Hechos 12:1-25

¹Inchen tru kwalømmerawan rey Herodesbe møilan køsrøn iglesiayuelan kemørøbig køn, kaig inchib srua kønrrab.

²Incha Juanwei nuneg Jacobone espadatøga kweetsingarubig køn.

³Treeg marigwane judíosmerane truba tabig asønain køben, Herodesbe Pedrongucha merrarrangarubig køn. Truibe tru Pirri Levaduragaig Maig Fiesta kwalømmerawan purayaig køn.

⁴Incha Pedron merrarrawabe, Herodesbe kailan keeri yau keerøbig køn, suldaumera pib søtø ashib pønrrønrrai pønsra kan søtøyu pib suldaubatø. Herodesbe tru Pascua Fiesta puraiben, Pedrone misagwei merrab wesranrrab isua treeg inchibig køn.

⁵Inchawei Pedrobe kailan tru keeri yaugurri webimønrrai truba may ashib tøgagúig waben, iglesiabe nuyasig ¡katø! elachimø, Tiusba waminchib miab købelø køn.

⁶Herodes Pedron misagwei merrab løtsø wesramig køben tru kwalmab yem, Pedrobe pagatø suldaumerai tøbøtag pa cadenatøga merrarraig, kib tsuben, katøgan suldaumerabe yaskabu tru kailan keeri yawan ashib pønrrabelø køn.

⁷Inchen møi møi kan Señorwei ángel kenamisren, tru kailan keeri yaube kan tørguegwalmabig kebiløben, ángelbe Pedron tømbulyu kønøga kasrønanabe, trenchibig køn: —¡Mallatø kurrø!— cha. Inchen cadenasmerabe Pedroi taskugurri kørraptinchibig køn.

⁸Inchabe ángelbe trenchibig køn: —Tamara pørønab, ñui alpargatiswan keetab inchi— cha. Inchen Pedrobe treeg marene, ángelbe trenchibig køn: —Pala itøguewagúigwan keb, nai mendig amø— cha.

⁹Inchen webyabe ángelwei wendautø ibendø, tru ángel øyeeg punrraig marigwane ka inditamaptø isub, nøbe tab chigúi nebua ashmíig køn, pøs øyeebe nune kan piaig lataitø køben.

¹⁰Incha suldaumera ashib pønrrainug srøtiigu puraamba, trugurrimbe katøganbalø puraamba, trugurri yandø wambig callegatømaysrø tsandzøn yaskabyu pubene, tru yaskappe nøtø kurøptinchibig køn. Inchen webamba, kan yabgatig ambene, tru ángelbe nøtø inrrai tarømisrøptinchibig køn.

¹¹Inchen Pedrobe yandø chigúi møra trenchibig køn: —Møimbeguende, Señor nui ángelwan øra, Herodeswei taskugurrimba, katø maya judíosmera nan maig martashchab ashig kui inchib pønrraigugurrimba wesratan— cha.

¹²Incha Pedrobe yandø iigwan maig kui ashabe, Maríai yamay ibig køn, tru Juanwan katø Marcoskucha taigwei usraimay. Inchen truyube truba yamelø tulundzuna, Tiusba waminchib købelø køn.

¹³Incha Pedrobe yagueta pua, yaskabwan pinrrøgøbene, kan srusrø-unø truyu mendig mendabig, Rode taibe, mu køtashchab arruabe,

¹⁴Pedroi wam kui mørøppe, kasrag købiitø yaskabwanguen kurmøtø, katøle umbusrø kelula: —¡Pedro yaskabu pasrøtan!— cha, eshkabig køn.

¹⁵Inchene nømbe trenchibelø køn: —¡Paare! ñibe loca asønan— cha. Inchen nøbe: —¡Truigwein køtan!— chiben, nømbe trenchibelø køn: —Pedro kømøtø, nui møsig kuinrrun— cha.

¹⁶Trune Pedrobe katøgucha yaskabwan pinrrøgøbig, pinrrøgøben, kura ashabe, truba kwaarøbelø køn.

¹⁷Inchen nøbe ‘niløtø kønrray’ siñal mara, tru kailan keeri yaugurri Señor mandø wesraigwan eshkawabe, trenchibig køn: —Jacobonba, nunelø katøganelanba iigwan wammørøsrkønrrigay— cha. Incha webyabe, peesrømay ibig køn.

¹⁸Inchen yandø tør-rraben, suldaumerabe ¡katø! mamdøguen kømuilø truba truba waminchib købig køn, Pedrone ni chindinguen mørmøwa.

¹⁹Inchen Herodesbe langarua, wetørranrrab kaimappe, tru suldau ashib pønrrabelan maig purayaigwan nømun paya ashib srua kuabe, kweetsingaruig købig køn. Incha Herodesbe Judeagurri webya, Cesareasrømay ya, trusrø tsubig køn.

²⁰Herodesbe Tiroba, Sidónba warab misagwan larrø namig tsuben, trusreeløbe søteeløba maig maramigwan lata ke kandø isua pønrramisra, tru rey Herodeswei yau ke nøashib trag megabig Blasto taigwan nømuingatø misrtrai ubønanøb wamincha, truikkurri ambugurri, igurri lata tab warønrrab cha miabelø køn. Kaguende Tiroba, Sidónbabe tru reyweim piraugurri mamig weerigwan purøsrubelø købig kua.

²¹Inchen Herodesbe kan kwaløm treeg martrab cha wesrua pasra, tru kwalømbe Herodesbe tru keilø purø tabelan kewa, tru wamisra ashib karub wainug wamisra chull møramdiig purø may waminchibig køn.

²²Inchen misaamerabe trashib mendappe, trenchibelø køn: —¡Iigwan waminchibiibe møg kømøtø, kan tius køn!— chib.

²³Inchen tru urastø Señorwei kan ángel Herodeswane kwanrrø penøsrkøbig køn, kaguende tru maya nuguen tab kønrrai indigwan Tiuswein kønrrain kømøtø, nuyasig kønrrai inchib wabenba. Incha nøbe pølømmera maig kwabig køn.

²⁴Trune Tiuswei wambe larrøbichib nurab ibig køn.

²⁵Inchen Bernabéba, Saulobabe tru ketamig tulisha trana øriilan chab peguchabe, Jerusalénsrøngurri Antioquíasrømay katø ambubelø køn Juanwan pera, truitøwei Marcos taigwan.