Hechos 10:3-23

³Sa ye ñamicahapʉ tres hora ijigʉ̃ Cohãcjʉ̃ yaquiro angel tiquirore bajuahye. Sa bajuaro Cornelio cahapʉ sajãhye. —‍Cornelio, niahye angel tiquirore.

⁴Sa yero Cornelio tiquirore ihña cuero ohõ saha niahye: —‍¿Pʉhto, yabere cahmeajari? niahye tiquiro. —‍Pejecʉoyequinare mʉhʉ ohorire, mari Pacʉre mʉhʉ sinidire tiquiro wacũno niaga.

⁵Sa yegʉ Jopepʉ mʉhʉ cahacjẽnare ohoya. Topʉ Simo Pedro wame tiriquiro ijire. Tiquirore ne cãhta dutiya mʉhʉ cahacjẽnare.

⁶Tiquiro apequiro Simo wahiquina cahseri quehnoriquiro cahapʉ, pajiri ma dʉhtʉ cahapʉ ijiri wʉhʉpʉ ijire, niahye angel Corneliore.

⁷Angel sa ni tuhasa, wijiaa wahahye. Tiquiro sa wijiari bato Cornelio pʉaro tiquirore yedohoyequinare ihcãquiro surara mehna cjʉ̃nore pijiahye. Surara pehe mari Pacʉre ño peoriquiro ijiro, decoripe Corneliore yedohoe tiahye.

⁸Sa yero Cornelio tiquinare yahu peho, Jopepʉ ohoahye tiquinare.

⁹Sa ye ape deco Jopepʉ tiquina wahari watoa coheri pje ijigʉ̃ Pedro pehe wʉhʉ buipʉ Cohãcjʉ̃re sinino wahahye.

¹⁰Sa yero tiquiro ʉjʉa ahbagʉ̃ ihya duahye. Sa ihya duaro apequina tiquiro ihyayere tiquina dahreri watoa tiquiro pehe bajuagʉ̃ ihñahye.

¹¹Ʉhmʉanopʉ parĩ maagʉ̃, pajiri cahsero ti cahsero sohtoripʉ dʉhteri cahsero dijia tagʉ̃ ihñahye.

¹²Ti cahsero puhiapʉ peyequina wahiquina nʉcʉ cjẽna, yehpapʉ bʉa tiniñequina, minicjʉa pari ijiahye.

¹³Tire tiquiro ihñari bato, Pedro yahuducugʉ̃ tʉhoahye. —‍Pedro, wahcãdʉcaya. Ahriquinare wejẽ ihyaya, ni yahuducugʉ̃ tʉhoahye tiquiro.

¹⁴Tiquiro sa niepegʉ̃ta Pedro ohõ saha niahye: —‍Pʉhto, ne tiquinare ihyeraja yʉhʉ. Ñañequinare, Cohãcjʉ̃ tiquiro ihya dutierariquinare ne ihyera tii yʉhʉ, niahye Pedro.

¹⁵Sa yero Pedro pari turi yahuducugʉ̃ tʉhoahye: —‍Cohãcjʉ̃ “Quehnoañequina ijire”, tiquiro nidiquinare “Ñañequina ijire”, niedacãhña mʉhʉ tiquinare, ni yahuducugʉ̃ tʉhoahye Pedro.

¹⁶Sa ye ihtia taha tiquina sa ni yahuducuri bato ti cahsero ʉhmʉanopʉ mʉjaa wahahye tja.

¹⁷Sa yero Pedro tutuaro wacũ “¿Dʉhse ni yahu duaro niajari sa bajuaro?” ni tʉhotuahye tiquiro basi. Tiquiro sa tʉhoturi watoa Cornelio ohoriquina pehe Pedro ijiri wʉhʉpʉ esahye. “¿Simo ya wʉhʉ nohopʉ ijiajari?” ni, tiquina sinituri bato ti wʉhʉpʉ esahye tiquina.

¹⁸Sa ye tiquina sinitu madoqueoahye. “¿Simo Pedro wame tiriquiro ahri wʉhʉre ijiajari?” ni sinituahye tiquina.

¹⁹Sa yero Pedro tiquiro tʉhoturi watoa Espíritu Santo tiquirore yahuahye: —‍Ihñaña. Ihtiaro ʉmʉa mʉhʉre macañe nine.

²⁰Wahcãdʉcaya. Dijiahya. Tiquina mehna wahaya. Yabiro marieno wahaya quehnoano mehna. Yʉhʉ pehe tiquinare ohõpʉre ahtagʉ̃ yei, niahye Espíritu Santo Pedrore.

²¹Tiquiro sa nigʉ̃ tʉhoro Pedro tiquina cahapʉ dijiaa wahahye. —‍Ihñaña. Ohõpʉ ijiaja yʉhʉ mʉsa maca cãhtarigʉ. ¿Dʉhse yena tana niajari mʉsa yʉhʉ cahapʉre? niahye Pedro tiquinare.

²²Tiquiro sa nigʉ̃ta tiquina pehe ohõ saha niahye: —‍Cornelio cien surara pʉhtoro, quehnoañene yeriquiro, mari Pacʉre cua pesaro ihñariquiro, ijipihtiyequina judio masa “Quehnoariquiro”, tiquina nidiquiro mʉhʉre piji dutiro ohori ʉsãre. Cohãcjʉ̃ quehnoariquiro yaquiro angel Corneliore mʉhʉre piji dutiñohti. Ohõ saha niñohti: “Pedrore mʉhʉ ya wʉhʉpʉ ne cãhta dutiya mʉhʉ cahacjẽnare. Sa ye tiquiro mʉhʉre yahurota”, ni piji dutiñohti angel Corneliore, ni yahuahye Cornelio Pedrore tiquiro piji dutiriquina pehe.

²³Tiquina sa nigʉ̃ Pedro pehe tiquinare sajã ta duti, ihyaye oho, tiquiro ijiri wʉhʉpʉ carĩ dutiahye tiquinare. Sa yero ape deco Pedro wahcã, tiquina mehna wahaa wahahye. Sa ye apequina Cristo yequina Jope cjẽna Pedrore piti ti cãhye.