Hechos 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Janua ana betsatian judiobu Pentecostés nawai besiaibun Jesús ikunwainbu dasibi janus ichabun

²jawaida nai anua jawen bana niwe kushipa bei danka imis keska xunku ibidani janu maniabu anu kedun kedun ikin

³jaskakin Jesús ikunwainbu tibi chi jede keska xawa akeakei jatu mamaki madatamea ji ibauni jatuki jikia akeakeaya

⁴jaskakin dasibi jatu achimakin keyuaya jaska janchatidubumabiaken nawa betsa betsapabun jancha tibiwen Diosun Yushin Pepatun yuimakin jatu janchamakin taewaya

⁵mai pakea betsa betsapa anua judiobu Jerusalén anu jiwei benibu jiweabun jabu pepakin Diosun jancha chibankin menekin jeneisbuma

⁶jawen bana ninkabidani janu midima ichaxun ikunwainbu anu jancha betsa betsapawen janchabaunaibun jadakidi shinantima jatu wa akeakeabu juni tibitun mai kesua anua jabun janchawen janchaibu ninkai jaskawen janchaisbuma ninkai

⁷jaskakainmaibu ninkai e iki teku iake iakei janchanamebaunkin yuikin: —Nadan, ¿Galilea anuabumamen, na jaska dasibi janchabaunkanaidan?

⁸Nukun jancha tibiwen janchabaunaibubin! ¿Nun ninkai? ¿Jaskai ja junibu jaska janchakanimenkain?

⁹Na nun nukubudan, Partia anuabu inun, Media anubu inun, Elam anuabu inun, Mesopotamia anuabu inun, Judea anuabu inun, Capadocia anuabu inun, Ponto anuabu inun, mai pakea Asia anuabu inun,

¹⁰Frigia anuabu inun, Panfilia anubu inun, Egipto anuabu inun, Libia mai pakea Cirene dapi anuabu inun, Roma anuabu inun,

¹¹betsa judio kainibu inun, betsabun judiobun beya chibanmisbu inun, Creta anuabu inun, Arabia anuabu beimabu nukun jancha tibiwen Diosun kushipawen e imatikidi yuiaibu nun jatu ninkaii— iake iakeaibun

¹²jaskaibu jatu ninkatan dasibi jadakidi shinantima e iki keyutan yuka iki: —Na eska chanii janchaibudan, ¿jawamen?— ikaibun

¹³jakia juni betsabun jawa shinanmadi jatu kaxe wakin ikaibukidi jatu yuikin: —Paean daki janchai ikanikika!— ikaibun

¹⁴janua Jesúsun 11 tsuma kushipaya betsabube Pedron jatun jancha ninkai benia nixun jui kushipawen jatu yuikin: —Judiobu inun dasibi Jerusalén anu jiweabuun, eska en matu yuiai ninka peidawakanwen, jaska man ninkai janchaidan.

¹⁵Na yudabudan, paeanbumaki, jaska man shinankin ikunwain keskamadan. Jaskai e iskaun badi keyadiamabiaken 9:00 badi paentidubumaki.

¹⁶Jakia natian jaska taxniai ninkakin man uiainan, jaska bebunkidi Dios yubakanixun akikiki. Jawen jancha yuixunika Joel Diosun jatu yuimakin:

¹⁷Dios chanii: ‘Ma badi jawen jenei kaya en Yushin Pepa yudabu anu en jatu yunua jatuki dasiken matun juni bakebu inun matun ainbu bakebun ekidi yusiainbun bedunanbu uxa keskaxun dami betsa betsapa uiainbun anibubu uxa ekidi namadiaxankanikiki.

¹⁸Jabiatiandi en tsumabu junibu inun ainbu en Yushin en jatu inan ekidi yusinbaunxankanikiki.

¹⁹Jaska inun, nai anua jawen e imai kushipa wakin mai anuadi dami betsa betsapadi en waxanaii. Jimi jabamakinan, chi wakinan, basnun bai kua jawen kuin keska wakin en jatu uinmaxanaii.

²⁰En bake kushipajaidai chaxakapai xanen ibui jua kemadiamaken xaba betsa betsapaxanikiki. Ja jaskaitian badi ana chaxama meshu wakin inun uxe ana chaxamadi jimi keska ixanikiki.

²¹Januxun tsuabunda: En Xanen Ibu Yavé Dios kushipaki, ikin ea yuiaibu jabu besti paxakin jatun jiwea ikibi ika bixankanikiki’, aka Joelin yusintan nuku kenexuniki, iwanan, Pedron ana jatu yuikin:

²²—Israelbuun, en matu yuiai ea ninkakanwen. Matunan, man unanjaidaii. Jesús Nazaret anua jua Diosun kushipa watan jawen e imati inun jawen unanti wamakin dami itimaska tsuan atiduma wamakin jawen kushipa matu uinmakin Diosun ama akeakekin xabakabi matu uinmakubainimaki.

²³Jaska yubakani Diosun ja juniwen abainai shinanma jaska wai bextenun, iwanan, matun jawen bake danankin jaki yubakatan jatu achimatan tenanmanun, iwanan, juni chakabu man jatu mastamaimaki.

²⁴Jakia mawabiaken Jesús Diosun ana bestenwainmaki, mawamamistun isin tenemakin bashitidubia jawen jiwea yabutiduma binumakinan.

²⁵Jamen xanen ibujaida Davidin Jesús iki kaikidi yuikin: ‘En xanen ibun ea mekekin en yusiudi jawen kushipawen ea medabewai en uinkubainaya jawa tsuan ea maematan binuntidumaki.

²⁶Jaskawen taea juinti shinan chankain benimai nawakin kenwankin jeneama en jiwea dasibiwen ikunwain jawa dateama en ikunkainxanaii.

²⁷Mawabu janu dasibi bumisbu anu ka min medibi min tsumapan yuda maiwati tanpe anu jau dakai chapuyamaxanun min nemaxanaii.

²⁸Jaska watan janu jiwekuin kati bai ea unanmatan mia anu jiwemakin min ea benimawakubainxanaii’, akin nuku kenexuniki— iwanan, ana Pedron jatu yuikin:

²⁹—En betsabu inun en puibuun, nukun xenipabu kayabi Davidkidi chanima xabakabi matu yuinun ea ninkakanwen. David mawa janu maiwakin jawen yuda jananibu nun uinmiski.

³⁰Jabias David Diosun jancha yuixunika jawen yudakidi jamebi janchama jakia jawen baba betsa kaindiamakidi Diosun yubakin xanen ibujaida ixanai unanmakin yuimaniki.

³¹Diosun jancha yuixunika David bebunkidi Diosun shinanmakin Mesíaskidi janchamakin jatu yuimakin: “Mesías Cristo mawa jawen yuda chapuama inun mawabu anu jawen yuda bashiama ana bestenwanxanikiki”, ika jakidi janchaniki.

³²Jamen Diosun jaskakidi janchamanidan, ja Jesús mawa bestenwanshina chanima ibubis dasibibun nun uinkubainshina nun unankanaii.

³³Januxun ana bestenwantan Dios jau jabe xanen ibunun, iwanan, jawen yusiudi tsauntan jaska yubakani jawen Yushin Pepa jawen Epan Jesús inan jatun nuku inan akeakekin nuku kushipa waikiki, na jabia ninkakin man uiainan.

³⁴Jaska inun, Davidkidima tsuada nai anu kaxanaikidi jabias Davidin jamebi yuikin: ‘Diosun en xanen ibu yuikin: En yusiudi tsauyuwe.

³⁵Janu miki sinataibu en mia yamawaxundiama ebe xanen ibukin manayuwe’, aka jatu yusintan nuku kenexuniki— iwanan,

³⁶—Israelbu dasibibuun, chanima matu xabakabi shinanmanun ea ninkakanwen. Ja jabias Jesús cruz anu man jatu mastamaimadan, Diosun bestenwantan nukun Xanen Ibu kayabi nuku waxuinmaki, jawen Mesías Cristodan— jatu wa

³⁷janu jatube ichabun ninkai ¿jaskatimen? ika jatun juinti nishmajaidai bika tenekin shinankin Pedro inun Jesúsun tsuma kushipaya betsabu jatu yukakin: —Betsabuun, ¿jaskatan nun jaskatidumen?— jatu wabu

³⁸Pedron jatu kemakin: —Dios man chibankatsis ikaidan, matun chakabu jenetan matun shinan betsa watan Dios anu bedikanwen. Jaska watan man Jesucristo ikunwainwen taexun jawen kenawen matu tibi nun matu nashimaya matun chakabu buatan jawen Yushin Pepa Diosun matu inan man bixanaidan.

³⁹Nukuna bestimaki. Jaska Dios yubakani ma akikiki. Matu dasibibu inun matun bakebu inun chaijaida manibaunabu nukun Xanen Ibu Dios jaska matukidi yubakaidan, dasibi matukidi iniki. Jaskawen taexun jatida jawenabu wakin katukin kenakatsis ikikiki— iwanan,

⁴⁰ana jancha ichapawen Jesús mekenankidi xabakabi yusin pewatan Pedron jatu yusinkin yuikin: —Ja yudabu jiwe chakabu anua paxadikanwen— jatu wa

⁴¹januxun ja xabatian jawen jancha ninkakin ikunwankin shinan betsa waibu 3,000 yudabu nashimabu jati ana jatubetan ikunwain jatuki dasinibukiaki.

⁴²Januxun Jesúsun kushipayabun jatu yusiainbu jabun jatun yusian tapinkin chintuanma jawada jatun jamapai paxkai medabenain inun, ichaxun jatubetan Jesús jatu mawaxunima shinankin misi pikin inun, jabubetan Dios kushipa yukakubainibukiaki.

⁴³Jabiatiandi Jesúsun tsuma kushipayabun Diosun jatuwen dami atimaska ichapa akin jawen unanmati betsa betsapa akaibun dasibi Jerusalén anu jiweabu e iki jabaa ikubainaibun

⁴⁴ikunwainbu dasibi paxkama medabenain jatun jamapai yaushiama inananankin

⁴⁵betsabu mabuyabu inun baiyabun jawen pei bikatsi juni betsabu inantan jawen pei bitan ikunwainbu nuitapaibu jawa jayama pei jatu paxkaxunkin medabewakubainibukiaki.

⁴⁶Janua xaba tibi Templo jemaintin anuxun kushipa yukakin jiwe anuxundi ichaxun jawa chintuanma shinan chankanbetanan jatubetan pikin Jesús jatu mawaxunima shinanmati misi pikin

⁴⁷Dios kenwainbun dasibibun jatukidi pe shinankubainaibun xaba tibi betsabun Jesús ikunwain yuda kaian ichai jatuki dasiaibu Diosun jawenabu jatu wakin kenakubainikiaki, jabu jiwei mekekatsi ikaibudan.