Eks 13:20-42

²⁰Wal imbin 450 yiya brom det taim wen imbin pikimat olabat raidap det taim wen imbin gibit olabat det kantri. “Afta na God bin gibit detlot Isreil pipul sambala men blanga jidan bos blanga olabat raidap det taim weya det speshalwan mesinja neim Semyul bin jidan bos,

²¹en afta wen detlot pipul bin askimbat God blanga gibit olabat king, imbin pikimat Sol blanga jidan king blanga olabat. Sol bin san blanga det olmen neim Kish brom det Benjamin klen, en imbin jidan king fo 40 yiya,

²²en afta wen God bin deigidawei im, God bin pikimat Deibid blanga jidan king blanga olabat. “Wal yumob sabi wanim God bin tok blanga Deibid? Deibid bin san blanga det olmen neim Jesi, en God bin tok, ‘Ai laigim Deibid, dumaji im oldei jidan jis laik ai wandim im blanga jidan, en ai sabi im garra oldei duwit langa mi wen ai dalim im enijing.’ Lagijat na God bin tok blanga Deibid.

²³En brom im femili na God bin gibit ola Isreil pipul det men weya imbin pramis garra seibum olabat, en det men im neim Jisas.

²⁴Bifo Jisas bin stat dumbat im wek, det men neim Jon Beptis bin dalimbat ola Isreil pipul blanga tenim miselp brom olabat nogudbalawei en beptais,

²⁵en wen Jon Beptis bin gulijap binij det wek weya God bin gibit im, imbin dalim ola pipul. ‘Yumob lisin langa mi na. Mi nomo det Boswan weya yumob weidabat. Det Boswan garra kaman biyain langa mi, en mi nomo gudinaf blanga dum enijing blanga im.’ Lagijat na Jon Beptis bin tok blanga Jisas.

²⁶“Wal main kantrimen olabat, en ol yumob Jintail pipul iya hu weship God, yumob lisin langa mi na. God bin jandim langa wi det wed blanga det men neim Jisas hu garra seibum im pipul olabat.

²⁷Ola pipul en ola bos blanga olabat deya langa Jerusalem nomo bin sabi hu Jisas, en nomeda ebri Sebathdei deibin oldei ridim detlot wed weya ola speshalwan mesinja blanga God bin raidimdan, bat stil dei nomo bin sabi blanga hu detlot wed bin oldei toktok, en deibin meigim detlot wed hepin trubala, dumaji olabat na bin kilim Jisas ded.

²⁸Dei nomo bin faindim eni folt langa im blanga kilim im ded, bat stil deibin askim det gabman bos neim Pailat blanga kilim im,

²⁹en deibin neilimap im langa det kros, en afta wen deibin dum ebrijing langa im weya det oltestaman bin tok dei garra dum, deibin deigimat im bodi brom det kros, en deibin pudum im langa det keib.

³⁰Bat im nomo bin jidan dedbala, dumaji God bin meigim im gidap laibala,

³¹en lodataim imbin kamat langa detlot pipul hubin bulurrum im brom Gelali raidap langa Jerusalem, en detlot pipul na oldei dalimbat det gudnyus langa ola Juwish pipul.

³²“Wal minbala bin kaman iya blanga dalim yumob det gudnyus, en iya na det gudnyus.

³³Det pramis weya God bin meigim longtaim langa wi grengrenfatha olabat, imbin dum blanga wi na, dumaji imbin meigim Jisas gidap laibala brom dedbala. Jisas na det Boswan gulum Masaiya, dumaji im det San blanga God. Wi sabi tharran, dumaji God bin tok langa det sekanwan Saam. ‘Yu na main san, en tudei na ai garra jidan Dedi blanga yu.’

³⁴“Wal God bin meigim im san gidap laibala, en im kaan dai igin, dumaji God bin tok langa oltestaman lagijat. ‘Ai garra gibit langa yu ol detlot speshalwan ting weya aibin pramis langa King Deibid.’ Wal God kaan gibit detlot ting langa dedbala. Im garra gibit langa laibala.

³⁵En langa najawan pleis langa oltestaman King Deibid bin tok, ‘Yu kaan larram det speshalwan wekinmen blanga yu go nogudwan langa greib.’

³⁶“Yu si? King Deibid bin dumbat det wek blanga God wen imbin laibala, en afta wen imbin dai, deibin gaburrumap im bodi wansaid langa im grengrenfatha olabat, en im bodi bin go nogudwan.

³⁷Bat im nomo bin hepin lagijat langa tharran weya God bin meigim im gidap laibala.

³⁸“Wal main kantrimen olabat, minbala wandim yumob garra sabi oni thru Jisas na God gin larramgo yumob fri brom yumob nogudbalawei.

³⁹Det lowa blanga Mosis nomo bin larramgo yumob fri brom ola nogudbala ting. Bat if yu bilib langa Jisas, wal God garra larramgo yumob fri brom detlot ting.

⁴⁰Longtaim langa oltestaman det speshalwan mesinja blanga God neim Hebakak bin tok, ‘Ol yumob pipul hu oldei meigim fan langa det wed blanga God, yumob garra jinggabat na, dumaji yumob garra ol dai. Wal yumob garra dai, dumaji yumob kaan bilib wanim God garra dum tudei. Nomeda sambodi dalim yumob blanga det ting, bat stil yumob kaan bilib.’ Lagijat na det mesinja bin tok. En yumob tudei garra wotjim miselp en nomo larram det ting hepin langa yumob du.” Lagijat na Pol bin tok langa detlot pipul langa det Juwish Miting Pleis.

⁴²Wal wen Pol en Banabas bin stat blanga gowei brom det Miting Pleis, detlot pipul bin askim dubala blanga kambek det neks Sebathdei en tok langa olabat blanga detlot ting.