1Wenoz Zako wa'yr uzeupe wà, wanupe uze'eg pà wà. — Peiko xe heiwyra'i nehe ty wà. Amume'u putar peneko àwàm peme ihe nehe, ma'e peme uzeapo ma'e ràm imume'u pà ihe nehe.
2Ihe Zako ihe, pe hera'yr romo peiko pe. Pezemono'og heruwake heze'eg henu pà nehe. Pezeapyaka katu penu Izaew ze'eg rehe nehe kury.
3Ne Humen ne. Hera'yr itua'u wera'u ma'e romo ereiko ne. Hekàgaw romo ereiko. Hekàgaw ta'yr ipy romo ereiko. Ereiko wera'u amogwer hera'yr wanuwi, nekàg wera'u amogwer hera'yr wanuwi.
4Nerehaite ykotok ài. Nezewe rehe we nereiko kwaw amogwer wanuwihawete romo nehe. Ta'e ereker heremirekoagaw puhe ne xe. Maranugar haw ererur neru ker haw pe nezewe.
5Ximeàw wiko Erewi tyky'yr romo a'e. Erewi wiko Ximeàw tywyr romo a'e. Uzàmàtyry'ym teko upuruzuka haw pupe wà.
6Naiko kwaw wapyr iaiw ma'e iapo àwàm rehe waze'eg mehe ihe nehe. Naiko kwaw wanehe we wazemono'og mehe nehe. Ta'e wehaite haw rupi uzuka awa a'e wà xe. Ta'e uzemaraz tapi'ak wanehe wamupàri kar pà a'e wà xe.
7Amono heze'egaiw wanehaite haw rehe. Ta'e ipuruzukaiwahy a'e wà xe. Amono heze'egaiw wakwahy haw rehe. Ta'e upuraraw kar ma'erahy tetea'u purupe a'e wà xe, ma'ea'yr wanupe a'e wà no xe. Amuza'aza'ak putar wazuapyapyr Izaew ywy rehe ihe wà nehe. Amuhàmuhàz putar wazuapyapyr waànàm wainuromo wamono kar pà ihe wà nehe.
8Ne Zuta ne ty. Neryky'yr a'e wà nehe, nerywyr a'e wà nehe no, nemuawate katu putar a'e wà nehe. Uzemumew putar nerenataromo wà nehe. Erepyhyk putar neàmàtyry'ymar wazu'yw rehe ne wà nehe.
9Hera'yr Zuta a'e, nuzawy kwaw zàwàruhua'yr miar izuka mehe har a'e. Uzeamumew u'aw pà zàwàruhu awa ài, zàwàruhu kuzà ài. Aipo amo nukyze kwaw izuwi wà nehe, aipo amo uputupyk putar oho wà nehe.
10Zuta upyhyk putar ywyra'i tuwihawete romo weko haw hexak kar haw a'e nehe. Izuapyapyr wiko putar tuwihawete romo tuweharupi wà nehe. Teko amo ae ywy rehe har werur putar imur pyràm izupe wà nehe. Weruzar putar ize'eg a'e wà nehe.
11Uzàpixi putar weimaw zumena'yr uwà 'yw rehe a'e nehe, uwà 'yw ikatu wera'u ma'e rehe a'e nehe. Uhez ukamir win pupe. Uhez ukamirpuku win ma'eruwy kwer hexakaw hereko har pupe. q1
12Heha ipiràg a'e, ta'e u'u win tetea'u a'e xe. Hàz ixigatu a'e, ta'e u'u tapi'ak kamykwer tetea'u a'e no xe.
13Zemurom wiko putar yryhu iwyr a'e nehe. Heta putar kanuhu pytu'u haw a'e pe nehe. Iziwy oho putar te Xitom tawhu pe nehe.
14Ixakar nuzawy kwaw zumen ikàg ma'e ukupe pe àràm inuromo wemiraha ràm inuromo uzeàpàrirog ma'e.
15Ywy ikatu haw wexak a'e. — Ko ywy ikatuahy hepytu'u àwàm romo, i'i uzeupe. A'e rupi uzemumew, wemiraha ràm imur kar pà ukupe pe. Numume'u kwaw wemipuraraw. Uma'ereko uma'ereko e ma'e ài.
16Nà wiko putar uzuapyapyr wanuwihaw romo a'e nehe. Wiko putar amogwer Izaew ta'yr wazuapyapyr wazàwe nehe.
17Wiko putar moz ài nehe, moz pe iwyr uzeàmim ma'e ài nehe, mozaiw puruzuka ma'e pe rupi wiko ma'e ài nehe. Uxi'u kawaru ipy rehe, ikupe pe har haikwerupi ywy rehe imu'ar kar pà.
18O Tupàn Tuweharupi Wiko Ma'e, hepyro pe nehe. Àro hepyro àwàm iteko.
19Kaz a'e nehe kury. Amo ma'e rehe imunar ma'e uzàmàtyry'ym putar Kaz a'e wà nehe. A'e re oho putar wanaikweromo nehe.
20Azer ywy umuezuz katu putar temi'u tetea'u a'e nehe. Xo temi'u ikatuahy ma'e zo tuwihawete u'u a'e wà. Azer ywy umuezuz putar agwer temi'u a'e nehe.
21Napitari a'e, arapuha kazer her ma'e iàpixi pyr 'ym ài hekon a'e. Memyr ipuràg eteahy ma'e hereko har ài a'e.
22Zuze wiko ma'e'yw ytyzuzàmaw huwake izutym pyrer ài a'e. I'a katu. Hàkàgwer uzeupir pari rehe.
23Iàmàtyry'ymar uzàmàtyry'ym tuwe oho a'e wà. Uzàn haikweromo u'yw heraha pà uwyrapar heraha pà wà.
24Nezewe rehe we ywyrapar ikàg a'e. Izywa ikàg wiwi no. Ta'e Tupàn ikàg ma'e Zako izar umukàg kar a'e xe. Tupàn àràpuhàràn mono'ogar zàwenugar a'e, itahu Izaew wapyro har zàwenugar a'e, umukàg kar putar a'e nehe.
25Tupàn Zuze tu izar a'e nehe, upytywà putar Zuze a'e nehe. Ma'e paw iapo har ikàg wera'u ma'e a'e nehe, omono putar uze'egatu hehe a'e nehe. Umur putar uze'egatu ywak rehe har nehe. Umur putar uze'egatu 'y ywy wy pe har nehe no. Umur putar ma'ea'yr tetea'u izupe heimaw romo wà nehe. Umur putar ta'yr tetea'u izupe wà nehe no.
26Umuezuz putar temi'u tetea'u izupe nehe, umuezuz putar ma'eputyr tetea'u izupe nehe no. Umur putar uze'egatu ywytyr kwehe arer rehe nehe, umur putar temi'u hete katu ma'e ywytyr tuweharupi har wi nehe no. Tuwe a'e ze'egatu paw tuz Zuze iàkàg rehe nehe, ta'e Tupàn wexaexak wera'u Zuze a'e xe, tyky'yr wanuwi a'e xe. Omono uze'egatu hehàpykàg rehe.
27Mezàmi nuzawy kwaw awarahu hehaite ma'e a'e. Ku'em mehe u'u wemizuka kwer. Karuk mehe umuza'aza'ak wemipyhyk kwer, i'i Zako wa'yr wanupe.
28Nezewe Zako umume'u Izaew izuapyapyr waneko haw wà. Heta 12 ta'yr wà. Heta wazuapyapyr wanupe pitàitàigatu wà no. Umume'u a'e ze'eg wa'yr wanupe, uze'egatu imono mehe wanehe. Umume'u uze'egatu ikatuahy ma'e wanupe pitàitàigatu.
29Na'e Zako uzapo kar wemimutar wa'yr wanupe kury. — Amàno etea'i ihe kury. Aha putar teko heànàm wapyr umàno ma'e kwer wapyta haw pe ihe nehe. Heutym pe heipy watym awer pupe itakwaruhu pupe nehe ty wà. Kwehe mehe teko uzutym heipy Eperom Etew izuapyapyr ywy rehe a'e wà.
30Kànàà ywy rehe tuz, Manire tawhu huwake. Itakwaruhu pupe uzutym wà. Kwehe mehe Àmàrààw ume'eg kar a'e itakwaruhu a'e. Ume'eg kar a'e ywy pehegwer a'e no, wànàm wazutym àwàm romo a'e.
31Utym Àmàrààw hetekwer a'e pe wà. Utym hemireko Xar hetekwer a'e pe wà no. Utym Izak a'e pe wà, hemireko rehe we wà. Azutym heremireko Erez a'e pe ihe no.
32Etew izuapyapyr ume'eg a'e itakwaruhu Àmàrààw pe wà. Ume'eg a'e ywy pehegwer izupe wà no, i'i Zako wa'yr wanupe.
33Wemiapo putar haw wa'yr wanupe imume'u re uzeàpàrirog wi Zako uker haw rehe umàno pà kury. Hekwe oho wànàm wapyr teko umàno ma'e kwer wapyta haw pe kury.
