Hebreos 3

1

2

3

4

5

6

7

8

9

10

11

12

13

¹Estiꞌeꞌ, vitzꞌin vatzik, ex uvaꞌ ex itenam Tiixh, antu veꞌt oꞌ uvaꞌ kat imolo oꞌ u Tiixheꞌ setukꞌ tiꞌ qetzit u nimla bꞌaꞌnileꞌ kꞌatz Aak. As qitzꞌataj setukꞌ tiꞌ u Jesucristo uvaꞌ chajel tzan tiꞌ kulochpeꞌ. As Aakeꞌ u nimla oksan tetz iyol tenam vatz u Tiixheꞌ, echeꞌ uvaꞌ ni tal u yoleꞌ uvaꞌ chusel veꞌt sqaꞌn.

²As kꞌujlebꞌal kꞌuꞌl u Jesucristo vatz u Tiixheꞌ uvaꞌ kat ikꞌujbꞌaꞌ kan Aak. As ech kat ibꞌan u Moisés xoꞌl unqꞌa itenam u Tiixheꞌ, tan kꞌujlebꞌal chit kꞌuꞌl u Moisés vatz u tenameꞌ kat ibꞌana.

³As at veꞌt pal toksal iqꞌii u Jesús tiꞌ u Moisés, echeꞌ tatin umaj lakol kabꞌal, tan at pal toksal iqꞌii tiꞌ u kabꞌaleꞌ uvaꞌ kat ilaka.

⁴As jankꞌal unqꞌa kabꞌaleꞌ, as at umaꞌl uxhchil lakol tetz. As aꞌ u Tiixheꞌ cheesan tetz skajayil.

⁵As kꞌujlebꞌal kꞌuꞌl u Moisés vatz u Tiixheꞌ kat ibꞌana. As ech veꞌt tatin u Moisés echeꞌ umaj kꞌam tiꞌ ibꞌanataꞌ jankꞌal uvaꞌ kat tal u Tiixheꞌ ste as tiꞌ talat isuuchil kam uvaꞌ la tal u Tiixheꞌ xamtel.

⁶As ech koj u Cristo, tan ech tatin Aakeꞌ xoꞌl vitenameꞌ echeꞌ umaj kꞌaol uvaꞌ ni ilon vikabꞌal vibꞌaaleꞌ. As oꞌeꞌ taꞌ uvaꞌ ech oꞌeꞌ ikabꞌal u Tiixheꞌ, asoj chabꞌamal qatin tiꞌ u nimla bꞌaꞌnileꞌ uvaꞌ nu kutxꞌebꞌeꞌ. As yeꞌ la yaꞌ oꞌ tiꞌ kuchiibꞌ stiꞌ, tul nu kutxꞌebꞌeꞌ.

⁷Estiꞌeꞌ la val sete, tan ech la ebꞌaneꞌ echeꞌ uvaꞌ ni tal u Tiixhla Espíritu, tan ech ni tal ileꞌ: Asoj netabꞌi viyol u Tiixheꞌ cheel,

⁸as yeꞌ la etiibꞌisa vetaanxelaleꞌ, echeꞌ uvaꞌ kat ibꞌan unqꞌa tenameꞌ, tul uvaꞌ kat ul veꞌt iviꞌ u Tiixheꞌ tiꞌ unqꞌa tenameꞌ tu u tzuukin txꞌavaꞌeꞌ, tan nik isaꞌ tootzitaꞌ ma la ibꞌan Aak moj yeꞌle kam uvaꞌ kat tal Aak.

⁹As estiꞌeꞌ ech kat tal veꞌt Aak ileꞌ: Tzitziꞌ kat isaꞌkat unqꞌa qꞌesla ebꞌaaleꞌ tootzitaꞌ ma an chit u yoleꞌ uvaꞌ kat val ste moj yeꞌle. As kꞌuxh kat til unqꞌa nimla bꞌaꞌnileꞌ uvaꞌ kat unbꞌan stiꞌ tu kaꞌviinqil u yaabꞌeꞌ, as nik isaꞌ tootzitaꞌ ma an chit u yoleꞌ uvaꞌ kat val ste moj yeꞌle.

¹⁰As estiꞌeꞌ uvaꞌ kat ul veꞌt unviꞌ tiꞌ unqꞌa tenameꞌ uveꞌ atik tzitziꞌ. As ech kat val veꞌt ileꞌ stiꞌ: «As tzꞌejxinal chit unqꞌa tenameꞌ tukꞌ vitxumbꞌaleꞌ. As yeꞌ nisaꞌ tootzit vuntxumbꞌaleꞌ,» chꞌin kat vala.

¹¹Estiꞌeꞌ kat vala uvaꞌ kat txꞌiꞌtziꞌl tu veꞌt in. As kat unkꞌujbꞌaꞌ veꞌteꞌ uvaꞌ yeꞌ la ok veꞌt unqꞌa uxhchileꞌ tu u txꞌavaꞌeꞌ uvaꞌ kat valtziꞌ ste uvaꞌ la chiibꞌ kat as uvaꞌ yeꞌ la bꞌuchlukat veꞌteꞌ, tiꞌk u Tiixhla Espíritu.

¹²Atoj enachbꞌal, vitzꞌin vatzik, aqꞌal uvaꞌ yeꞌl umaj ex la eteesa kan etibꞌ kꞌatz u islich Tiixheꞌ, as yeꞌ la etoksat etaama tiꞌ u vaꞌlexheꞌ, as tiꞌ iyansal vetxumbꞌaleꞌ tiꞌ u kꞌujlebꞌal ekꞌuꞌleꞌ tiꞌ Aak.

¹³Pet aal la iyakꞌinsa tibꞌ etaama sevatzaj jun qꞌii tiꞌ u kꞌujlebꞌal ekꞌuꞌleꞌ tiꞌ Aak. As ebꞌantaj cheel, aqꞌal uvaꞌ yeꞌl umaj ex la etiibꞌisa etaama taꞌn u paaveꞌ uveꞌ ni tal imaxtibꞌet ex.

¹⁴Tan asoj chabꞌamal qatin tiꞌ u kꞌujlebꞌal kukꞌuꞌleꞌ tiꞌ u Cristo techal tul Aak unpajte echeꞌ uvaꞌ nik kubꞌan sbꞌaxa, as at veꞌt qokebꞌal tiꞌ unqꞌa nimla bꞌaꞌnileꞌ uvaꞌ la aqꞌax sqe taꞌn Aak.

¹⁵As estiꞌeꞌ uvaꞌ ech ni tal u yol ileꞌ: Asoj netabꞌi viyol u Tiixheꞌ cheel, as yeꞌ la etiibꞌisa vetaanxelaleꞌ echeꞌ uvaꞌ kat ibꞌan unqꞌa tenameꞌ tul uvaꞌ kat ul iviꞌ u Tiixheꞌ stiꞌ, tiꞌk u yoleꞌ.

¹⁶As tuk unnachonsa sete uvaꞌ ¿abꞌil kat abꞌin viyol u Tiixheꞌ as yeꞌ kat inima? Tan aꞌ unqꞌa tenameꞌ uveꞌ kat teqꞌo u Moisés bꞌey svatz tiꞌ tel chꞌuꞌl tu u Egipto.

¹⁷¿As abꞌil stiꞌ kat ulkat iviꞌ u Tiixheꞌ tu kaꞌviinqil u yaabꞌeꞌ? Aꞌ unqꞌa tenameꞌ uvaꞌ kat ipaasa tzii, as kat kamik kan tu u tzuukin txꞌavaꞌeꞌ.

¹⁸As unqꞌa uxhchileꞌ uvaꞌ yeꞌ ni niman u yoleꞌ as kat kꞌujbꞌaꞌl veꞌt kan stiꞌ uvaꞌ yeꞌ la ok tu u txꞌavaꞌeꞌ uvaꞌ yeꞌl la bꞌuchlukat.

¹⁹As nu kupal stuul uvaꞌ yeꞌ kat uch tetzit veꞌt unqꞌa uxhchileꞌ kam uvaꞌ kat taltziꞌ veꞌt Aak ste, tan tiꞌ uvaꞌ yeꞌ kat ikꞌujbꞌaꞌ ikꞌuꞌl tiꞌ Aak.