Erubasa 18:3-16

³Is kebaal te mezaat wey mekeeled-eled he vaal ne iyan ebpekeveǥey te keelezan.

⁴Is menge lalag te uluwanen he etew ne ebpekeveǥey te ketau te zuma; iring te edtudà he wahig he ziyà ebpuun te mezalem he serebseb he kenà egkemezahan.

⁵Kenà meupiya is kedapig te selaan wey is kenà kebeǥey te kevenar ziyà te ebpekevenar.

⁶Is menge lalag te tulebung he etew, iyan puunà te tebek wey iyan igkesekiti zin.

⁷Is kegkaǥikaǥi te tulebung he etew ne iyan ebpekezezaat kandin.

⁸Is ituk, iring te metaam he keenen he egenahan ki he ed-eveleng duen.

⁹Is etew he igkepeǥuli zin is terebahu zin, ne iring te etew he ebpendezaat.

¹⁰Is Nengazen, iring te melig-en he turi he iyan egkeeputan te menge metazeng su wey zan kenà mekeizi.

¹¹Is ketiǥeyunan te menge sepian, midtuuwan dan he iyan kutè dan he iring te metikang he verengbeng he nekeliǥuy te inged.

¹²Is kebpelavew te etew ebpekezezaat kandin, iyan, edeliǥen mulà is etew he kenà mepelevawen.

¹³Taleng wey ebpeeled-eled is etew he tekew en edtavak te wazè din pemineǥa.

¹⁴Is kelipey he egketaǥù diyà te ǥehinawa te etew, iyan ibpekesustinir zin emun egkezeruwan, iyan, emun seeng is egketaǥù diyà te ǥehinawa zin ne kenà sikandin ebpekesustinir.

¹⁵Is etew he uluwanen wey zuen din kedsavut, egkesuat he meumani pa is netuenan din.

¹⁶Melemu is kebpekidhinguma ta te dungganen he etew emun ed-uwit ki te ibeǥey ta kandin.