Eklesiastes 7:2-26

²Kabfel’ ni ngan yan nga ba tabinaw ni yibe dololoy’ riy ko bin ngan yan nga reb ni yibe mur riy, ni bochan e pi’in ka yad bfos e thingar ur puged woran ngorad ni yam’ e gadad gubin ni be son nagdad.

³Kireban’ e kabfel’ ko minmin, gomanga ra i kirebnag owchem, machane ra uthum e nangan’ rom.

⁴Be’ ni yug ma leamnag rogon e felfelan’ e bbalyang. En nib gonop e ma leamnag rogon e yam’.

⁵Kabfel’ ni ngi i puwan’ e pi’in nib gonop ngom ko bin ngi i tang nagem e girdi’ ni manan’ ni yad be yog e sorok ngom.

⁶Fa’anra minmin be’ nib balyang, ma bod e rachangal ni be chub lingan u mit ba nifiy. Dariy ban’en ni fan.

⁷Fa’anra bannag be’ nib gonop be’ ma be ngongol ni bod e balyang. Fa’anra ga be fek puluwon e kireb ma ga be kireb nagem.

⁸Ra nmu’nag ban’en ma kabfel’ nga ban’en ni kafinni tababnag. Ku bfel’ e gumaen’ ko tolngan’.

⁹Mu kol ayuw ko damumuw rom; defel’ ni ngam cha’riy e kireb u wun’um.

¹⁰Dariy bangiyal’ ni ngam fith ni nge lungum, “Mangfan ni ka ba gel e fel’ ko tin ke thumur e rran?” De gonop e bin e duwer.

¹¹Gubin e pi’in kabfos ma ri dabisiy ni ngar gonopgad; ya bod feni fel’ ni kan thum’nag e gayog ngom

¹²mra yororiyem ni bod rogon e salpiy. Gonop e ra aywegem ndabi buch ban’en rom — irera’ fel’ngin e llowan’.

¹³Mu leamnag murung’agen e n’en nike rin’ Got. Uw rogon nra k’iyag be’ e n’en ni tay Got nib bugbug?

¹⁴Fa’anra ga be par ni bfel’ rogon e gubin ban’en u puluwom, ma nge felfelan’um, ma nap’an nra yib e magawon, ma nge yib ngan’um: ni Got e ma pi’ e felfelan’ nge gafgow; I gur e dariy e ngiyal’ ni ga ra nang ko mang e migid ni nge yib.

¹⁵Yafos rog e bm’ayfan, machane gguy riy gubin ban’en. Rayag ni yim’ be’ nib manigil me par be’ nib fos, ni yug aram rogon ni be’ nib kireb.

¹⁶Ere dariy rogon ni nga yigum fel’ ara pag rogon e gonop rom — mangfan ni ngam li’em ngay’?

¹⁷Machane ku dabi pag fanam kireb fa mu thum’ ngaru’ ko balyang, mangfan ni ngamum’ u m’on ni dawor i taw nga nap’an?

¹⁸Ngam pilo’ riy ni l’agruw. Fa’anra bay madgun SOMOL rom, ma dabisiy nra fel’ rogom.

¹⁹Gonop e kabga’ angin ngak be’ ko ragag i tagagiyeg ni nge yib angirad ngab binaw.

²⁰Dariy be’ u fayleng ni go’ tin nib mat’aw e ngongliy ni gubin ngiyal’ ma der ma oloboch.

²¹Dab mmotoyil nga urngin e tin ma yog e girdi’ — ya risach ma ga rung’ag lungun e tapigpig rom ni be yog nem nga dalib,

²²ma ka gur ma gamanang rom nib yo’or yay ni ka ga ma yog boch e girdi’ nga dalip.

²³Gu maruwel ko gonop rog ni nggu sikengnag gubin e pin’ey. Mug turguy ni nggu gonop, machane dag chugur ngay.

²⁴Bu uw rogon me pir’eg be’ fan e yafos? Kay gi to’ar rodad, ma kaygi m’omaw’ ni ngan nangfan.

²⁵Machane ri gu tayan’ug ngay ni nggu fil e llowan’; mu gu t’ar u wun’ug ni nggu pir’eg e gonop nge fulweg ko pi duwer rog, ma nggu nang feni kireb nge feni balyang e pinat.

²⁶Mu gu pir’eg ban’en ni ka ba mo’oy ko yam’ — be’ ni bpin ni bod ba tafich. Adag rok ni be yog ngom e bay mu aw ngay ni bod bang i nug; ma pa’ nike olobochiy ngom e ke michgiyem ngay ni bod e chen. Ma be’ ni mo’on nma yan nga lanyan’ Got e rayag ni thay riy, machane fare pin e rayag e pi’in ta denen ngak.