Hechos 13:30-49

³⁰Yooz Ejpzti Jesusa ticziquiztan jacatatskatchic̈ha.

³¹Nekztanaqui tsjii kjaz̈ majquiztan Jesusaqui niiz̈ mazinacz̈quiz tjontjonzic̈ha. Niiz̈ mazinacaqui niiz̈tan chica ojkchic̈ha Galilea yokquiztan Jerusalén watja. Niz̈aza ninacaqui anziqui z̈oñinacz̈quiz niiz̈ puntuquiztan tiraz̈ parlic̈ha.

³²‛Jaziqui Yoozqui uc̈hum tuquita atchi ejpnacz̈quiz taku ecchic̈ha. Wejrnacqui nii cumplista takunaca zjijcchinc̈ha anc̈hucaquiz mazjapa. Jalla nii zuma mazta anc̈hucaquiz parluc̈ha. Yoozqui uc̈hum ejpnacz̈quiz taku ecchic̈ha.

³³Uc̈humqui nii tuquita atchi ejpnacz̈quiztan tjonchinc̈ha. Uc̈humnacalta Yoozqui niiz̈ ecta taku cumplissic̈ha, Jesusa jacatatskatchiqui, nii. Niz̈aza niz̈tapacha segundo salmuquiz cjijrtatac̈ha tuz̈ cjican: “Amqui wejt maatimc̈ha. Tonj tjuñi z̈ejtkatchinc̈ha”.

³⁴Niz̈aza Yooz Ejpqui niiz̈ jacatatz puntuquiztan chiichic̈ha, tuz̈ cjican: “Ticziquiztan am curpu jacatatskatac̈ha, ana wira sipulturquiz mojkzjapa”. Jalla nii puntuquiztan chiic̈ha cjijrta Yooz takuqui, tuz̈ cjican: “Yoozqui Davidz̈quiz taku ecchic̈ha, jalla nii tawk jaru anc̈hucaquiz zuma favora paasac̈ha Yoozqui”.

³⁵Jalla nuz̈pan chiic̈ha tsjii salmuquiziqui, tuz̈ cjican: “Am zuma sirwiñiz̈ curpu ana ecta cjesac̈ha mokajo”.

³⁶Jalla nuz̈ werarac̈ha. Davidqui niiz̈ timpu z̈ejlñi z̈oñinacz̈quiz yanapchic̈ha, jaknuz̈t Yooz mantic̈haja, jalla niicama. Nekztanaqui Davidqui ticzic̈ha niiz̈ ejpnaca irata. Nekztan niiz̈ ticzi curpu tjattiquiztan mojkchic̈ha.

³⁷Jesucristuzti Yooziz̈ jacatatskatchic̈ha. Niiz̈ curpuzti ana mojkchic̈ha.

³⁸Jilanaca, anc̈hucqui tuz̈ ziz waquizic̈ha. Jesusiz̈ cjen ujnaca pertuntaz̈ cjesac̈ha. Jalla nii zuma taku anc̈hucaquiz parluc̈ha.

³⁹Moisés mantita lii jaru kamcanami, ana pertunta cjisñi atc̈ha. Jesusiz̈quiz macjatchi cjenaqui jalla niz̈takaz tjapa ujnacami pertuntaz̈ cjesac̈ha.

⁴⁰Jaziqui anc̈hucqui cwit'aza, ana nii tuquita cjijrta casticu sufrisjapa. Tuquitan Yooz taku parliñi profetanacaqui cjijrchic̈ha, tuz̈ cjican:

⁴¹“Nonz̈na, Yooztan quintrazñinaca, azzucaz̈ anc̈hucqui, niz̈aza chjatkatchucaz̈ anc̈hucqui. Wejrqui Yooz Ejptc̈ha. Anc̈huca kamz timpuquiz wali pajk obranaca paachinc̈ha. Jalla nuz̈ anc̈hucaquiz quint'ichi cjenami anc̈hucqui ana criyasac̈ha. Jalla niz̈tiquiztan ispantichi cjisna, niz̈aza casticta cjequic̈ha, anc̈hucqui Yooz quintra tjasñinaca”.

⁴²Nuz̈ chiiz̈cu Pabluqui niiz̈ mazinacz̈tan judionacz̈ ajcz kjuyquiztan ulanchic̈ha. Yekjap ana judionacz̈ ejpchiz z̈oñinaca z̈elatc̈ha. Jalla ninacaqui roct'azzic̈ha, tuz̈ cjican: —Tii jar jeejz tjuñquiz tii puntunacquiztan wejtnacaquiz wilta tjaaznalla.

⁴³Nii ajcz kjuyquiz nii cultu z̈erz̈cu walja judío z̈oñinaca, niz̈aza judioz̈ cuzturumpi paañinaca, jalla ninacaqui Pabluz̈tan Bernabez̈tan chica apzic̈ha. Nii pucultanaqui zuma taku tjaachic̈ha, tuz̈ cjican: —Anc̈hucqui Yoozquin tjapa kuztanz̈ cjee. Niz̈aza tjurt'iñi kuzziz cjee.

⁴⁴Jalla nii wiruñta jeejz tjuñquiziqui joz tjapa nii wajtchiz z̈oñinacaqui ajczic̈ha Yooz taku nonzjapa.

⁴⁵Jalla nuz̈ ajczi cherz̈cu, nii judío z̈oñinacaqui iñizichic̈ha. Nekztanaqui Pabluz̈ quintra chiichic̈ha, niiz̈ taku ana walkatzjapa. Niz̈aza Pablo iñarchic̈ha.

⁴⁶Nekztanaqui Pabluz̈tan Bernabez̈tan ana ekscu chiichic̈ha, tuz̈ cjican: —Anc̈hucqui judío z̈oñinacc̈hucc̈ha. Niz̈tiquiztan anc̈hucaquiz primeraqui tii liwriiñi Yooz taku chiistanc̈ha. Anc̈huczti tii Yooz taku anaz̈ nonz pecc̈ha. Niz̈aza Yooziz̈ tjaata wiñaya z̈eti anaz̈ risiwz pecc̈ha, jalla nuz̈ tantiichinc̈hucc̈ha anc̈hucqui. Jalla niz̈tiquiztan anziqui ana judío ejpchiz z̈oñinacz̈quiz tii Yooz taku paljayac̈ha.

⁴⁷Jalla nuz̈ mantichic̈ha Yooz Ejp Jiliriqui, tuz̈ cjican: “Wejrqui anc̈hucaquiz utchinc̈ha, tjapa nacionanacquin z̈oñinacz̈quiz wejt puntu kjanzt'ajo. Anc̈hucaz̈ cjen tjapa kjuttan tii muntuquiz yok tjiiquin kamñi z̈oñinacami liwriitaz̈ cjequic̈ha”.

⁴⁸Jalla nuz̈ nonz̈cu, nii ana judío ejpchiz z̈oñinacaqui ancha chipchic̈ha. Niz̈aza Yooz tawk puntuquiztan, tuz̈ cjichic̈ha: “Tii Yooz takuqui zumapanc̈ha”. Jakziltat arajpachquin wiñaya kamzjapa Yoozqui illzaja, tjapa ninacaqui nii parlita Yooz taku criichic̈ha.

⁴⁹Tjapa yokaran Jesucristo Jilirz̈ puntuqui parlitatac̈ha.