Hechos 13:46-52

⁴⁶Orzeꞌ Baly nu Bernabee fert zir mnii dey. Orzeꞌ na dey: ―Rlagy ñi nu nu loga la shaal de̱ riidz ni Ñgyoozh lo de ru. Tees como de ru rzu chu der de riidz zeꞌ, nunu como de ru ricy der ub ru par mbecy nu wangyap nu cui mbañ tub la, orzeꞌ de̱ ya̱ zaan de̱ de ru. Na cha̱ de̱ lat de mbecy nu walab mbecy Israeel,

⁴⁷gun ni bicy Shuaan den mandaar ornu nam: Ya̱ bicya̱ nu nar gal nu na tub yaa par nu zac de mbecy nu walab mbecy Israeel. Ya̱ gyicya̱ nu dela mbecy nu yuꞌ gal nu blaazhaꞌ zir zeꞌ nu zet ni gyishlombecy cui mbañ dey nu nac ru, nam ―na dey.

⁴⁸Na ornu güeñ de mbecy nu walab mbecy Israeel de riidz zeꞌ, orzeꞌ tonaꞌ la bet lagy dey, nunu bicy zily dey riidz ni Ñgyoozh. Nunu de yu nu bi pcui Ñgyoozh par nu cui mbañ yu tub la, brugyiꞌ ricy cup dey consuel lom.

⁴⁹Orzeꞌ brush las riidz ni Ñgyoozh par dutuub la lugaar gaab ga ni Antioquía ni Pisidia.

⁵⁰Tees de mbecy Israeel pchaꞌ dey ic de mbecy zub lo gyedz zeꞌ, nunu pchaꞌ dey ic de biñ mñaa lily nu walab mbecy Israeel, de biñ mñaa nu driib zily Ñgyoozh. Orzeꞌ de mbecy zeꞌ brugyiꞌ ricy dey nu rsheed zi dey Baly nu Bernabee. Orzeꞌ pcyuu nu dey yu lo de yu ni dey.

⁵¹Orzeꞌ Baly nu Bernabee bdib dey gyid lab yu par tub muesht nu gabe nu wangash de mbecy gyedz zeꞌ dey. Orzeꞌ bruu dey lugaar zeꞌ, zay tub gyedz nu la Iconio.

⁵²Tees de mbecy Antioquía ni Pisidia nu ricy cup consuel lo Crisht tonaꞌ la zu cyit lagy dey, nunu riib ic zaꞌ la Espiriit Yon ni Ñgyoozh nañ lardoo dey.