24 Iyan ebayàbayà is Nengazen te untung ta, umbe kenè ta egketuenan ke hengkey is egkeulaula kenita.
25 Ebpekezezaat is kegkemeǥègaanen te kebpenangdù he ibpemuhat nu is sevaha he azen diyà te Nengazen. Kinahanglan he purung ka isip-isip ne human ka penangdù.
26 Emun edhukum is hadì he uluwanen, ne edtegteǥaman din he metueni zin ke hentei is nekevaal te sayep, ne edsilutan din heini.
27 Is isip ta ne egamiten te Nengazen wey mereyaǥi is untung ta, ne pinaaǥi kayi egkesusi ta is keugelingen ta.
28 Emun hihizuwen wey metinumanen is sevaha he hadì, ne wazà ebpekezezaat kandin ne ebpedayun is kedhadì din.
29 Is igkezeliǥi te menge vetan-en he maama iyan is desen dan, ne iyan igkeventuǥa te menge meǥurang is keǥuǥurangi zan.