Ekaresia 2:14-38

¹⁴Se niningero, Peter eredo ambo jimbi 11 ainde dabade isambu 12 ava fefetuseri. Fetedo, Peter nu, evetu genembo totorugusera aikena, beka teriago vironu sisira, “Jerusalem embo a nanda natofo Jusi embo, ne isambu ategi beká ava erena. Nemokena geka evia sari dae erena, ningivu!

¹⁵Nanda geka evia ningi gogoghombevu! Oroko 9 koroko etira. Sifoghae, 9 koroko avavaga mo, jo uvu fakara mindari da sifo iraeri. Ava sedo, namane jo uvu fakara mindido, aito sembae fugaeri. Ne ava jo kotae areva!

¹⁶Ne rea niningereva emo, God da feroveta javo Joel, nu anakora isagha osa sedo gembiri irira. Nu eminge sisira,

¹⁷‘God eminge resira, namokena, “Na, nanda Asisi mutono evetu genembo isambukena vose asugarira. Asugedo irari, na nenda sasingukena nanda geka afigaono, nene isagha sarera. Nenda vide jamena mo, diti mokoi garera, a nenda embabako mo, aturu arera.

¹⁸Nanda saramana kakato, evevetu a gegenembokena, nanda Asisi mutono vose asugari, nanda geka afigaono, sifo aminda nene isagha sarera.

¹⁹Aminguse, nane aono tano utuda a endada sirorari gido, evetu genembo isambu dudukugharera. Aono, ororo, avaraka buburaghae, a imbosi gumba teriago siroredo,

²⁰iji ambarira, a inua kau ororo da kaugo ava sirorari, ainda amboda, nanda Sifo mindafu usasaghae furarira.

²¹Mave sifo aminda, nandae javono gatise kori sarira amo, nu jebuga tambarira,” ’ God aminge setiri Joel gefusira.

²²Ava sedo, nanda geka evia ningivu! God setiri Nasareth embo, mandi javo Iesu, God da saramana ari dae sedo, fira sirorusira. Genembo amo, God sonembeari ari mendeni mendeni eari gido, evetu genembo dudukughedo ghuseri, ‘Eraira emo, God da fakinaimi eraira,’ aminge kotedo ghuseri. Amo, jo reighi eninda siroraeri, nu eminda sirorusira. Ava sedo, ne ava gido kasama aetevu.

²³Avori, God nu Iesu, ambare dae sedo, dirigetiri endada fusira. Ava sedo, ne Iesu ava sandi budo, gegenembo ekoko aikena mutovo arafa daoro ambarira amo, God nu anakora kasama edo, ‘Avori,’ sisira.

²⁴‘Avori,’ sise, nu setiri ne amingusevu. Avata ainda amboda, God nune setiri Iesu ambarida ghe jebugedo erorusira. God setiri ambari da mema dadabusira. Iesu nu fakina kato ava sedo, ambari da fakina aimi nu jo buregae usira, nu jebugedo erorusira.

²⁵David barago Iesu dae sedo, eminge gefusira: ‘Na Bajari sifo ghousa giraena. Nu, namo sonembari dae sedo, nanda ungo gimandukena, fetirá gheraira.

²⁶Ava sedo, na ivuga beká ava erena. Nanda bekaimi nundae sakai seraena. Na genembo ava sedo, na ambarena. Avata Bajari tumonduse, ambari dae oju jo ae eraena.

²⁷Ainda susu mo: Bajari, ni nanda asisi kotise, na ambari da vasa aminda jo doyae aresa. Erama nanda tamo beteure dae sedo, ni saso na jebugarena. Na nimoá kakara eraena aindae sedo, ni amingaresa.

²⁸Na nange nangedo jebugarena ava, ijugeteso geni. A na ninda dombuda evovodae ivuga use irarena,’ ava David Iesu dae sisira.

²⁹“Avori, nanda nano namendi, ningivu! Namondeda abua David da kiki isagha sarena. Nu ambiri bu furugetero, nunda ofofo eminda irira.

³⁰Avata nu jo ambae iriri, God ira numokena beka gagojuse sisira, ‘Ninda imemesiri da mandi eni saono, kotofuko nimongo ava arira,’ aminge sisira.

³¹David nu God da feroveta eniri. Ava sedo, God rejo sisira amo, tumondusira. God rea amboda arira ava kasama usira. Ágido God nange nange sari, Keriso ambarida ghe jebuge erarira, aindae geka evia sisira: ‘God nunda asisi jo ambari vasa aminda doyari irae arira. Nunda tamo jo betae arira,’ aminge sisira.

³²Geka emo Iesu dae sisira. Amo, God nune setiri, Iesu ambarida ghe jebuge eretiri, namane gosuseri.

³³Gero ainda amboda, Numamo God numoá budo, nunda ungo gimandukena fitido, Asisi Kakara anakora mutari sisira ava sedo, numokena futusira. Mutiri, Iesu nu Asisi Kakara ava budo, namanekena mutiri oroko eminda vosedo irira. Ne nunda fakina ava gido a ningido dudukughetevu.

³⁴Geka eni mo: ne kasama ereva, David nu jo utuda viti yaeri. Ava sedo, nu mavedae geka emo sisi? ‘Bajari God nanda Bajarikena sisira, “Fu, eminda! Nanda ungo gimandukena anumbiraso, ninda fakina gaoro dae sedo, ninda gitofu de bundedo budo foama, ninda ata duruda fitono fafasaore!” ’ Geka amo, David nu Iesu dae sisira.

³⁶Ava sedo, ningi gogoghombevu! Ne Israel embo ava sedo, kasama aovo dae resena. Iesu setena emo, nene budo arafa dorusevu. Genembo daba ava, God setiri nu kotofuko edo, namondeda sonembadae sedo irira. Numo Keriso ri!”

³⁷Peter aminge setiri, evetu genembo ningido, oju e bune jaredo, ne Peter kotugo Iesu da ambo jimbi mendeni aikena ategi useri, “Namanenda nano namendi, ne erekoteva, namane nange aeteri?”

³⁸Aminge setero Peter sisira, “God nemo sonembari dae sedo, beka gagojusira. Avata jo nesuka nemova nembo sonembae arira. Nenda imemesiri a oro mendeni mendeni ava, God aghi edo sonembarira. Ava sedo, ne isasambu nenda ari ekoko dodo, furovo namane ne Iesu da javoda bafataito arera. Amingareva amo, God nenda ari ekoko kote dodo, Asisi Kakara mutari vose nemokena asugarira”