Efesu 5

1

2

3

4

5

6

¹Jooni on laatike ɓiɓɓe Alla yiɗaaɓe, gam majjum, yemminee mo.

²Yidde ardanoo goonki mon, hande no ɗum laatii e Almasiihu. O yiɗii en, faa o hokki yonki makko gam meeɗen. O laatake sadaka e kiisaaɗum pottanɗum Alla.

³On laatike himɓe Alla. Gam majjum haanay jeenu, e coɓuɗum fu, e suuno, batanee caka mon.

⁴Hande non bo, haanay haalaaji centiniiɗi, ɗi walaa hoore, e haalaaji baanji baanji, nanee caka mooɗon. Ko haani wurtoo e kunnuɗe mooɗon woni, jetton Alla.

⁵E haani paamon faa wooɗa: Jeenooɓe e soɓuɓe e suunaaɓe, gam suuno laati nun saafugo tooruure, ɓee ɗon fu walaa geɗu der Laamaare Almasiihu e Alla.

⁶To on accee goɗɗo majjina on e haalaaji baanji baanji, gam iri majjum nun waddata mone Alla dow saliiɓe ɗowtanaago mo.

⁷Sabbu majjum, to on kawtee e himɓe iri maɓɓe.

⁸Aran, der niwre gonunoɗon, amma jooni, gam kawtal mooɗon e Joomiraawo, on naati e jayŋol. To non, buuree hande ɓiɓɓe jayŋol.

⁹Gam ko jayŋol rimata woni: geetaaku e foonnitaare e gooŋa fu.

¹⁰Liinyee ko fottanta Joomiraawo.

¹¹To on gattee juuɗe mon e golle gaɗeteeɗe der niwre, ɗe walaa nafuwe, amma cumpitee ɗe.

¹²Ko himɓe ɓen waɗata e suuɗe, baa batugo ɗum e sentinii.

¹³Amma to huune sumpitaama, jayŋol hollitan no ɗum laatii.

¹⁴Huune ko wurtii fu, laatoto jayŋol. Gam majjum acci e wi'ee: «Finu e ɗoyŋol maa, an ɗaaniiɗo! Umma hakkune maayɓe, Almasiihu yaynante jayŋol mum.»

¹⁵Gam majjum, kakkilanee yaadu mon dow no gonirton, to on laatee hande ɓe galaa hakkillo, amma laatee hakkilɓe.

¹⁶To on majjinee wakkati, gam nyalaaɗe ɗe gonuɗen e mum jooni e halli.

¹⁷Gam majjum, to on laatee ɓe walaa hakkillo, amma paamee ko Joomiraawo yiɗi.

¹⁸To on accee bagi doƴƴa on, gam eɗam watta himɓe der hallumaru, amma, kebbee Ruuhu Ceniiɗo.

¹⁹Cemmiɗinontiree e jimi jabuuraaji e jettooje, e jimi ruuhunkeeji. Jimanee Joomiraawo, maantee mo e ɓerɗe mon fu.

²⁰Jettee Alla Baaba wakkati fu e gam huune fu, e inne Joomiraawo meeɗen Yeesu Almasiihu.

²¹Moy mooɗon fu ɗowtano banniraawo mum gam teddingo Almasiihu.

²²Onon rewɓe, ɗowtanee worɓe mooɗon hande no ɗowtorantoɗon Joomiraawo.

²³Gam gorko nun laatii hooreejo dow debbo muuɗum, hande no Almasiihu laatorii hooreejo dow Eklesiya. Kanko woni kisinoowo Eklesiya, laatiika ɓannu makko.

²⁴Hande no Eklesiya ɗowtorantoo Almasiihu, hande non debbo fu, haani ɗowtorano gorko mum, dow huune fu.

²⁵Onon worɓe bo, jiɗee rewɓe mooɗon hande no Almasiihu yiɗiri eklesiya. O yiɗii ka, faa o hokki yonki makko gam makka,

²⁶gam o loota ka e diyam, o laaɓina ka e haala makko.

²⁷O waɗii ɗum, heɓa o darina ka yeeso makko e tedduŋal, ka laatoo ceniika, ka walaa aybe, ɗum bo tuuni, maa bo boofol gom, e huune ko nandi e mum fu.

²⁸Hande non, haani worɓe yiɗira rewɓe mum, hande no ɓe jiɗiri ɓalli maɓɓe. Jiɗuɗo debbo mum, yiɗii hoore mum.

²⁹Daɗey, goɗɗo meeɗay ko wanyi ɓannu mum. Amma oo nyaanna ŋol, oo hiinnoo ŋol, hande no Almasiihu waɗanta Eklesiya,

³⁰gam enen nun laatii jokkule ɓannu makko.

³¹Kan waɗi dewtere wi'i: «Gorko accan baaba mum e inna mum, takkontira e debbo mum, ɓe fu ɗiɗo, ɓe laatoo ɓannu gootol.»

³²Asiiri mawɗo nun ɗon. Amma, Almasiihu e Eklesiya mum nun batananmi.

³³Amma onon ko yaali on woni, gorko fu yiɗa debbo mum, hande no yiɗiri hoore mum. Debbo bo teddina gorum.