Hechos 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Tá na̱xi̱nu̱ co̱o qui̱ví coo víco̱ Pentecostés já na̱nditaca ndihi na̱ cúú cuéntá Jesús ndúu tútú na̱ ini in vehe.

²In cuití na̱xini jo̱ho na in a̱ níhi na̱quixi a chí indiví. Tá quia̱hva níhi xícó ta̱chi̱ ndeé quia̱hva já níhi a na̱quixi a. Ta já na̱xini jo̱ho ndihi na̱ ndúu coo vehe cán ña̱.

³A̱nda̱ já na̱xini na in ña̱ha ña̱ cáa tá quia̱hva cáa ñuhú i̱ta̱. A̱nda̱ já na̱ndita̱hnda̱ ña̱ na̱sandójó a̱ ji̱ni̱ in in na̱ cán.

⁴Ta na̱chutú nda̱a̱ ínima̱ ndihi na̱ cán xi̱hi̱n ínima̱ yi̱i̱ Ndióxi̱. Chí na̱casáhá na̱ndica̱ha̱n na̱ tu̱hun, ña̱ co̱ó na̱sa̱tia̱hva na jáchi̱ já na̱caja ínima̱ yi̱i̱ Ndióxi̱.

⁵Mé tiempo já na̱sanduu java na̱ Israel, na̱ cája cáhnu Ndióxi̱ ñuu Jerusalén cán. Mé na̱ Israel yóho na̱quixi na ndijáá ñuu ja̱tá ñuyíví.

⁶Tá na̱xini jo̱ho na̱ cán ña̱ níhi xójo̱ cúu cán já na̱casáhá ndítaca na. Joo tá na̱xi̱nu̱ na̱ nu̱ ndúu na̱ cúú cuéntá Jesús cán já na̱catóntó na̱ jáchi̱ na̱xini jo̱ho na cáha̱n na̱ cúú cuéntá Jesús cán mé tu̱hun cáha̱n na̱ va̱tí co̱ cúú ná na̱ ñuu na.

⁷Chí na̱catóntó ndiva̱ha na̱ cán já na̱casáhá ndítúhún xi̱hi̱n táhan na já cáchí na̱ já: —Tócó ndihi na̱ cúú cuéntá Jesús yóho cúú ná na̱ na̱quixi estado Galilea.

⁸Ndá cuéntá quéa̱ cáha̱n na̱ tu̱hun cáha̱n in in mí.

⁹Jáchi̱ sa̱ jíin sa̱ jíin ñuu na̱quixi mí. Java í na̱quixi nación Partia ta java í na̱quixi nación Media ta java í na̱quixi nación Elam ta java í na̱quixi nación Mesopotamia ta java í na̱quixi estado Judea ta java í na̱quixi estado Capadocia ta java í na̱quixi estado Ponto ta java í na̱quixi estado Asia

¹⁰ta java í na̱quixi estado Frigia ta java í na̱quixi estado Panfilia ta java í na̱quixi nación Egipto ta java í na̱quixi ñuu cuéntá Africa, ña̱ xícá chága̱ a̱ ju̱ú ga̱ ñuu Cirene. Ta ndúu java ña̱yivi na̱quixi ñuu Roma yóho. Ta java na̱ cán cúú ná na̱ na̱quixi chi̱chi Israel ta java na co̱ cúú ná na̱ na̱quixi chi̱chi Israel joo cája cáhnu na Ndióxi̱, mé a̱ cája cáhnu mí.

¹¹Ta sa̱ mé yóho ndúu java ña̱yivi na̱quixi nación Creta xi̱hi̱n nación Arabia. Ta xíni̱ jo̱ho ndihí cáha̱n na̱ cúú cuéntá Jesús yóho tu̱hun cáha̱n in in mí. Ta cáha̱n na̱ sa̱há ña̱ha xitúhún cája Ndióxi̱ xi̱hi̱n ná —cáchí ndihi na̱ sánde̱hé cán.

¹²Ta chí co̱ xíni̱ na̱ ndúu sánde̱hé cán ndía̱ ca̱hán na̱ sa̱há na̱ cúú cuéntá Jesús cán. Jáchi̱ na̱catóntó ndiva̱ha na ja̱nda̱ ndáca̱ tu̱hún táhan mé ná ndúu na já cáchí na̱ já: —Ndía̱ cúni̱ cachi ña̱ cája na̱ yóho.

¹³Joo java na̱ ndúu cán na̱casáhá sácu̱ ndaa ñahá na̱ já cáchí na̱ já: —Na̱ xíhi va cúú na̱ yóho.

¹⁴A̱nda̱ já na̱candichi Pedro xi̱hi̱n ndíhu̱xu̱ in ga̱ na̱ apóstol cán já na̱casáhá cáha̱n cóhó da̱ xi̱hi̱n tócó ndihi na̱ cán já cáchí da̱ já: —Cuni jo̱ho va̱ha ndó ña̱ cáha̱n i̱ xi̱hi̱n ndó, ña̱yivi Israel, na̱ estado Judea xi̱hín ndihi ndó na̱ tóho̱ ndúu ñuu Jerusalén viti.

¹⁵Mé ndó cáhán ndo̱ ña̱ na̱xi̱ni tócó ndihi ña̱yivi ndúu yóho. Joo co̱ cúú ná na̱ na̱xi̱ni jáchi̱ ja̱cá ca̱a i̱n naha va que̱á.

¹⁶Ña̱ cája na̱ yóho quéa̱ na̱cachi da̱ naní Joel sa̱nahá tá na̱ca̱ha̱n da̱ xi̱hín ña̱yivi ña̱ ndítahan coo. Mé da̱ cán cúú da̱ na̱cachi ña̱ cáchí Ndióxi̱ coo já na̱cachi da já:

¹⁷Tá sa̱ na̱cayati qui̱ví ndihi sa̱ha̱ ñuyíví yóho já cáchí Ndióxi̱ já: “Chindahá i̱ ínima̱ yi̱i̱ mí i̱ cañuhu a ini tócó ndihi ña̱yivi. Ta tócó ndihi ja̱hyi yií ndo̱ xi̱hín ja̱hyi jíhí ndo̱ ca̱xi tu̱hun na xi̱hi̱n ndó tu̱hun ca̱ha̱n i̱ xi̱hi̱n ná. Ta na̱ tacú cuni ndímáhnú na̱ ña̱ha na̱ha̱ i̱ nu̱ ná. Ta na̱ yatá quixi sa̱ni nu̱ ná caja i̱.

¹⁸Ta mé tiempo já chindahá i̱ ínima̱ yi̱i̱ mí i̱ ña̱ ná cañuhu a ini na̱ cája chúun cuéntá mí i̱, á cúú ná ta̱a á cúú ná ñáha̱. Ta caja i̱ ña̱ ná ca̱ha̱n na̱ sa̱há i̱ nu̱ú ña̱yivi.

¹⁹Ta cua̱há ndiva̱ha ña̱ náhnu caja i̱ indiví xi̱hín ñuyíví ta cuni ña̱yivi ña̱. Cuni na ni̱i̱ xi̱hi̱n ñúhu̱ cáyi̱ xi̱hín ñi̱hma̱ ña̱ ndindita tátu̱hun vi̱co̱ núhú.

²⁰Ta canaá nu̱ú ca̱ndii ta ndicuáhá ni̱i̱ nu̱ú yo̱o̱. Ña̱ yóho cacuu ña̱ ya̱ha tá sa̱ na̱cayati qui̱vi̱ xi̱nu̱ ye̱he̱, mé á cúú xitoho na caja vií i̱ sa̱há ña̱yivi ñuyíví. Mé qui̱vi̱ cán cacuu a in qui̱vi̱ cáhnu ndiva̱ha.

²¹Joo ca̱cu ndaa ínima̱ tócó ndihi na̱ ná ndica̱hán qui̱ví i̱”, na̱cachi Ndióxi̱ ini libro na̱ca̱hyí Joel sa̱nahá —na̱cachi Pedro.

²²A̱nda̱ já na̱cachi tucu Pedro já: —Cuni jo̱ho va̱ha ndó tu̱hun cáha̱n i̱ xi̱hi̱n ndó, na̱ Israel. Jáchi̱ cáha̱n i̱ sa̱ha̱ Jesús, mé a̱ na̱quixi ñuu Nazaret. Jáchi̱ na̱tahan ini Ndióxi̱ xi̱hi̱n tócó ndihi ña̱ha na̱caja mé Jesús. Ta na̱xini xi̱hín nu̱u̱ ndó ña̱ náhnu xi̱hín ña̱ xitúhún na̱caja mé á nu̱ ndo̱ xi̱hi̱n ndée̱ na̱sa̱ha̱n Ndióxi̱ nu̱ a̱. Ta sa̱ cánda̱a̱ va̱ha ini mé ndó ña̱ yóho.

²³Joo tá na̱tiin ndó Jesús já na̱jáxi̱nu̱ co̱o ndó ña̱ na̱sacu ini Ndióxi̱ coo sa̱nahá ndiva̱ha. Ta mé ndó na̱ndiquia̱hva ndó Jesús ndáha̱ ta̱a quini. Ta na̱caja ndó ña̱ ná cata caa na Jesús ndi̱ca crúxu̱.

²⁴Joo na̱jánditacu Ndióxi̱ Jesús já ná a̱ cóo a nu̱ ndóho ini na̱ sa̱ na̱xi̱hi̱ jáchi̱ ni in ña̱ha a̱ cúu caja ña̱ ná coo Jesucristo nu̱ ndúu na̱ sa̱ na̱xi̱hi̱.

²⁵Sa̱nahá ndiva̱ha na̱ca̱hyí rey David sa̱há Jesús já na̱cachi da já: Xíni̱ va̱ha i̱ ña̱ níí tiempo íin ndó xitoho i̱, xi̱hín i̱, ta íin ndó xoo cuáha i̱ chíndeé ndó ye̱he̱ sa̱há ña̱ cán quéa̱ co̱ yíhví toho i̱.

²⁶Sa̱há ña̱ cán quéa̱ na̱caji̱i̱ ndiva̱ha ini i̱, ta na̱ca̱ha̱n vatá ndiva̱ha i̱. Jáchi̱ va̱tí ná quivi i̱ cacuu u̱ ndi̱i joo coo va̱ha ini i̱.

²⁷Jáchi̱ caja ndó ña̱ ná nditacu tucu u̱ já ná a̱ cándo̱o nahá ínima̱ i̱ nu̱ ndúu ínima̱ ndi̱i. Ta ni a̱ quiáhva toho ndó ña̱ma̱ni̱ ta̱hyi̱ yiquí cu̱ñu i̱ jáchi̱ cúú u̱ ja̱hyi máni̱ ndo̱.

²⁸Na̱jána̱ha̱ ndó nu̱ú i̱ ndaja caja i̱ ña̱ cúni̱ ndo̱. Jáchutú nda̱a̱ ndó ínima̱ i̱ xi̱hín ña̱ cáji̱i̱ ini i̱ jáchi̱ já íin va ndó xi̱hín i̱, na̱ca̱hyí David sa̱nahá ndiva̱ha —cáchí Pedro xi̱hín na̱ ndúu cán.

²⁹A̱nda̱ já na̱cachi tucu Pedro já xi̱hi̱n ná: —Cande̱hé ndo̱, ñani i̱ ná ndicani i̱ nu̱ ndo̱ ña̱ cúni̱ cachi ña̱ yóho. Sa̱ cánda̱a̱ cáxí iní ña̱ sa̱ na̱xi̱hi̱ David, da̱ na̱sa̱cuu tásáhnu jícó yo̱. Ta na̱jándu̱xu̱ na̱ da̱ ta íin yi̱i̱ va nu̱ú na̱jándu̱xu̱ na̱ da̱.

³⁰Na̱cachi David ña̱ yóho jáchi̱ na̱sa̱cuu da profeta. Jáchi̱ mé Ndióxi̱ quéa̱ na̱sa̱ha̱n tu̱hun a nu̱ dá ta na̱cachi a xi̱hi̱n dá ña̱ quixi Jesucristo chi̱chi mé dá ta na̱cachi a ña̱ cacomí mé Jesucristo cán cuéntá sa̱há ña̱yivi Israel.

³¹Sa̱ na̱canda̱a̱ ini David ña̱ caja Ndióxi̱ chí nu̱u̱ sa̱há ña̱ cán quéa̱ na̱cachi da xi̱hín ña̱yivi ña̱ nditacu tucu Jesús tá na̱ndihi quivi a. Ta na̱ca̱xi tu̱hun David nu̱ ná ña̱ a̱ jándicoo toho Ndióxi̱ ínima̱ Jesús nu̱ ndúu ínima̱ ndi̱i ta ni a̱ quiáhva toho mé á ña̱ma̱ni̱ ta̱hyi̱ yiquí cu̱ñu mé Jesús cán.

³²Ta viti cánda̱a̱ iní ña̱ na̱xi̱nu̱ tu̱hun na̱ca̱hyí David jáchi̱ na̱xini tócó ndihí ña̱ na̱jánditacu Ndióxi̱ Jesús.

³³Ta na̱jándindita cáhnu ndiva̱ha Ndióxi̱ Jesús ta na̱sacu a ña̱ xoo cuáha mé á. Ta na̱sa̱ha̱n Ndióxi̱ ínima̱ yi̱i̱ mé á nu̱ Jesús jáchi̱ ña̱ yóho cúú tu̱hun na̱sa̱ha̱n Ndióxi̱ sa̱nahá. Ta tócó ndihi ña̱ na̱xini ndó xi̱hín nu̱u̱ ndo̱ ta na̱xini jo̱ho ndó yóho cúú á ña̱ na̱quixi cuéntá Ndióxi̱.

³⁴Ta sa̱ xíni̱ yo̱ ña̱ co̱ cáha̱n David sa̱ha̱ mé dá jáchi̱ a̱ ju̱ú David cúú da̱ na̱ndaa indiví, va̱ha. Sa̱ mé David cúú dá da̱ na̱cachi tu̱hun yóho: Na̱cachi Ndióxi̱ xi̱hín xitoho i̱: “Naha xoo cuáha ji̱ín i̱ cacoún,

³⁵ja̱nda̱ quia̱hva ná cacu u̱ na̱ cándají yo̱hó ti̱xi sa̱hu̱n”, na̱cachi Ndióxi̱ —já na̱ca̱hyí David sa̱nahá.

³⁶A̱nda̱ já na̱cachi tucu Pedro já: —Ña̱ cán quéa̱ cúni̱ ña̱ ná canda̱a̱ ini tócó ndihi ndó ña̱ cáha̱n i̱ xi̱hi̱n ndó, na̱ Israel. Mé Jesús, mé a̱ na̱cata caa ndó ndi̱ca crúxu̱ na̱ndaja Ndióxi̱ ña̱ ná nduu a xitoho ña̱yivi. Ta na̱ndaja Ndióxi̱ ña̱ ná nduu a ña̱ na̱chindahá mé á cacomí cuéntá sa̱há ña̱yivi —na̱cachi Pedro xi̱hín na̱ ndúu cán.

³⁷Tá na̱xini jo̱ho na̱ cán ña̱ na̱cachi Pedro xi̱hi̱n ná i̱vi̱ la̱á na̱ta̱hvi̱ ini na já na̱casáhá ndáca̱ tu̱hún na̱ Pedro xi̱hi̱n java ga̱ na̱ apóstol cán já cáchí na̱ já xi̱hi̱n ná: —Ndía̱ ndítahan caja nde̱, ñani, na̱ cúú cuéntá Jesús.

³⁸A̱nda̱ já na̱nducú ñehe Pedro tu̱hun nu̱ ná já cáchí da̱ já xi̱hi̱n ná: —Xíní ñúhú ndicó co̱o ini ndó ta jándicoo ndó cua̱chi cája ndó ta candúta̱ ndó cuéntá Jesucristo já quéa̱ ná caja cáhnu ini Ndióxi̱ sa̱há cua̱chi ndó ta já ñe̱he̱ táhvi̱ ndó quia̱hva Ndióxi̱ ínima̱ yi̱i̱ mé á nu̱ ndo̱.

³⁹Jáchi̱ na̱sa̱ha̱n Ndióxi̱ tu̱hun a caja ña̱ jáchutú nda̱a̱ ínima̱ ndo̱ xi̱hi̱n ínima̱ yi̱i̱ mé á ta quia̱hva já caja ri a xi̱hín ja̱hyi ndó ta jári xi̱hín na̱ tóho̱, na̱ ndúu xícá. Jáchi̱ já caja mé á xi̱hín ña̱yivi na̱ca̱xi mé á —na̱cachi Pedro xi̱hi̱n ná.

⁴⁰Ta cua̱há ndiva̱ha java ga̱ tu̱hun na̱ca̱ha̱n Pedro xi̱hi̱n ná ta já na̱jáca̱ha̱n da̱ na̱ já na̱cachi da já xi̱hi̱n ná: —Candeé ini ndó Jesús já ná jáca̱cu a ndo̱hó já ná a̱ cúhu̱n ndó indayá nu̱ú cu̱hu̱n ña̱yivi cája cua̱chi —na̱cachi Pedro xi̱hi̱n ná.

⁴¹Cua̱há ña̱yivi na̱ndiquehe va̱ha na tu̱hun na̱ca̱ha̱n Pedro ta na̱candeé ini na Jesús. Ta mé qui̱vi̱ já na̱candúta̱ tátu̱hun u̱ni̱ mil ña̱yivi já na̱ndi̱hvi na íchi̱ cuéntá Jesús. Ta na̱ndique táhan na̱ cán xi̱hín java ga̱ na̱ cúú cuéntá Jesús.

⁴²Ta ndinuhu ini na jácuaha na ña̱ jána̱ha̱ na̱ apóstol nu̱ ná. Ta cándúsa táhan tócó ndihi na ta ndítútú na̱ xíca̱ ta̱hví na̱ nu̱ Ndióxi̱. Ta níí tiempo sá taca na ndicahnda java táhan na pan cuxu na.

⁴³Mé tiempo já na̱sa̱ha̱n Ndióxi̱ ña̱ma̱ni̱ nu̱ú na̱ apóstol cán ña̱ ná cuu caja na cua̱há ndiva̱ha ña̱ha xitúhún xi̱hín cua̱há ña̱ náhnu ndiva̱ha ta chí cátóntó tócó ndihi ña̱yivi tá xíní na̱ ña̱ yóho.

⁴⁴Ta tócó ndihi na̱ cúú cuéntá Jesús cán in na̱nduu ndihi na ta ndícahnda java ña̱ha nu̱ táhan na.

⁴⁵Ta jícó na̱ ña̱ha cómí na̱ ta já ndícahnda na jiu̱hún na̱ nu̱ú na̱ ndíma̱ní ña̱ha nu̱u̱.

⁴⁶Ta ndijáá níí qui̱vi̱ ndítútú na̱ cája cáhnu na Ndióxi̱ veñu̱hu cáhnu ndáca̱a̱n ñuu Jerusalén cán. Ta tá ndíque táhan na vehe já ndícahnda java táhan na pan cuxu na ta cávatá ndiva̱ha xi̱hi̱n táhan na cája na já. Ta ni in na co̱ ndíñehe jícó mé.

⁴⁷Na̱caja cáhnu na Ndióxi̱ ta tócó ndihi ña̱yivi ndúu ñuu Jerusalén íin va̱ha ini na xi̱hín na̱ cán. Ta nini qui̱vi̱ na̱caja Ndióxi̱ ña̱ na̱ndicua̱há na̱ cúú cuéntá Jesús, mé na̱ jáca̱cu ndaa Ndióxi̱ ínima̱.