1Kam kpayarụ, rụmu nda m, ele zị nsọ, ele vu osukwu ikwu oligwe, anụ rị ọriri nhne gbasịri Jizọsi, nye izi, nụ nye risi arịohna ke ọkwnata ovu aị.
2Ọ bụ nye kwesiri ọkwnata ovu nyee nye họhiaru a, lele kpa Mozizi bụri nye be tụkwasiri ovu nụ kpakara ẹrnu a n'ọro Chiokike.
3Jizọsi kwesiri o nwe igwugwu ke kakwo igwugwu Mozizi lele kpa nye wuru ọro nwernu igwugwu karụ ọro o wuru.
4Kwnornu nụ kpakara ọro nwernu nye wuru a, kọvu Chiokike wuru kpakara nhne.
5Mozizi, lele nnwọ izi be kwesiri ọ tụkwasi ovu nụ kpakara ọro a, gbarụ akebne nhne be jookwu nụ ruwhnu.
6Kọvu Karaịsi kwesiri ọkwnata ovu lele nnwọ n'ọro Nda a. A bụ ọro a, ọ bụru a bịta mkpọma siri rikne aị, gwuzosi masị rikne nụ nhne a neele anya a.
7Lele kpa Enine Nsọ karụ, “Tna, ọ bụru nụ anụ nụrnu nkọli a,
8anụ mée ovu anụ si rikne, lele kpa ele Izirẹli mernu nga be gwuzogidnernu Chiokike, ige ọrnurna n'ẹli-ịkpa.
9Nga ele nda anụ ọknani kparụ m iru, kpahịa m, be whnụrnu ẹrnu m nri awha ẹno.
10Ovu weru m ẹhni kwnornu ebiri kam, m kaa, ‘Mkpọma be noowhu apna, be kwége ọ bịta iwu m.’
11Kam kpayarụ, m ji m ovu owe ẹhni dụ risi, kaa, ‘Be jáabna hne me jeenye be ozukwa inwe.’ ”
12Rụmu nda m, anya dụ anụ ẹli, ọ zá nye ọbula n'esilawụru anụ ke jeenwe ovu mmehie ke kwé ekwe ke jeeme a ọ whọga nụ hne Chiokike ke zị bụdnu zị.
13Kọvu anụ kwnagidne ibne anụ hnebụko ọbochi be kwuru “Tna.” Ọ zá nye kwe aghịgho ke mmehie mee ovu a si rikne megidne Chiokike.
14Kwnornu nụ ọ bụru a jidne ọkwnata mkpọma a nwernu nụ mbọm dụ okwukwo, aị nụ Karaịsi jeekekọ nhne.
15Lele kpa be gbarụ n'ọkwukwo nsọ, “Tna, ọ bụ nụ anụ nụrnu nkọli a, anụ mékọ ovu anụ si rikne lele kpa ele Izirẹli mernu nga be gwuzogidnernu Chiokike.”
16Ndaa ele nụrnu nkọli Chiokike mee risi rikne? Ọ bụ́o ele Mozizi hiri n'ẹli Ijipiti duhịa sa?
17Ndaa ele Chiokike wesanụ ovu ẹhni nri awha ẹno? Ọ bụ́o ele mehieru, bụ ele iznu be dnarnụ n'ẹli-ịkpa?
18Ndaa ele Chiokike dụru risi nụ be jáabna nụ hne o jeenye be ozukwa inwe? Ọ bụ́o ele bnóge nsnị?
19A whnụrnu nụ be bnáge hne o jeenye be ozukwa inwe kwnornu nụ ókwe ekwe be.
