1Yebee bene enu reca uleꞌya enu máse rnibiyaꞌ lu beelá bee uleꞌya, Diose rcañi liꞌilla leta bee bene para nú nacuꞌlla lu Diose equie cuendaꞌ bee bene, nu yalla rdeteꞌ cuenda bee bene uꞌna para nú deteꞌllae lu Diose cuna bee nañi enu rquiꞌña nú ati equie cuendaꞌ stula bee bene.
2Nu lunú neca uleꞌya cuaꞌ bene nediyaꞌlla lunú xa seca bee bene. Enzeꞌe rluꞌculla paciencia bee bene enu la riꞌibeyaꞌ lunú rriꞌi, nu cuna bee bene enu rriꞌi dula ana lu.
3Nu lunú leꞌca nuꞌ chenu rriꞌi uleꞌyacuaꞌ dula enzeꞌe leꞌca riñilla tucu nañi xi neca uꞌna lu Diose equie cuendaꞌ stulalla, tucu nú rriꞌilla lu cuendaꞌ stula bee bene.
4Nu lecati enu aca eꞌcu uleꞌya enu máse rnibiyaꞌ lubeelá bee uleꞌya lunú niarquiꞌtsialla sino que Diose neca enu rcañi liꞌilla tucu nú ucañinu Aarón.
5Leꞌca scua unga lu cuendaꞌ Jesucristo, lá ninu nú a acanu uleꞌya enu máse neca equie luaꞌahua, sino que Diose ucañi liꞌinu chenu uni Diose: Liꞌilu necalu lliꞌñia, nu desde nee lubea lubee bene nú liꞌilu necalu lliꞌñia.
6Leꞌca rni stucu luguare lu ichiꞌ Stichiaꞌ Diose equie cuendaꞌnu: Liꞌilu necalu uleꞌya diqui tiembu, tucu nú unga Melquisedec uleꞌya.
7Chenu ubeꞌta Jesucristo lu iliulabe quieꞌ, chiquiꞌ ungunaꞌnu nu juerte unacuꞌnu lu Diose enu reca tsilaꞌa liꞌinu lu eluti. Che uriꞌi caso Diose liꞌinu nu uriꞌi Diose elietsaꞌnu para nú tsalunu Stichiaꞌ Diose.
8Mase nú lliꞌñi Diose necanu pero uzucuꞌnu nú rni Diose mase nú nehuana ulleꞌcanu.
9Nu lunú neli uriꞌinu tucu nú niarquiꞌ Diose nú riꞌinu, enzeꞌe equie cuendaꞌ liꞌinu leca xunga laxu nú silaꞌa Diose bee bene enu sucuꞌ nú rninu.
10Nu Diose neca enu ucañi liꞌinu para nú acanu uleꞌya enu máse neca equie tucu nú unga Melquisedec uleꞌya enu unga neca equie.
11Huaxiscaꞌlá nú rquiꞌña nia luhua equie cuendaꞌ bee nucuaꞌ, pero chiquiꞌ neriñaꞌ nú ixiuleꞌa luhua xa niarquia equie nú chabeꞌ rriꞌihua beyaꞌ.
12Huaꞌtulila nuꞌluhua Stichiaꞌ Diose, neequie hasta rialala nú seteꞌlahua bee bene Stichiaꞌ Diose pero liꞌihua rquiꞌñiascaꞌhua enu zeteꞌ zeca liꞌihua Stichiaꞌ Diose nú ungalahua. Liꞌihua secahua xi seca tucu enduꞌ meꞌ enu rueꞌ puro chiꞌ enu lacascaꞌ acu ye nú acu.
13Nu yebee enu neca xi neca enduꞌmeꞌ enu rueꞌ chiꞌ la aca bee nzeꞌe riꞌi nzeꞌca bee nzeꞌe beyaꞌ xi rni Stichiaꞌ Diose.
14Pero bee bene enu másela rriꞌi beyaꞌ Stichiaꞌ Diose, liꞌibeella neca beella xi neca bee enu racula ye nú racu. Xne rriꞌilabeella beyaꞌ tá nú neca nzeꞌca nu ta nú necha neca.
