Hechos 10:5-16

⁵Rama ja min jonibo Jopenko jato raanwe, Simón kenatankanon, jawen janeribi iki, Pedro.

⁶Jara, ja wetsa Simón janeyaribi jonin xobonko iki, jara bichin teetai iki. Ja jonira aniparo kexabi iki”, akin.

⁷Jaskáabaini ja ángel moa kaa pekáo, Cornelion jawen yonoti rabé, itan ja Dios akin shinannai westíora jawen sontároribi kenaa iki, já iká iki, jakon iketian jaki koshia joni.

⁸Jatíbi jaskara ikábo jato yoikin senenhaxon, Jopenko jato raana iki.

⁹Nete xabáketian, ja Jopenko nokóribii boi ikanaitian, moa bariapan iketian xobo pekaten Pedro mapeta iki, jain kaxon orani.

¹⁰Jainoaxa, kikinbiresi jawékiakasa iki. Jatian moa yoá axoni ikanaitian, namá keska meran oinna iki.

¹¹Ja nai chopetaitian oinna iká iki, ani chopa kakaati keská, jawen chosko pabíoribi renéxanan naman apakeai.

¹²Ja chopa kakaati keská ikainko iká iki, chosko taeya meskó yoinabo, jainoax meskó ronobo, itan meskó pechia noyai yoinaboribi.

¹³Jatianra bochikiax neskati yoyo ikai ninkata iki: “Wenítaanan, retexon piwé Pedro”, iki ikai.

¹⁴Jatian Pedron yoia iki: “Enra ayamai Ibó. Jawetianbira neskara kerás jawékibo en piosma iki”, akin.

¹⁵Jaskákenbi, jakiribi yoiribia iki: “Ja Diossen jakonhaa jawékibo kerasen yoinyamawe”, akin.

¹⁶Moa kimishaakin jaskáa pekáo, ja chopa moa jakiribi nai bochiki karíbaa iki.