7 Abotai GUIAU Eaubada tau i hetubu tanoubu muamuana eai, mauri eahuana i eahualau isuna eai; abo tau wa i hemala doga ma earuana maumaurina.
8 Abo GUIAU Eaubada oea i umai Edena eai, tupo aruabu eai, temetai abo tau wa ie tore, iaede i ginauri wa.
9 Eo tano eai GUIAU Eaubada oeagi gamagaridi i hetubudi, isi ede adi ao se lolo, eo isi hinage aiaidi se lolo; mauri oeagina hinage oea duaduarina eai, eo lolo eo baaea italobaina oeagina hinage.
10 Saga esau Edena eai i didipesa, oea wa ana goila, abo i hemala saga hasi.
11 Bagubagunana esana Pisona; ia ede i lau Havila tehana maudoina i hetaiiri, temetai gold wa;
12 eanua ne ena gold i lolo dumaduma; bedelium eo onyx we’una hinage metai.
13 Saga helabuina esana Gihona; ia ede Kusa oeana maudoina i tauhetaiiri.
14 Hehaionana esana ede Hidekela, Asiria tupo aruabuna eai ie lau. Eo saga hehasina ede Euparatea.
15 GUIAU Eaubada tau wa ie abi ie tore Edena oeana eai, bena i giari eo i itawatai.
16 GUIAU Eaubada tau wa i lauhesom, i ene, “Oea ta oeagina gamagaridi uauadi abo au ainapaidi;
17 na lolo eo baaea italobaina oeagina iabom mo taba nige au ai, nei asubenana eai ne au ai abo au mate.”
18 Abo GUIAU Eaubada i ene, “Nige i lolo tau iabom mo i mia; ana sagu abo ea ginauri abo i lau loloei.”
19 Arinai tano eai GUIAU Eaubada oea suisuidi gamagaridi, eo eada manudi gamagaridi i hetubudi, eo i woeaidima Adamu arinai, ia bena esadi i toredi, eo Adamu wa esa saha i mosedi ginauri maumauridi gamagaridi eai, isi esadi ede.
20 Adamu esa i mosedi suisui gamagaridi oea eai taumia; na Adamu iabom sora nige ana sagu mamohoina se lobai.
21 Arinai GUIAU Eaubada Adamu i heenomate, ia ma eno‐matena oitarina esau i abihai eo bulumana i hemauuioi;
22 eo wau oitarina wa GUIAU Eaubada tau lisilisina eai i niusihai wa, arinai sine i ginauri, eo i woeaiyama tau arinai.
