HEBREOS 1

1

2

3

4

5

6

7

8

9

10

11

12

13

¹Ti Rioxe ep ta echꞌel iscꞌopon yaꞌel ti voꞌne moletique yuꞌun jaꞌ ispꞌijubtas ti yajꞌalcꞌoptaque ti cꞌusitic iyalique. Stosoltosol ti cꞌusitic iꞌalbatique xchiꞌuc ti cꞌusitic iꞌacꞌbat spasic jujune.

²Lavi poꞌot xa xlaj li balamile liscꞌoponotic xa yaꞌel uc ti Rioxe yuꞌun iꞌay liꞌ ta sba balamil ti Xchꞌamale. Ti Xchꞌamale jaꞌ iyacꞌbe spas balamil xchiꞌuc scotol li cꞌusitic oye, jaꞌ iyacꞌbe scuentain scotol.

³Ti iꞌay ti Xchꞌamale, jaꞌ ivinaj o ti toj lec yoꞌon ti Rioxe. Ti cꞌusitic ispas ti cꞌalal iꞌay liꞌ ta sba balamile, jaꞌ ivinaj o ti jun xchiꞌuc ti Rioxe. Oy syuꞌel. Jaꞌ ta syuꞌel ti lec scotol li cꞌusitic oye. Jaꞌ ay stoj jmultic. Tsꞌacal to ibat ta vinajel, tey ba chotluc ta sbatsꞌicꞌob ti Rioxe. Tey tspas mantal.

⁴Ti Xchꞌamal Rioxe jaꞌ más tsots yabtel; jaꞌ jutuc noꞌox yabtelic ti anjeletic ta vinajele. Yuꞌun “jaꞌ Jchꞌamal”, xi ti Rioxe, jaꞌ ivinaj o ti jaꞌ tsots yabtele.

⁵Voꞌot Jchꞌamalot, chcacꞌ iluc ti voꞌot Jchꞌamalote, xꞌutat onox. Mi jun anjel muc bu yech iꞌalbat. Voꞌon Stoton, jaꞌ Jchꞌamal, xi onox tsꞌibabil. Mi jun anjel muc bu yech iꞌalbat.

⁶Ti Rioxe iyal ti cꞌalal istac tal ta sba balamil ti junjun Xchꞌamale: Scotol li cajꞌanjeltaque ta xichꞌic ta mucꞌ li Jchꞌamale, xi onox.

⁷Yan ti anjeletique jaꞌ yech tsꞌibabil scꞌoplalic ta scꞌop Riox: Ti anjeletique coꞌolic xchiꞌuc icꞌ, coꞌolic xchiꞌuc leb cꞌocꞌ, mantal noꞌox ta xchꞌunic, xi tsꞌibabil.

⁸Yan ti Xchꞌamal Rioxe jaꞌ yech tsꞌibabil scꞌoplal ta scꞌop Riox: Voꞌot Rioxot, voꞌot chapas mantal ta sbatel osil. Naca lec li cꞌusitic chavale.

⁹Jaꞌ acꞌanoj li cꞌusitic leque. Mu xacꞌan li cꞌusitic chopole. Yechꞌo ti voꞌot más chayacꞌbe bentisyon ti Rioxe, jaꞌ lavajvale, yechꞌo un jun avoꞌon. Muc muchꞌu yech ti jun yoꞌone, xi tsꞌibabil.

¹⁰Jaꞌ yech tsꞌibabil scꞌoplal noxtoc: Cajval, voꞌot apasoj vinajel balamil.

¹¹Li vinajele snaꞌ xlaj. Yan li voꞌote cuxulot ta sbatel osil. Li vinajele snaꞌ xmolib yaꞌel, coꞌol xchiꞌuc cꞌuꞌuletic.

¹²Ta sta yora chabal, coꞌol xchiꞌuc jbal jcꞌuꞌticotic. Chaqꞌuexta chac cꞌu chaꞌal jqꞌuexta jbaticotic. Yan li voꞌote mu xanaꞌ xacham, xi tsꞌibabil.

¹³Ti Rioxe jaꞌ onox yech iyalbe ti Xchꞌamale: Chachoti ta jbatsꞌicꞌob, chapas mantal ti cꞌu sjalil xchꞌun o amantal cuꞌun scotol lacrontae, xut onox. Mi jun anjel muc bu yech iꞌalbat.

¹⁴Scotol ti anjeletique chtunic noꞌox. Chtaqueic tal yuꞌun ti Rioxe, chtal xchabiotic voꞌotic ti chicuxiotic ta sbatel osile.