Föför 5:4-15

⁴Ifa usun, esap fanüom mwen om ka amömöla? Nge mürin om amömöla ewe moni esap noumw? Pwota ka ekiekin föri ei sokun lapalap? Kosap chofona ngeni aramas, pwe ka chofona ngeni Kot.”

⁵Lon ewe chök otun Ananias a rong ekei kapas, a turula o mäla. Iwe, ir meinisin mi rongorong usun mine a fis ngeni, ra fokun rükö.

⁶Mürin ekoch alüal ra ütä o tükümala somän we, ra ekiewu lükün o peiaseni.

⁷Ina epwe ülüngat awa mürin pwülüan we a feito, nge esap silei mine a fis.

⁸Iwe, Petrus a aisini, “Kopwe üreniei ika iei unusen ewe moni en me pwülüom oua angei fän iten fanüemi we?” Neminewe a pölüeni, “Ewer, ina chök ükükün.”

⁹Iei mine Petrus a üreni, “Pwota en me pwülüom oua tipeeufengen le sotuni Ngünün ewe Samol? Nengeni, ekewe alüal mi peiaseni pwülüom we ra nom lükün ewe asam iei, repwe pwal ekiikewu!”

¹⁰Lon ewe chök otun neminei a turula arun pechen Petrus o mäla. Iwe, ekewe alüal ra tolong o küna pwe Safira a mäla. Iei mine ra pwal ekiewu o peiaseni ünükün pwülüan we.

¹¹Iwe, unusen chon ewe mwichefel me meinisin mi rongorong usun ei pworaus ra fokun rükö.

¹²Iwe, ekewe soukünö ra föri chomong manaman me asisil me lein ekewe aramas. Ekewe chon lükü meinisin ra mwichfengen lon ewe leni itan “Pwalangen Salomon.”

¹³Esap wor eman me lükün ar we mwich a pwora le chu ngeniir, inamwo ika ekewe aramas ra meninitiir o kapasöch usur.

¹⁴Nge a chomongola mwän me fefin ra lükü ewe Samol o pach ngeni ewe mwich.

¹⁵Pokiten mine ekewe soukünö ra föri, aramas ra ekieto chon samau won ekewe al o alenier won peet me kieki, pwe are Petrus epwe pwereto o pwere seniir, nürün epwe tori ekoch me leir.