Hataholi Nadedenu nala Tutuin 19:2-33

²Boe ma natane sala nae, “Tolanoo nggalei. Fain fo ei mamahele neu Yesus, ei simbo Manetualain Dula Dale Malaon, do taa?” Ala lataa lae, “Taa. Ai bei ta mamanene mitak lae, hambu Manetualain Dula Dale Malalaon leondiak.”

³Boe ma Paulus natane bali nae, “Mete ma leondiak, na ala salani ei, pake see tatao salanin?” Boe ma lataa lae, “Ala salani ai, tungga Yohanis tataon.”

⁴Boe ma Paulus nae, “Mamanene dei! Yohanis ana salani hataholi, na tao neu tanda nae, ala hahae leme sila sala-singgo nala mai so. Tehuu, masaneneꞌdak leo iak! Tungga-tungga faik, mesa kana nanoli hataholi Israꞌel asa, nae, ala musi lamahele neu Yesus, hataholi ndia fo neu ko Manetualain Ana haituan mai.”

⁵Lamanene leondiak boe ma, ala loke Paulus ana salani sala, fo ala daꞌdik neu Lamatuak Yesus bobonggi nala.

⁶Boe ma Paulus ana lalaa liman neu sila lain, ma ana hule-haladoi, de Dula Dale Malalaok ana konda neu sala. Boe ma, ala mulai lakokola dedeꞌa mata-matak, fo sila beita bubuluk litak. Ma Manetualain ana pake sala, fo lafaꞌda hata fo ana sangga daꞌdik.

⁷Sila basa sala hataholi sanahulu dua.

⁸Lelek fo Paulus ana leo nai kota Efesus, ana nateme maso nai hataholi Yahudi la uma huhule-haladoin neu, fo nanoli sala lutu-lutuk, laꞌeneu Manetualain palendan. Ana kokolak taa babaꞌbi-babaa, losa bulak telu.

⁹Te, hambu hataholi tala simbok ndia nanonolin ndia, de ala laꞌban ndia. Ala mbau-eꞌdo hataholi manai ndia kala, fo boso ala tungga Yesus Dala Soꞌdan ndia. Huu ndia, de Paulus no hataholi kamahele kala, ala laꞌo ela uma huhule-haladoik ndia. De leu lakabubua lai uma sakola esa. Maumak ndia, naꞌde Tiranus.

¹⁰Paulus nanoli leondiak neu sala losa teuk dua, losa basa hataholi manai nusa Asia, lamanene Lamatuak Yesus Tutui Malolen ndia so. Mana mamanene kala sila, hataholi Yahudi ma hataholi taa Yahudi la.

¹¹Lelek ndia, Manetualain ana fee koasa neu Paulus, fo ana tao tanda heran mata-mata kala.

¹²Sama leo, mete ma hataholi la tonda lala Paulus hehengge langgan, do kalikeen, fo ala tao buas ndia neu hataholi kamaheꞌdik, na tutik mopo memak hataholi ndia heꞌdin. Losa nitu manggalau kala boe oo, ala kalua laꞌo ela hataholi la.

¹³Nai ndia, hambu hataholi Yahudi la malangga anggaman esa, no ndia ana touana nala hitu. Malangga anggama ndia, naꞌde Sakewa. Ana nala lasiꞌa leni suꞌdi bee leu, fo ala husi heni nitu neme hataholi la mai. Ala soꞌba-soꞌba husi nitu pake Yesus naꞌden, lae, “O malelak Yesus fo Paulus nafaꞌdak ndia do? Hatematak ia, au palenda o, pake Yesus naꞌden, fo o kalua muma hataholi ia mai leo!”

¹⁵Boe ma laꞌi esa, leꞌdoeik Sakewa ana nala palenda leondiak, boe ma nitu nataa, nae, “Au alelak Yesus. Au alelak Paulus boe. Te, ei ia, see? De au taa amanene ei.”

¹⁶Boe ma hataholi nitu nalak ndia, ana luli nalan seli. De ana neu heta ma haꞌbo fee sala. Ana tao nahina sala, ma ana sii heni baꞌdu nala losa lalai lalenggu-piko kala, ma ala tao foli leme uma ndia mai.

¹⁷Boe ma tutuik ndia, ana nggenggela neme bafak mai neni bafak neu, losa basa hataholi la manai kota Efesus ala bubuluk; mae, hataholi Yahudi, do taa Yahudi boe oo, ala bubuluk. Kekeꞌun neu, suꞌdi see namanene tutuik ndia, na, ala bii ma heran. Boe ma ala koa-kio Lamatuak Yesus, huu Ana fee koasa inahuuk neu Paulus.

¹⁸Basa boe ma, hataholi kamahele beu kala sila, ala leni tolanoo kamahele kala so leu, de lambomboꞌa dalek, ma ala manaku sila sala nala.

¹⁹Neme sila mai, hambu mana mateme pake malela makiuk. De lakabubua lala sila susula-susula malela makiun, de ala hotu heni sala. Leo hingga susula-susula kala sila, na, beli nala doi lilo fulak lifun lima hulu.

²⁰Basa boe ma, hataholi la latutui aok, Lamatuak Hala Malolen ia leleꞌdo-leꞌodaen, suꞌdi nai bee. Boe ma hataholi kamahele kala, boe lamanoꞌu. Te Lamatuak Dedeꞌa-kokolan ndia, naꞌa losa hataholi la dale nala.

²¹Basa ndia boe ma Paulus naketun ana fali neni Yerusalem neu. Tehuu, dalen ana haladoi nakahuluk neni nusa Makedonia, ma nusa Akaya neu, bei fo ana laꞌo nakandoo neni Yerusalem neu. Ana duduꞌa memak so nae, “Malolenak au tao basa au ue-leꞌding, nai mamana kala ia dei. Te, mae leo beek oo, au musi losa kota Roma.”

²²Boe ma Paulus nadenu nonoon dua, Timotius ma Erastus, fo lakahuluk leni Makedonia leu. Te ndia bei leo doo-doo nai nusa Asia.

²³Lelek ndia, dedeꞌa inahuuk esa, ana buku nai kota Efesus, laꞌeneu Yesus Dala Soꞌdan.

²⁴Dedeꞌak ndia okan leoiak: nai ndia, hambu tuka lilo fulak esa, naꞌde Demitrius. Ana nateme tao uma sosonggo kadiꞌik neme lilo fulak mai, fo fee sila nitu lalais inak, naꞌde Artemis. Huu ndia uen ndia, de ala hasa nakandondoo henin, de ana pake hataholi mana ue-leꞌdik noꞌun seli. Huu ndia, de doi kala lafaan neni ndia neu.

²⁵Laꞌi esa, Demetrius nakabubua nala tuka nala, ma tuka feꞌe kala, de nakokola nae, “Ama-ama, ma basa tolanoo nggalei! Ei bubuluk ita soꞌdan ana neulau leo iak ia, na huu doik noꞌu kala, ala faa neme ita uen ia mai.

²⁶Tehuu hatematak ia, ita tita to ita mata deꞌen so, ma tamanene to ita ndiꞌidon so, na huu-huu kaꞌda Paulus kokolan. Te ana hela-nole nala hataholi noꞌu kala, nae, bua sala fo ita tao kala ia, sosoan taa. Nae, bua doki taok fo ita tao kala ia, kaꞌda nitu lalais ina-touk pepekok ndia. Naah, taa kaꞌda hataholi manai kota Efesus lamanene ndia, te basa nusa Asia lamanenen so boe.

²⁷De, mamanene neulalau bou! Neu ko, ita daꞌdik hata bali, mete ma hataholi noꞌu kala boe tungga lakandondoo heni Paulus asa. Mete te, hataholi la tala mai hasa ita tataon ia so! Masaneneꞌdak bou! Hatematak ia, hataholi noꞌu kala lakaluku-lakatele neu ita lamatua inak manaꞌan Artemis. Nai basa nusa Asia, losa daebafok buꞌun haa sala boe oo, hataholi la koa-kio Artemis nai ndia Uma Ina Sosonggon, fo nai ita kotan Efesus ia. De boso losak hataholi la tala mbali Artemis, ma tala ia mai so.”

²⁸Lamanene leondiak, boe ma dale nala latoꞌbi tutik. De ala eki, lae, “Soꞌdak neu Artemis! Artemis manaꞌa! Ita hataholi Efesus koa-kio neu Artemis!”

²⁹Lamanene hataholi la ala eki-eki leondiak, boe ma hataholi la lalai suꞌdi leme bee mai, de leu lakabubua lai ndia, losa kota ndia nakaseꞌe no hataholi la. Tehuu basa sala lasapanggak. Boe ma hataholi la mulai tao huusanak, tungga-tungga dalak losa kota moo inahuun. Ala humu lala hataholi dua, de ala hela loo sala leni ndia leu. Dua sala, naꞌde Gayus ma Aristarkus. Hataholi la humu lala sala, huu dua sala ia, Paulus ana mana tungga nala leme Makedonia mai.

³⁰Lamanene leondiak boe ma, Paulus ana nau neni hataholi mana tao huusana kala lalaꞌdan neu, tehuu, hataholi kamahele manai ndia kala tala mboꞌi sana.

³¹Hambu hataholi inahuu nala luma, leme Asia mai lalelak Paulus lalan seli. Ala ladenu hataholi la leu lafaꞌda Paulus, fo boso ana neni hataholi mana tao huusana kala sila neu.

³²Boe ma nai moo inahuuk ndia, hataholi la mulai sangga dedeꞌak ia huun. Hambu ala eki pepekok lae, “Leoiak!” Feꞌe kala ala eki lae, “Leondiak.” Naa te, noꞌu kala taa bubuluk dedeꞌak ndia huu-okan leobeek. Sila ndia kaꞌda latungga dea.

³³Nai ndia, hambu hataholi Yahudi la mulai bii, huu ala duduꞌa lae, boso losak hataholi noꞌu kala ia, ala kalaak hataholi Yahudi la, daꞌdik neu mana nggenggefuk nai dedeꞌak ia. Huu ndia, de ala solok hataholi esa, ana mata neu fo ana daꞌdik neu sila mana kokolan. Hataholi ndia, naꞌde Aleksander. Ala loke fo hataholi ndia, ana nasalaꞌe sala, fo nae, hataholi Yahudi la tataon taa dedeꞌak ndia. Boe ma Aleksander ana soꞌuk liman, fo suek boso lambue. Boe ma nakokola nasalaꞌe hataholi Yahudi la.