Hechos 24:6-22 in Achi

⁶ Xak xraj te cu kajsaj u ʼij i rachoch i Dios; xui-ri xka chapo, xkaj teʼek caka ʼan ʼatbal tzij puwi pacha cu bij i ka ʼatbal tzij yoj.

⁷ Xui-ri, i ma Lísias, chi capitan, xu min rib cuʼ u qʼuial soldádo y xu maj pa ka ʼab.

⁸ Teʼuri xu bij chi je pachin que cojow u mac, ʼo u chac que cʼun awuʼ. Yet mísmo, we ca tzʼonoj che i aj mac-le, cawetamaj na wach usucʼ u mac coj tijin chu cojic. (Que ile xu bij i ma Tértulo che i gobernador.)

⁹ Xak i aj Israel chi je cʼun-nak ruʼ, quiqui min quib chi chʼaʼatic. Quiqui bij chi lic sak laj tzij ile.

¹⁰ Are ʼuri i gobernador xu cʼut ruʼ u ʼab che i ma Páblo chi ca chʼawic. I ma Páblo xu bij: —Lic cul in cʼux quin bij in tzij chawach, tobal wib, man wetaʼam chi qʼuial chic junab ʼo chawe chi ca ʼat tzij pakawi yoj, oj aj Israel re i jyub-i.

¹¹ Yin, cʼa te cablajuj ʼij iri wuponic pa Jerusalen chu cojic u ʼij i Dios. We cawaj cat tiqui chi tacʼalem pa rakan chi sak laj tzij i quin bij.

¹² Niʼpa i que cojow in mac, quiqui bij chi are xin uponic, xin quilo coj tijin chu chapic kib chi tzij cuʼ juban chic winak pa rachoch i Dios, xak quin tijin chi qui chʼujersaxic. Xui-ri, n-katzij ti ile. N-ta xak in ʼanom pacha ile, mi ne pa rachoch i Dios, mi ne pa tak molbalʼib que i aj Israel, xak mi ne pa tak be re i tinimit.

¹³ Niʼpa i que cojow in mac-i, n-que tiqui ta chu ʼalijinsaxic we katzij in ʼanom pacha quiqui bij.

¹⁴ Xui-ri, ʼo i in ʼanom, chi n-cacaj ti ique, are iri: are quin coj u ʼij i Dios, chi xak i Dios que i katit ka mam, quin ʼano pacha cu bij i cʼacʼ cʼutunic, y n-ʼus ti cʼutunic-le, quiqui bij ique. Xui-ri, tupu quin coj i tzij-le, xak quin cojo ronojel niʼpa i tzʼibtal can rumal i mam Moises, xak cumal i ujer ajbil u tzij i Dios.

¹⁵ Xak cul in cʼux che, chi que walij chic i camnak, niʼpa i je ʼutz, xak niʼpa i ne te ʼutz. Queje ile quin coj yin, xak queje ile quiqui coj i je aj cojol in mac.

¹⁶ Rumal ile chi lic quin cojo, ʼax in ʼanom wi pen u ʼonquil wach u bim i Dios, man n-ta cu bij in cʼux chuwach ire, mi xak chiquiwach i winak.

¹⁷ Qʼuial junab n-in ta pa Jerusalen; teʼuri xin tzalij lok, wucʼam li jubiʼ mer tobal que i nibaʼib je wach aj Israel. Xak col in ya in sipon chuwach i Dios.

¹⁸ Nabe xin ʼan i rawasil pacha caka ʼan yoj oj aj Israel winak, ʼanbal chʼam che kib chuwach i Dios, teʼuri xin ʼe pa rachoch i Dios chu sujuxic in sipon chuwach i Dios. Are quin tijin ile chu ʼonquil, xin ʼiltaj cumal jujun aj Israel je petnak Asia. N-ta u qʼuial winak wuʼ pacha quiqui bij i aj cojol in mac-i, y n-ta xak winak quin tijin chi qui chʼujersaxic.

¹⁹ I xe in ʼilaw chila, je are ique ʼo u chac que cʼun chi chawach, cojbal re in mac, we kas ʼo in mac cacaj quiqui cojo.

²⁰ Y we ique n-cacaj taj, niʼpa i je ʼo chi, chiqui bij ʼuri wach in mac xqui riko are in ʼo wi chiquiwach i qui nucʼbal tʼisbal.

²¹ Xui in mac-i xin ʼan chiquiwach, co xin bij i tzij-i chique: “Woʼor quix tijin chu ʼonquil ʼatbal tzij chwij xa rumal quin cojo chi ca cʼun chic sak chiquiwach i camnak,” xin bij chiquiwach. (Queje u tzij i ma Páblo ile chuwach i gobernador, tobal rib xu ʼano.)

²² I gobernador, ma Félis, retaʼam usucʼ i cʼutunic chirij i Jesucrísto. Are xu ta i u tzij i ma Páblo, xu chʼobo chi n-coʼon ta tan i ʼatbal tzij. Xu bij chique: —Are ca cʼun i capitan, ma Lísias, teʼuri quin qʼuis u ʼonquil i ʼatbal tzij —xu bij chique.

⁶ Y na xew ta waꞌ, ma xutij ne uqꞌij kuꞌan che ri Rocho Dios pachaꞌ na jinta chi uqꞌij. Ruma kꞌu laꞌ, xqachapo y xqaj kaqꞌat tzij puwiꞌ e chirij ri tzijpixabꞌ qe riꞌoj.

⁷ »Pero ri comandante Lisias xumin ribꞌ chiqaxoꞌl kukꞌ ukꞌiyal soldados y xumaj paqaqꞌabꞌ.

⁸ Xebꞌutaq kꞌu ri ketzꞌaqaw uchiꞌ waꞌchi chaꞌ kepe na wara ukꞌ la. We xta kꞌu la uchiꞌ, kꞌa ekꞌuchiriꞌ ketaꞌmaj la lik qatzij janipa ri qabꞌiꞌim riꞌoj chirij» xchaꞌ.

⁹ Yey raj judiꞌabꞌ e kꞌo chiriꞌ xkijikibꞌaꞌ uwach che ri taqanel: «Lik qatzij; e uꞌanom janipa ri bꞌiꞌtal chirij» xechaꞌ.

¹⁰ Ekꞌu ri taqanel xuꞌan jun kꞌutubꞌal che ri Pablo chaꞌ kachꞌaꞌtik, y rire xujeq ubꞌiꞌxikil: «Lik wetaꞌam ukꞌiyal chi junabꞌ lal aj qꞌatal tzij re wa qatinamit; e uwariꞌche, rukꞌ ronoje nukꞌuꞌx kantoꞌbꞌej wibꞌ chiwach la.

¹¹ We kaꞌaj la katzꞌonobꞌej la puwiꞌ, ketaꞌmaj kꞌu la riꞌ: Riꞌin kꞌa e ne ukabꞌlajuj qꞌij riꞌ xinopon pa ri tinamit Jerusalem chaꞌ kanloqꞌnimaj uqꞌij ri Dios.

¹² Yey ri ketzꞌaqaw nuchiꞌ, rike na xinkiriq taj kinchꞌoꞌjin rukꞌ junoq, na xinkiriq tane e enuchꞌiꞌom rukꞌ chꞌaꞌoj rukꞌiyal winaq pa ri Rocho Dios, pa taq ri sinagogas o pa juna chik luwar re ri tinamit.

¹³ Jekꞌuriꞌlaꞌ, rike na utz taj kakijikibꞌaꞌ uwach chiwach la woꞌora janipa ri kitzꞌaqom chwij.

¹⁴ »Pero chiwach kꞌu la kanya wibꞌ chupa waꞌ: Qatzij, riꞌin in kꞌo chupa ri Bꞌe re ri Cristo, yey rike kakibꞌiꞌij che wa Bꞌe, xa e jun kꞌutunik re sokosoꞌnik. Pero chupa waꞌ wa Bꞌe, riꞌin e kanloqꞌnimaj ri Dios ke ri qatiꞌ-qamam re ojertan; ma nukojom janipa ri kꞌo chupa Rutzij Upixabꞌ ri Dios tzꞌibꞌital kan ruma ri Moisés y kuma ri qꞌalajisanelabꞌ.

¹⁵ Y jelaꞌ pachaꞌ rike, riꞌin lik nukubꞌam pan nukꞌuꞌx rukꞌ ri Dios. Ma wetaꞌam ri Dios kebꞌukꞌastajisaj na lo konoje ri ekaminaq; jelaꞌ kuꞌan chike ri e jusukꞌ y ri na e ta jusukꞌ.

¹⁶ Ruma taq kꞌu riꞌ waꞌ, lik kinok il riꞌin che ri nubꞌinik chaꞌ jelaꞌ kakꞌojiꞌ ri nunaꞌoj chi jusukꞌ chwach ri Dios y chikiwach ri tikawex.

¹⁷ »Yey ikꞌowinaq chi jujun junabꞌ riꞌin na in oponinaq ta pa ri nutinamit; kꞌa ekꞌu woꞌora xinoponik chaꞌ kiꞌnyaꞌa nuqasaꞌn re toꞌbꞌal ke ri nibꞌaꞌibꞌ y kiꞌnyaꞌa nuqasaꞌn chwa raltar re ri Dios.

¹⁸ »Echiriꞌ xineꞌkiriqa jujun aj judiꞌabꞌ e petinaq pa taq ri luwar re Asia, riꞌin e riꞌ kankꞌis ri nujosqꞌikil pa ri Rocho Dios. Na xinkiriq ta kꞌu chikixoꞌl rukꞌiyal winaq o kukꞌ ri ketukuk pa chꞌaꞌoj.

¹⁹ Ekꞌu wa e aj Asia, we kꞌo juna mak kakaj kakikoj chwij, lik e usukꞌ riꞌ e rike ri koꞌlkibꞌiꞌij waꞌ chiwach la.

²⁰ »Yey kꞌu wa e kꞌo wara, kibꞌiꞌij rike we kꞌo juna mak xkiriq chwij echiriꞌ xineꞌela chwach ri qꞌatbꞌal tzij ke raj judiꞌabꞌ.

²¹ Ri numak riꞌin chikiwach rike, e echiriꞌ xinkꞌojiꞌ chikixoꞌl, xinsikꞌin chikiwach konoje, jewaꞌ ximbꞌiꞌij: “Ralaq kaqꞌat alaq tzij panuwiꞌ waqꞌij xa ruma nukubꞌam pan nukꞌuꞌx che ri kꞌastajibꞌal ke ri ekaminaq”» xcha ri Pablo.

²² Ri taqanel Félix lik utom chi puwi wa Kꞌakꞌ Bꞌe re ri Jesús. E uwariꞌche echiriꞌ xuta waꞌ, xuchaqij ri kimolom wi kibꞌ, jewaꞌ xubꞌiꞌij chike: «Echiriꞌ kakꞌun ri comandante Lisias, kꞌa ekꞌuchiriꞌ kankꞌis retaꞌmaxik wa ikꞌamom lo chinuwach» xchaꞌ.

⁶ Y na xew ta waꞌ, ma xutij ne ukꞌij cuꞌan che ri Rocho Dios pachaꞌ na jinta chi ukꞌij. Ruma cꞌu laꞌ, xkachapo y xkaj cakꞌat tzij puwiꞌ e chirij ri tzijpixab ke riꞌoj.

⁷ »Pero ri comandante Lisias xumin rib chikaxoꞌl cucꞌ uqꞌuiyal soldados y xumaj pakakꞌab.

⁸ Xebutak cꞌu ri quetzꞌakaw uchiꞌ waꞌchi chaꞌ quepe na wara ucꞌ la. We xta cꞌu la uchiꞌ, cꞌa ecꞌuchiriꞌ quetaꞌmaj la lic katzij janipa ri kabiꞌim riꞌoj chirij» xchaꞌ.

⁹ Yey raj judiꞌab e cꞌo chiriꞌ xquijiquibaꞌ uwach che ri takanel: «Lic katzij; e uꞌanom janipa ri biꞌtal chirij» xechaꞌ.

¹⁰ Ecꞌu ri takanel xuꞌan jun cꞌutubal che ri Pablo chaꞌ cachꞌaꞌtic, y rire xujek ubiꞌxiquil: «Lic wetaꞌam uqꞌuiyal chi junab lal aj kꞌatal tzij re wa katinamit; e uwariꞌche, rucꞌ ronoje nucꞌuꞌx cantoꞌbej wib chiwach la.

¹¹ We caꞌaj la catzꞌonobej la puwiꞌ, quetaꞌmaj cꞌu la riꞌ: Riꞌin cꞌa e ne ucablajuj kꞌij riꞌ xinopon pa ri tinamit Jerusalem chaꞌ canlokꞌnimaj ukꞌij ri Dios.

¹² Yey ri quetzꞌakaw nuchiꞌ, rique na xinquirik taj quinchꞌoꞌjin rucꞌ junok, na xinquirik tane e enuchꞌiꞌom rucꞌ chꞌaꞌoj ruqꞌuiyal winak pa ri Rocho Dios, pa tak ri sinagogas o pa juna chic luwar re ri tinamit.

¹³ Jecꞌuriꞌlaꞌ, rique na utz taj caquijiquibaꞌ uwach chiwach la woꞌora janipa ri quitzꞌakom chwij.

¹⁴ »Pero chiwach cꞌu la canya wib chupa waꞌ: Katzij, riꞌin in cꞌo chupa ri Be re ri Cristo, yey rique caquibiꞌij che wa Be, xa e jun cꞌutunic re socosoꞌnic. Pero chupa waꞌ wa Be, riꞌin e canlokꞌnimaj ri Dios que ri katiꞌ-kamam re ojertan; ma nucojom janipa ri cꞌo chupa Rutzij Upixab ri Dios tzꞌibital can ruma ri Moisés y cuma ri kꞌalajisanelab.

¹⁵ Y jelaꞌ pachaꞌ rique, riꞌin lic nucubam pan nucꞌuꞌx rucꞌ ri Dios. Ma wetaꞌam ri Dios quebucꞌastajisaj na lo conoje ri ecaminak; jelaꞌ cuꞌan chique ri e jusucꞌ y ri na e ta jusucꞌ.

¹⁶ Ruma tak cꞌu riꞌ waꞌ, lic quinoc il riꞌin che ri nubinic chaꞌ jelaꞌ cacꞌojiꞌ ri nunaꞌoj chi jusucꞌ chwach ri Dios y chiquiwach ri ticawex.

¹⁷ »Yey icꞌowinak chi jujun junab riꞌin na in oponinak ta pa ri nutinamit; cꞌa ecꞌu woꞌora xinoponic chaꞌ quiꞌnyaꞌa nukasaꞌn re toꞌbal que ri nibaꞌib y quiꞌnyaꞌa nukasaꞌn chwa raltar re ri Dios.

¹⁸ »Echiriꞌ xineꞌquirika jujun aj judiꞌab e petinak pa tak ri luwar re Asia, riꞌin e riꞌ canqꞌuis ri nujoskꞌiquil pa ri Rocho Dios. Na xinquirik ta cꞌu chiquixoꞌl ruqꞌuiyal winak o cucꞌ ri quetucuc pa chꞌaꞌoj.

¹⁹ Ecꞌu wa e aj Asia, we cꞌo juna mac cacaj caquicoj chwij, lic e usucꞌ riꞌ e rique ri coꞌlquibiꞌij waꞌ chiwach la.

²⁰ »Yey cꞌu wa e cꞌo wara, quibiꞌij rique we cꞌo juna mac xquirik chwij echiriꞌ xineꞌela chwach ri kꞌatbal tzij que raj judiꞌab.

²¹ Ri numac riꞌin chiquiwach rique, e echiriꞌ xincꞌojiꞌ chiquixoꞌl, xinsiqꞌuin chiquiwach conoje, jewaꞌ ximbiꞌij: “Ralak cakꞌat alak tzij panuwiꞌ wakꞌij xa ruma nucubam pan nucꞌuꞌx che ri cꞌastajibal que ri ecaminak”» xcha ri Pablo.

²² Ri takanel Félix lic utom chi puwi wa Cꞌacꞌ Be re ri Jesús. E uwariꞌche echiriꞌ xuta waꞌ, xuchakij ri quimolom wi quib, jewaꞌ xubiꞌij chique: «Echiriꞌ cacꞌun ri comandante Lisias, cꞌa ecꞌuchiriꞌ canqꞌuis retaꞌmaxic wa icꞌamom lo chinuwach» xchaꞌ.