Godigo Sęba Tagala Palai Bidigo Po 15:10-19

¹⁰Tama dagego te Juda hani gagasiąwai bidi sęgę mabo tagaliąo. Dagego ‘Dage Mosesgo po naga wali piąo’ po augwalibolo wagimio. Magi basowe? Augwali usu egobeo. Suao. Dago wąį me, dago me, te Mosesgo mani bomo yai po wali pabo sę bugagia wali pogobeo. Te tiwai moni sęgę dago tudide tolobo dao. Tama tiwai sęgę dagego augwalibolo mobaso da, dagego God usu saibao.

¹¹Te dwali. Tialima, dago Jisasba dago homu tigidali mubo dao, tama dago konebo da, Genuai Bidi Jisas agai dago yali dwai sę agai tolai dao. Da tigidali we bidi Godigo da te tų deligo naga saibao. Tialima, agai te Juda hani isąwai we bidi me te tųdu naga ma saibao,” Pitago augwalibolo te po wai.

¹²Te po minama, tigidali bidi po sagia selama, Barnabas dali Pol dali sigo tigidali bomai sę Godigo augwali si nogode yali sę po pusali, te sogo augwali si te Juda hani isąwai bidigo tǫde biliyu, te sę yali po pusali.

¹³Tama augwali sigo te po silibo si, Jems aga augwa tobolu bidi gagalama, aga dodoligulama, te po wali, “Ama dedeo, dagego eno po odao.

¹⁴Megi te Pita agai po dabolo pusali. Tama dago koneao, hasia sogo mu Godigo te agai hobede ebo homu te Juda hani isąwai we bidibolo me manio. Tama Godigo me badu aga hani mu nigimai hagede dąį ilai dao.

¹⁵Tama Godigo pedauwalide po selama pusubo buku da deli po tama tiwai augwaligo asęai da. Te po e tiwai,

¹⁶‘Genuai Bidi agai te po wai, “Nosali sogo ena ma asaibao. Augwaligo be me dodolama bidibo, polobadu be gagawali, degasa palio. Tiali goli eno te be ma gesi sę yaibao. Tama te tiwai eno gesi kolesaga te Devitgo hani ma hodalagasaibao,” wali.

¹⁷“Tama gasa hani augwaligo me ena gegebo sę yaibao, ena Genuai Bidi dao, te Juda hani gagasiąwai bidi me. Tiali goli, eno augwali eno hani tomoba asomainu eno i wai dao,” wali.

¹⁸“Polobadu mu Genuai Bidi agai te sę pedalabo po wai dao, tama megi te sę pedalalio.”’”

¹⁹Te Jems agai te po pusali, “Eno homugo tama tibao. Dago te Juda hani isąwai Jisas wali pabo bidi dago sęgę magio. Augwali God pageba asali, tama dago augwali dago kolesagadu pao olama i wagio.