3 Is kebaal te mezaat wey mekeeled-eled he vaal ne iyan ebpekeveǥey te keelezan.
4 Is menge lalag te uluwanen he etew ne ebpekeveǥey te ketau te zuma; iring te edtudà he wahig he ziyà ebpuun te mezalem he serebseb he kenà egkemezahan.
5 Kenà meupiya is kedapig te selaan wey is kenà kebeǥey te kevenar ziyà te ebpekevenar.
6 Is menge lalag te tulebung he etew, iyan puunà te tebek wey iyan igkesekiti zin.
7 Is kegkaǥikaǥi te tulebung he etew ne iyan ebpekezezaat kandin.
8 Is ituk, iring te metaam he keenen he egenahan ki he ed-eveleng duen.
9 Is etew he igkepeǥuli zin is terebahu zin, ne iring te etew he ebpendezaat.
10 Is Nengazen, iring te melig-en he turi he iyan egkeeputan te menge metazeng su wey zan kenà mekeizi.
11 Is ketiǥeyunan te menge sepian, midtuuwan dan he iyan kutè dan he iring te metikang he verengbeng he nekeliǥuy te inged.
12 Is kebpelavew te etew ebpekezezaat kandin, iyan, edeliǥen mulà is etew he kenà mepelevawen.
13 Taleng wey ebpeeled-eled is etew he tekew en edtavak te wazè din pemineǥa.
14 Is kelipey he egketaǥù diyà te ǥehinawa te etew, iyan ibpekesustinir zin emun egkezeruwan, iyan, emun seeng is egketaǥù diyà te ǥehinawa zin ne kenà sikandin ebpekesustinir.
15 Is etew he uluwanen wey zuen din kedsavut, egkesuat he meumani pa is netuenan din.
16 Melemu is kebpekidhinguma ta te dungganen he etew emun ed-uwit ki te ibeǥey ta kandin.
