1Inchen tru piraube parøbe masken trømbøig misrøb arruben,
2tru Egiptogurri srua amrruin tirigube yandø chab patsøbene, møskaimbe trenchibig køn: —Egiptomay katøle amba, namuyasig tirigu nubah penønrrigay— cha.
3Inchene Judábe trenchibig køn: —Tru møøbe namune ¡katø! ke kandø cha pasrig kuig køn cha: “Tru ñimui wendø nunewan ñim pera amrrumuingatiibe trube, nan kuimbe kenamisrmørrunrrigay” cha.
4Ñí namui nunewan ka pera ambasheneh, trube, nambe ñuyasig mamig penønrrab kørraambamønrrun cha.
5Inchen ñi namun nun pera ambashmubene, trube, nambe ambamig kømønrrun cha. Kaguende tru møøbe namune trendaig kuig køn cha: “Ñimui nunewan ñim pera amrrumuingatiibe trube, kenamisrmørrunrrigay”— cha.
6Inchene Israelbe trenchibig køn: —Ñimgui nane purø trømbøig kalø mariitan cha. ¿Tru møwane katøgan nuneg tøgaguer chabe, chinchabrre eshkainguaasamørra?— cha.
7Inchene nømbe trenchibelø køn: —Kaguende tru møøbe namuimburappa, namui yauelaimburappa ke chine tab, tab payibig køn cha. Inchabe trenchibig køn cha: “¿Ñimui møskaimbe ka øsig wabig køh? cha ¿Ñimbe katøgan nuneg tøgagøgueh?” cha. Pøs nambe, nø mancha payiilan ka løtamiitøwein kuig køn cha. “Ñimui nunewan pera amrrunrrigay” chinrraitamappe, ¿kan nambe mu isua pønrraig køtah?— cha.
8Inchene Judábe møskai Israelwane trenchibig køn: —Matsinane na asamønrrun cha. Matsinane naba ka ingaru cha, nambe yandø ambamønrrun cha, ñi lata, nam lata, namui ureemera lata kwamønrrappe.
9Chi kømønrrai nune na asamønrrun cha. Na yumay nun katøle pera arrumuinabene, trube, nagurrindø kønrrun cha, na chu uraskatig nai øsig tsuigu.
10Inchawei namun øya srarrøbashmuig kuinguen, katøguen amba pubsruinrrun— cha.
11Inchen møskai Israelbe trenchibig køn: —Pøs mumay katøgan peemay maramdiig chigaaguig købene, trube øyamay ka maray cha: Ñimui kustalmerayu tru møwei ketamelø i pirau chigøben tabig misriilan srua ambay cha, kan lamø bálsamo køben, lamø miel køben, mayzhig irrabelø køben, mirra køben, nueces køben, almendras købengue.
12Angucha srua ambuppe, maya srua ambig kømnetø katø treetøweih srua ambay cha. Ñimui tirigu kustalyu tru anmeran katøle pusrig købigwane trannrrab katøle srua ambay cha. Inchippa pella treenchib kuin købgun cha.
13Incha ñimui wendø nunewan pera, tru Egipto pirau nø karub wabigweimay katø ambay chibig køn.
14Maramburab Marøb Tiusbe tru møg ñimun lastima tøgagønrrai martrain cha. Inchen ñimui katøgan nunewan lelachen, Benjamíngucha katø ñimba attrain cha. Inchen nan nai nusrkalan trubisamig nebubene, chinchibig kui ¡ka treeg nebunrraita!— cha.
15Inchen nømbe tru ketamelanba, katø angucha maya srua ambig kømnetø katø treetøweih srua, Benjamínwan pera, Egiptosrømay kørraamba, Joséwei merrab pubelø køn.
16Inchen Josébe Benjamín nømba arrin kui ashabe, tru nui yau ashibigwane trenchibig køn: —I møguelan nai yamay pera ya, kan waara kweecha tamaray cha, kaguen i møgueløbe kwaløm tøbøtaabe naba manrrab køn— cha.
17Inchen tru møøbe José maig taigwan mara, Joséwei yamay nømune pera ibig køn.
18Inchen nømbe Joséwei yausrømay pera ambi mørabe, kørrø køriimata trenchibelø køn: —Marig merrabwan namui kustalmerayu tru anwan katøle pusrikkurri namune pera ambiinrrun cha. Møimbe namune merrarrawa, chigøben maramba, namune øyeeg, øyeeg mara pønrran tamba, katø namune nømui karua srua kuilø kønrrai maramba inchautan cha, namui burrumeranbañau.—
19Incha yandø kebambi yaskabu puabe, tru Joséwei yawan ashibigwan nømbe waminchab kemallabe,
20trenchibelø køn: —Tiusmanda, namui karubig, nambe tru srøtø kørrørruppe tirigu penønrraptø kørrørruig køn cha.
21Indiibe tru nam werrua amrrua, tru yem kørrømisramsrø puabe, namui kustalmeran kura ashene, møimbe tru tirigu kustalmerayube møilaindøgucha namui anmerabe kerriguba ka purraptindin køn cha, maya unaasiibe, treekke. Møimbe nambe tru anwan trannrrab katøle srua amrruer cha.
22Incha tirigu penamig anbe katø srøig sruamrruer cha. Inchendø nambe tru srøsrø srua amrrui anwane kustalmerayu mu kebusri mørmer— cha.
23Inchen tru Josewei yau chi købigwan nø ashibiibe trenchiptinchibig køn: —Chi isumøtay cha. Chi kørig isumøtay cha. Ñimui Tius, katø ñimui møskawei Tius nøbe ñimui kustalmerayu tru anwan pusriinrrun cha. Nabe ñim pagarai anwane utig kuig køn— cha. Incha tru Joséwei yau chitø tøgaguilan ashibiibe Simeónwan wesrawa, nøm purraisrømay pera arrua,
24trugurrimbe José waisrømay pera ya, nømui srømmeran kwalamig pi tranøb, burrumeran mannamig pønsrøb inchibig køn.
25Inchen nømbe ketamelan tamara, José israyu pumnegatig muniirabelø køn, kaguen mamiibe truyu kønrrabig kui nømbe wammøra purrøwa.
26Inchen yandø José yau pubene, nømbe tru ketamelø srua amrruilan keta, nømbe Joséwei merrab pirausrøngatig maløwan trarrøb utsøbasrøbelø køn.
27Inchen Josébe payibig køn: —¿Maig meløgue? cha, ¿Tru ñim wamindig ñimui møskai kølli misaazhikkan katøgucha ka øsig wabig kuitarru?— cha.
28Inchene nømbe trenchibelø køn: —Tru namui møskai, ñi maig chiben martrabiibe, chigucha kømø, tab ka wan cha. Ka øsig wabig køn— chabe, nune tab indig kønrrai utsøbasrøbelø køn.
29Inchen Josébe nuin pøtøgatan ashabe, tru kan møskaindø, kan usrindø kuikkurri nuimbe trag nuneg Benjamín pasrai ashabe, trenchibig køn: —¿I tru ñimui wendø nuneg kuitarru cha, tru ñim nan wamindig?— Inchabe trenchibig køn: —Tius maya nuguen ñun tab indig kønrrain cha, nai nusrkai.—
30Inchen nui nunewan ashene, kishig købiibe yandø pasramgaig køben, Josébe mallatø webya, nui kwartuyu kebya, kisamburab kishibig køn.
31Incha yandø awentawa, nui maløwan kwalla, webarruabe, trenchibig køn: —Mamiimera nøm manrrai pønsray— cha.
32Inchen José mab wamisramibe nøørø køben, katø nunelane nøørø tamara purrønana, egipciosmera tru Joséba mabelane katø nøørø mab purramig tamarøbelø køn, kaguende egipciosmerabe nøm kørewa tøgaguigube hebreosmerababe trubalatø purramisra mamig kømíig kua, kaguen nømuimbe treebe larrø trømbøig købig køben.
33Inchen Joséwei nuneløbe nui merrab purrabelø køn, José maig purramisringaruben, treekke. Kerrigu mayurmerrig, trugurrimbe tru wendauig treetø, treetø nøm maya yanailø køben, trumay treeg purrønnøbig køn. Inchen nømbe truba kwaariilø purrabelø køn, nømbe ¡katø! kangurri, kangurri asiyab.
34Incha Josébe tru nui mishatsigu chi mamiimera pønsraigwan tru mamiimeran nømun pirishibig køn. Inchen Benjamínweyasiibe trattreelaimburabigwan nuyasiitø pasrøbig køn, kanelan lataitøguen kømø. Incha nømbe Joséba kanbalatø mab, muchib truba truba kasraarabelø køn.
