HECHOS 1:5-7

⁵Janch ɨdøꞌøn jaꞌ ku ja Juan ttuktanøbejty ja nøø, jøts tsojk meets nøjkx nduktatøkɨdɨ ja Espíritu Santo.

⁶Xjats ku ja pyabøjkpɨtøjk jam wyɨnaty tø tmɨnabya̱a̱dyɨdɨ ja wyɨndsøn, wɨnets ja tyiktøødøø jøts ja tnɨmaadyøø: ―Wɨndsøn, ¿ya̱mnɨm ɨnet ja Israelɨt ka̱jp xmoꞌot jøts ja køꞌøm jadɨgojk ñayꞌanaꞌamɨyɨdɨt, jøts ja køꞌøm ña̱nkyutujkxɨyɨdɨt pønɨ ti ja køꞌøm tyunwa̱ndɨp?

⁷Xjats ja Jesús yꞌadsøøy jøts ja wya̱a̱ñ: ―Kaꞌ meets ja mba̱a̱tꞌatyɨ jøts meets ja xnɨja̱wɨt pønɨ juunɨ ja Dios Teety jadeꞌen yꞌadøꞌøtst, pønɨ ti xøøw pønɨ ti poꞌ ja jadeꞌen ttunwa̱ꞌa̱nt. Jaꞌ ja tuꞌugyɨ tnɨja̱ꞌwɨp, jøts jaꞌ tuꞌugyɨ tmøøtꞌa̱jtp ja møkꞌa̱jtɨn jøts ja jadeꞌen ttuꞌunt.