Epeses 1

1

2

3

4

5

6

¹Au Paulu, yo Maro itoo ya taunu lono a ipootau be ayei aposol ke Yesu Kirisi i, in awodo rau naii pang ang di tooltool ke Maro yo katara lomim medana pang Yesu Kirisi a kayepe ye malala mai Epeses nga.

²Nen le apatarau pang Tamada Maro iye Tool Mai kiidi Yesu Kirisi be lodi pang a tiyei dada dook mata pang, inbe tikaua lo silene kidi pang.

³Tayitmaka Maro yo Tool Mai kiidi Yesu Kirisi Tamana, in ene. Ngan ya in iyei urata dook mata paidi, inbe ye urata yo Kirisi iyeii paidi i, in ikap so matana matana le imot yo ipa ye malala ki nga, ngan paidi be ilonidi ye.

⁴Ngan nen le ye kene yo Maro itar so le imot ke lang le tana a pompombe tiao nga, ngan ipootidi tooltool yo taye Kirisi tagaua le atu nga, ngan panga, a be nen ngan tatoo dada le imot yo ya lono be tatoo nga, inbe tayepe le taukada busunu ye matana. Ya in lono paidi mai san,

⁵ngan la le mukot yege ni nga, ngan lon taridi nen, be ole ikau idi kan le tayei ben ya di natunu ye urata yo Yesu Kirisi iyeii i. Ngan ya in lon ponana be iyei so yo nen nga, ngan la le itoo ya taunu lono ye so yo iyei nga.

⁶Ngan nen le tayitmaka ene le ilo ete ye yo lono paidi mai san a le iyei dada yo dook mata ki taunu, ngan paidi nga. Ya in iyei dada dook mata yo nen ngan le maiyoko kaiye paidi, ye Natunu yo lono panga mai san i.

⁷Le Kirisi iraia tinini mai i le imot a tiraumate be iyimidi ye rara ki yo imati ye kene yo imata ye i. Nen le ikarata dada pang Maro be igiri noonoo yo kiidi nga. Le ye dada tani yo iyeii nen i, in itoo Maro lono, yesoo ya in lono paidi ngan la le iyei dada yo dook mata le dook mata san, ngan paidi.

⁸Ngan nen le ya in iyei dada dook mata paidi, inbe ikap lo galanga paidi, a be nen ngan lod galanga ye dada dook mata le imot yo lono be tatoo nga.

⁹Inbe dada tani yo lon taru a iken sollono i, in lon ponana be ipaposi paidi ye urata yo Kirisi iyeii i.

¹⁰Le dada tani in nen: Ya in ole matan kala so tina nga le imot le lo tagoro lal yo itaru be Yesu imulu a isi ye in nga, ngan la be iwinoko so tina yo ke malala ki ngan le ipa ye ke tana i nga, ngan le imot man igaua, inbe itar du Kirisi parmana a be nen ngan iyei kuto mai panga inbe matan kala.

¹¹Le Maro in iyei so tina le imot a pombe ben tina yo lon kaua urata ye nga. Nen le mukot yege ni nga, ngan lon taridi nen, be ole ipootidi tooltool yo taye Kirisi tagaua le atu nga, ngan panga, a be nen ngan tayei ben di tooltool ki.

¹²Ngan iyei nen a be nen ngan am Yuda tina yo amtara lomam le atu pang Kirisi muku nga, ngan amyitmaka Maro ene le ilo ete ke be di tooltool tipayiti ye.

¹³Inbe ang di tooltool yo kapa ye rara kidi Yuda tiap, ngan lapau, ang ngan kaye Kirisi kagaua le atu. Yesoo, ye kene yo kalongo betanga moolmool ye dada yo be Maro ikau ang a ipamulang ye so dook tiap yo be igarungang in nga, ngan le katara lomim medana ye bingi dook mata tani nga. Nen le Maro Amunu Silene yo ipamede betanga ye be ikauu pang i, in ikauu pang a be nen ngan itarkalang ben ang ngan di tooltool ki.

¹⁴Le Maro Amunu Silene tani yo ikauu paidi i, in iyei ben tarkilanga paidi be so dook mata le imot yo ipamede betanga ye be ikap paidi nga, ngan ole ikap paidi moolmool. Ngan nen le lod galanga nen, pang dama ni ngan Maro ole ikap di tooltool ki yo iyimi di ye rara ke Kirisi nga. Nen le ole tayitmaki, inbe tayeie ene le ilo ete ke be di tooltool tipayiti ye.

¹⁵Ye kene yo alongo bingi kiang be katara lomim medana le ikenen leu pang Tool Mai Yesu, inbe lomim pang di tooltool ke Maro le imot mai san nga,

¹⁶ngan le amaryoo tiap, bong kanakana ngan lok tutang a apatarau yang, inbe awete lo ponana kiau pang Maro yang.

¹⁷Inbe asootoo torungu Maro, yo Tool Mai kiidi Yesu Kirisi Tamana inbe takamata ben ene mai san ke be di tooltool tipayiti i, in ye pataraungu be ikap lo galanga pang ye dada dook mata yo lono be katoo nga, inbe ya taunu ole ipapos dada tina pang, a be nen ngan lomim galanga ye dook.

¹⁸Inbe apatarau pang Maro be sul ki ole ilangarai lomim, a be nen ngan lomim galanga dook ye dada dook mata yo be ole iyei pang di tooltool yo ikiu di nga, yesoo so tina ngan la tatar matada a tanam ye nga, inbe ole lomim galanga dook lapau ye so dook mata yo ipamede betanga medana ye be ole ikap pang di tooltool ki ya taunu nga. Ngan so tina ngan dook mata le dook mata ki taunu.

¹⁹Inbe apatarau lapau be ole ipagalanga lomim, a be nen ngan lomim galanga dook ye gurana ki yo ilonidi tooltool yo tatara lodo medana panga ye i, in mai san le illos gurana ke so nga le imot i. Ngan gurana ki yo ilonidi ye i, in gurana tani

²⁰yo pombe le mai ye kene yo Maro ipamaditi Kirisi ye ni ke matenge a ikauu lo ye malala ki le lo iwur ye baene oonoo ye ni yo be iyei kuto mai ye i.

²¹Ngan nen le Kirisi in iyepe ete, inbe gurana ki mai mata le illos di so sadi yo tiyei kuto maimai pang lang le tana nga, inbe di so sadi yo gurana kidi mai mata nga, ngan le imot. Le ene ilo ete san, le illos di nookoot katai ngan leu tiap, bong pang dama ni ngan lapau.

²²Nen le Maro itar so nga le imot la gurana ke Kirisi parmana, inbe ipootoo be iyei kuto mai pang so tina nga le imot, inbe pang di tooltool yo tigaua ye bareme ke Yesu ngan lapau.

²³Ngan idi tooltool tina yo tagaua ye bareme ke Yesu nga, ngan tayei dawa ben Kirisi tani in baene le kene inbe soonoo kapala yo ke tinini nga. Le ipaponidi ye gurana ki, dawa ben ipapon so nga le imot yo iken ye ni mai i le imot ngan ye gurana ki lapau nga.