Faliꞌ Fagafeꞌma Esis Korini 2

1

2

3

4

5

6

7

8

9

10

11

12

13

14

15

16

¹Alipipai aeꞌipai, fowaꞌ agafeꞌmago ipaꞌ awalapa basef endilisifi Godi ma ipaꞌ, ina awalapef aꞌif aloma gawa aeꞌani luꞌwani, ma basef buꞌwambuꞌwafi ma igaꞌiꞌipipa, owaꞌatin.

²Deiꞌ main, okom aeꞌami mandandaꞌ naꞌamba. Afamba aeꞌ ape agalomepa ina ataꞌ okom mapoma anom maefah daiam, owaꞌ. Okom maseꞌe hiahaom. Aeꞌ okom mondapoma Jisas Krais atona. Ahoꞌ, anen nagaꞌ lawag usiꞌigai tiꞌwanaegai.

³Isimba atis nemaf afamba ape agalomepa, aeꞌ owaꞌ banagewea, aeꞌ pupuliwi. Aeꞌ ombal mahe bolatin ape aꞌowaꞌ.

⁴Eaꞌ basef agaꞌifa basef buꞌwafi Kraisi, ifimba ina aꞌif gawa aeꞌani aloma epesa igahekelipai, owaꞌatin. Aeꞌ aꞌipipa ihimbaꞌmepa banagami Ambal buꞌunai Godi atona.

⁵Andaꞌas naꞌamba ma ipaꞌ ina ukup paipaila gawa epesi deiꞌ pahapifa God, owaꞌ. Andaꞌasa ipaꞌ ukup pehafel pigapigaila banagami Godi atom deiꞌ pahapifana.

⁶Ahoꞌ endilisi. Aeꞌ awalapa basef gawa nagapaifi ma epes isimba mamahisa sahapifa Goda banages eaꞌ sandaꞌ waf ananifi. Apaꞌ gawa iniꞌi, ina itap apaini, aꞌa gawa amam agufumi ma itap apai anaf higiligalam lamonami.

⁷Waf aeꞌafi fowaꞌ fagape naꞌamba, deiꞌ wapani, awalapa basefa gawa Godi atin. Basefa gawa inimba fowaꞌ nape nandambahoꞌma epes, fowaꞌ gani God ataꞌ owaꞌ nondaꞌ itap apaꞌea anen eaꞌ nandandepa gawa inimba ma mogofaꞌ banagami mogogalaꞌi ananimi.

⁸Owaꞌ anona aman atotona agilinai ma itap apaꞌe nogawa basefa gawa inimbaea, owaꞌatin. Iꞌi amom mogawanai, deiꞌ ina mofaꞌ Dembinai mondolana lawag usiꞌigai tiꞌwanaegai, owaꞌatin. Deiꞌ main, aman anamba banagonai mogogalaꞌi banagamunai endilisi. Apaꞌ owaꞌ, owaꞌatin. Amom agufumi ina mogawa basefa gawa inimba, owaꞌ.

⁹Apaꞌ aeꞌ aꞌi basefa gawa inimba siꞌi Baibel naꞌias nagaꞌi, “Hiahaom maim God nagandondombam eaꞌ ma epes mamahisa ukup pagaila anen endilisii, amamba aꞌ mikilaꞌ ukup epesi. Esis ina laꞌifis sameꞌam satolom sagawama ukupi naep aligah asasisi, owaꞌatin.”

¹⁰Apaꞌ God nawalapa hiahaom amamba mandawalapa apaꞌ ma Ambal buꞌwinai ananinai. Ambal Godi nati hiahaom hiami mape mandamabahiꞌi, eaꞌ natolom nogawa nomonas hiasi ma waf Godi fape fandambahoꞌ apeꞌi.

¹¹Deiꞌ epen mamahina ipeꞌini negawa nomonas anin epeni? Owaꞌatin. Ambal epen inimbai atol logawas. Eaꞌ naꞌamba atin, ina anin epen negawa okom Godi, owaꞌ. Ambal ananinai atona nogawana.

¹²Apaꞌ ina mofaꞌ spirit ambal itapali, owaꞌatin. Apaꞌ deiꞌ mofaꞌ Ambal buꞌunai Godi ma mogogawa hiahaom maim God nogasoꞌapam dowafi.

¹³Amamba ina nomonas gawa epesi saꞌipian, owaꞌatin. Amamba basef Ambal buwali Godi nagawalapafi. Deiꞌ aꞌipasa basef ifimba awalapef aꞌifa Ambal buꞌunai Godi ma epes isimba mamahisa Ambal Godi nagapaisi.

¹⁴Apaꞌ epen ami Ambal buꞌunai Godi akan, anin ina laꞌifina negefaꞌ hiahaom amamba fasim Ambal Godi nogosoꞌapam dowafi, owaꞌatin. Epen inimba okom mapoma amamba naꞌi falafumi sondaꞌam ki deꞌiafami. Anin ina negawam, owaꞌ. Deiꞌ main, Ambal buꞌunai Godi atona nawalipasa amamba kofagema.

¹⁵Epen mamahina Ambal buꞌunai Godi nagapaini, anin nagahihiꞌ hiahawes hiasi. Apaꞌ ina anin epen laꞌifina nigahihiꞌ epen inimba Ambal Godi nagapaini, owaꞌatin.

¹⁶Ahoꞌ, “Deiꞌ epes ami sogawa hiahawesa okom Dembinaii ma atiasi laꞌifisa sigihimbaꞌma anis? Owaꞌatin.” Apaꞌ deiꞌ apaꞌ mofaꞌ okom Kraisi mapaepa.