Godigo Sęba Tagala Palai Bidigo Po 3:23-26

²³Tama te po pusa mabo bidigo po odisąbo we bidi, teda dagego Godigo po odobo we bidi tomo agebeledu buluba sela sąnama, elaibao,’ Mosesgo te po wali,” Pitago te tama po wai.

²⁴Pita agai po me wali, te po wai, “Te Godigo po pusa mabo bidi nogi Samuel dali, te nosali asai bidi dabe dali me, te Godigo po pusa mabo bidi dabe tigidali, augwaligo Jisasgo yabo sę po polobadu pusa mawai. Tama megi te sę dią holali.

²⁵Godigo agai mu po ola tolai dao, te agai po pusa mabo bidi dabego ola mawai, te da tau somainu. Godigo dago wąį dabebolo agai mu po ola mawai dao. Tama Godigo Abrahambolo polobadu wali po megi da pagede me bidibo. Godigo Abrahambolo polobadu te po wai, ‘Eno nago nosali ame nai wąį dabebolo dwagi yai sę hasia elama, nosali augwaligo tigidali tǫde bidibo we bidi dabebolo dwagi yai sę yaibao,’ Godigo te po wai.

²⁶Tama te sę emai hagede, Godigo aga sę ebo bidi sa munama, dabolo hasia tagala palali. Agai homugo dage tigidaligo dwai kolesaga tagalama, dage bugagia bidaibao,” Pitago te po wai.