Föför 18:17-26

¹⁷Mürin ir meinisin ra turufi Sostenes, ewe samolun imwen felikis, o wichi mwen ewe lenien kapwüng. Nge Kallio esap ekieki usun mine ra föri.

¹⁸Iwe, Paulus a nonom ren ekewe chon lükü Jesus lon Korint lon chomong rän. Mürin a feila seniir o a sai ngeni Siria, nge Prisila me Akwila ra eti. Me mwen än Paulus epwe sai seni Kenkrea, a reipöpöla möküran pokiten eu pwon a eäni.

¹⁹Iwe, ra tori Efisos, ikenan Paulus a likiti Prisila me Akwila. Nge i a feila lon ewe imwen felikis o kakapasfengen me ekewe chon Juta.

²⁰Ir ra tüngor ngeni, pwe epwe nonom rer ekoch fansoun, nge i esap tipeeu ngeni.

²¹Nge lupwen a feila seniir, a pwon ngeniir, “Are epwe letipen Kot, üpwe liwinsefälito remi.” Mürin a sai seni Efisos.

²²Iwe, lupwen a tori Seserea, a pwal feila ngeni Jerusalem o kapong ngeni chon ewe mwichefel. Mürin a feila Antiokia.

²³Mürin an nonom ekoch fansoun ikenan, a feila seni Antiokia o fetalfeil lemenen ewe fanü Kalatia me Frikia. Iwe, a apöchöküla ekewe chon lükü Jesus meinisin.

²⁴Lon ewe fansoun eman chon Juta itan Apollos, i a uputiu lon Aleksantria, a tori Efisos. Ätei eman mi silelap le afalafal, a pwal silefichi kapasen lon ekewe Toropwe mi Pin.

²⁵A fen kaiö usun Alen ach Samol o seni pöchökülen pwapwan letipan a afalafal o aiti ngeni aramas ekewe mettoch mi enlet usun Jesus, nge a chök silei usun än Johannes angangen papatais.

²⁶Ätei a popuetä le afalafal fän pwora lon ewe imwen felikis. Nge lupwen Prisila me Akwila ra aüseling ngeni, ra uweela lon imwer o awewefichi ngeni ewe Alen ach Samol.