̠tum xtahuilá̠nalh Pablo chiné ca̠huánilh: —Xli̠hua̠k huixinín nata̠lán, aquit camá̠n ca̠ta̠kalhchuhui̠naná̠n y nacca̠huaniyá̠n xlacata pi̠ ni̠tu̠ cca̠tlahuanima judíos na̠ ni̠para caj xackalhakaxmatmakán a̠má quintasmani̠ncán hua̠ntu̠ aquinín judíos quinca̠ma̠siyunini̠tán xtama̠kantaxti̠y xalakmaká̠n quili̠talakapasnicán. Pero ma̠squi ni̠tu̠ ctlahuama hua̠ntu̠ ni̠tlá̠n, nac Jerusalén quinchipacanchá y quimacama̠stá̠calh nac xmacancán ma̠peksi̠naní̠n romanos.

¹⁸Acxni̠ a̠ma̠ko̠lh ma̠peksi̠naní̠n quintama̠kalhapali̠ko̠lh xlacán xquintamakxtekputún porque ni̠ quintamaclánilh tala̠kalhí̠n hua̠ntu̠ naquintali̠ya̠huay la̠qui̠ naquimakni̠cán.

¹⁹Pero huata xanapuxcun judíos ni̠ talacásquilh naquimakxtekcán, pus huá xpa̠lacata cca̠li̠huánilh pi̠ huá aquit clacasquín naquima̠kalhapali̠y emperador uú xalá, pero ni̠tu̠ nalacpuhuaná̠tit para caj cca̠si̠tzi̠niy o huí tú cca̠li̠ma̠lacapu̠putún a̠ma̠ko̠lh hua̠nti̠ quinata̠chiquí̠n judíos.

²⁰Pus huá chú xpa̠lacata aquit cca̠li̠ma̠tasani̠nán la̠qui̠ huixinín naquila̠lakapasá̠hu y nacatzi̠yá̠tit pi̠ aquit cli̠tachi̠ni̠t caj xpa̠lacata ckalhkalhi̠ma y cca̠najlay hua̠ntu̠ na̠ xli̠hua̠k quili̠talakapasnicán israelitas xtaca̠najlay pi̠ Dios naca̠ma̠lacastacuani̠y ni̠n nac ca̠li̠ní̠n, pus huá chú xpa̠lacata ma̠squi chuná quili̠macachi̠cani̠t cadenas.

²¹Ama̠ko̠lh lacchixcuhuí̠n chiné takalhtí̠nalh: —Aquinín ni̠tu̠ quinca̠lakchimá̠n carta xalac Judea antanícu naquinca̠li̠ta̠kalhchuhui̠nancaná̠n tícu huix, y ma̠squi na̠ tamini̠tanchá nac Jerusalén makapitzí̠n cristianos ni̠tu̠ quinca̠li̠ta̠kalhchuhui̠namá̠n para túcu ni̠tlá̠n tlahuani̠tampi antá.

²²Aquinín clacasquina̠huá naquila̠huaniyá̠hu xanícu huix luu maktapeksi̠ya y túcuya̠ talacapa̠stacni huix kalhi̠ya, porque aquinín ccatzi̠yá̠hu pi̠ xli̠hua̠k hua̠nti̠ tali̠pa̠huán Jesús la̠tachá nícu ma̠rí ca̠si̠tzi̠nicán y ni̠ ca̠ucxilhputuncán.

²³Xlacán tali̠lhcá̠nilh aktum quilhtamacú la̠qui̠ naca̠ta̠kalhchuhui̠nán, acxni̠ lákcha̠lh a̠má quilhtamacú luu lhu̠hua cristianos tatamacxtúmi̠lh antanícu xuí Pablo. Xlá tzúculh ca̠ma̠kalhchuhui̠ni̠y cristianos, chunatá la̠ta tixkákalh hasta tzi̠suanko̠lh xca̠ma̠lacapu̠tuncuhui̠nima la̠ta lácu Dios xma̠lacatzuqui̠putún xasa̠sti xli̠ma̠peksí̠n nac xlatama̠tcán hua̠nti̠ tali̠pa̠huán, y antá xquilhpa̠i̠ma nac li̠kalhtahuaka hua̠ntu̠ xamaká̠n titzokchá Moisés xa̠hua profetas xlacata hua̠ntu̠ xámaj tlahuay Jesús.

²⁴Lhu̠hua hua̠nti̠ tali̠pá̠hualh Jesús caj xpa̠lacata hua̠ntu̠ xca̠huanima Pablo, pero makapitzí̠n ni̠ taca̠nájlalh.

²⁵Ama̠ko̠lh cristianos ni̠ acxtum tacátzi̠lh y tatapajpítzilh, tampu̠tiy tatáxtulh, y acxni̠ aya xtataxtumá̠nalh la̠qui̠ nataaná nac xchiccán Pablo chiné ca̠huánilh: —Hua̠ntu̠ Espíritu Santo tima̠lacpuhuá̠ni̠lh profeta Isaías la̠nchú nac eé quilhtamacú aya kantaxtuparani̠t.

²⁶Porque Isaías chiné tica̠huánilh xalakmaká̠n quili̠talakapasnicán: Huixinín pimpá̠tit kaxpatá̠tit quintachuhuí̠n, pero ni̠túcu catiakatá̠kstit; ma̠squi lacahua̠naná̠tit qui̠taxtuy cumu la̠mpara ni̠tu̠ ucxilhpá̠tit.

²⁷Porque huá minacujcán luu lanca xtá̠yat, ma̠squi kalhi̠yá̠tit mintake̠ncán pero ni̠ li̠kaxpatá̠tit, kalhi̠yá̠tit milakastapucán pero ni̠tu̠ tla̠n li̠lacahua̠naná̠tit, ma̠squi kalhi̠yá̠tit mintalacapa̠stacnicán pero ni̠lay akata̠ksá̠tit hua̠ntu̠ xatlá̠n tapuhuá̠n, chuná qui̠taxtuma porque huixinín ni̠ quila̠kaxmatniputuná̠hu y ni̠ quila̠lakmimputuná̠hu xlacata aquit nacca̠ma̠tla̠nti̠yá̠n.

²⁸Pus na̠ mili̠catzi̠tcán pi̠ a̠má laktáxtut hua̠ntu̠ Dios ma̠lacnu̠y na̠ naca̠li̠ma̠kalhchuhui̠ni̠cán cati̠hua̠ cristiano ma̠squi ni̠ judíos, porque xli̠ca̠na pi̠ huatuní̠n nataca̠najlaniy y natali̠pa̠huán.

²⁹Acxni̠ takaxmatko̠lh eé tachuhuí̠n a̠ma̠ko̠lh judíos la̠li̠huán tatáxtulh y sacstucán tzúculh tala̠huaniy para ca̠na o ni̠ca̠na hua̠ntu̠ xca̠li̠ma̠kalhchuhui̠ní̠y Pablo.

³⁰Pablo sá̠cualh aktum chiqui y antá latáma̠lh nac Roma aktiy ca̠ta, xlá li̠pa̠xúhu xca̠makamaklhti̠nán hua̠nti̠ xlá xtalakapaxia̠lhnán.

³¹Chunatiyá la̠ta xli̠chuhui̠nán xtachuhuí̠n Dios, li̠huana̠ xma̠lacapu̠tuncuhui̠y túcu xpa̠lacata xli̠macamincani̠t Quimpu̠chinacán Jesucristo nac ca̠quilhtamacú, y ni̠para tícu xuá para ni̠tlá̠n hua̠ntu̠ tlahuama o para nalactlahuanicán xtascújut.

Hechos 2812345678910111213141516171819202122232425262728

Hechos 28
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28