1Mã Niospa fakefokẽ mato noisharakõi. Nãskakẽ a keskara ikãfe, Ifofasharakõi.
2Cristo noko shinãkĩ finakõi nokoõnoax nani. Nõko chaka noko soaxoni. Nãskakẽ noko nãxoni, aakõi nanima. Nãskaito xafakĩa Epa Niospa õini nõko chakaõnoax nani, anã nõko chaka nokoõ neenõma. Nãskakẽ mã ranãri nõinãi finasharakõikãfe.
3Mã Niospa fakefokĩ õisharata ikãfe. Isharakãi afarafo chaka shinãtama. Mãto ãfimafo chotayamakãfe. Kẽromãri mãto fenemafo chotamayamakãfe. Askatari mares fisti afama mĩshti a mã fichipaiyaifo fiyamakãfe.
4Askatari fanĩrira meka chaka yoiyamakãfe. Anori shinãtama a Niospa fakefo isharakõikaxõ, mẽstekõi yoisharatirofo iskafakĩ: “Aicho Epa Niosi, mĩ noko ĩkisharakõiaki,” ixõ mã yoimis.
5Mã mã tãpimis yora fetsafãfe fanĩrira shinãmisfo ãto ãfimafo chotamisfo ato fe oxakaxõ, kẽromãri ãto fenemafo chotamamisfo, askara yorafo Nios ano fokanima. A afarafo noikakĩ fichipaimisfo, askara yorafãfe afama mĩshtifo noikani Nios shinãtama, askara yorafo a Nios xanĩfo ano fokanima.
6Õisharakakĩ yora fetsafãfe anorima mato yoipaikani fanĩrira ãa mato pãrakakĩ. Askara yorafãfe Nios nikakaspakakĩ chakafakani. Askaito õikĩ Niospa ato kopikiri chakafaxii atoki õitifishkikĩ.
7Nãskakẽ nã ikaifo keskara mã iyamakãfe. Afarafo ato feta chakafakĩ, anori shinãyamakãfe.
8Mã fanĩrira shinãyopaoni mãto õiti oa fakish keskara ikax, akka iskaratĩa mã Cristo fe rafeax a mã iyopaoni keskara anã mã shinãima. Mãto õiti xafasharakõia mã ika. Nãskara shara. Mẽxotaima isharakãfe.
9Nãskax mã isharakõimis. Cristo mato ĩkinãno mãto õiti xafasharakõi mã imis. Mã isharakõiax shara mã itiro. Mãto õiti mẽraxõ mẽstesharakõi mã shinãkõitiro. Mã anori shinãxõ anã fanĩrira mã yoima.
10A Niospa fichipaiyai keskafakĩ tãpisharakõikãfe. Nãskakõi fakãfe.
11Nã Nios Ifofakaspamisfãfe, afaa tãpiamafãfe afarafo chakafaifãfe õiki mãri ato feta chakafayamakãfe. Ato õitamaroko ato yoisharakõikãfe: “Anã afaa chakafayamakãfe,” ixõ ato yoikãfe.
12Askatari a yora fetsafãfe one afama mĩshti chakafafiakĩ onepaimisfo. Askarayakai nõ mekaima nõ yoi nõ rãfitiro.
13Akka mã fakishano nõ rãpari otaxõ, keyokõi nõ õisharakõitiro. Nãskarifiai a yorafãfe afarafo chakafakaxõ onepaifiaifãfe, Niospa meka õikĩ tãpitirofo a chakafamisfo.
14Nãskakẽ Niospa yoimis iskafakĩ: Afarafo mã chakafamiski moinĩfofãkãfe oa mã naa keskara ikax fininĩfofãkãfe Cristo mãto õiti mẽra oa fafeai keskara mato fasharanõ, ixõ yoimiski.
15Nãskax isharakõikãfe. Oa Niospa meka tãpiama keskara iyamakãfe. A Niospa mekaõnoa yoikĩ kenenifo anori isharakõikãfe.
16Nãskakẽ a Nios Ifofaafomafo iskaratĩa chakafinakõiafo. Nãskakẽ mãri isharakõikãfe ato keskara ikakĩma. A Niospa apaiyai keskara akãfe mẽxotaima.
17Nãskakẽ fanĩrira chaka shinãpaiyamakãfe a Niospa mato amapaiyai anori tãpisharakõikãfe.
18Askatari anã pãeyamakãfe. Mẽxotaima pãeriai mã chakakõifo itiroki. Askaxõ mã afaa shinãsharaima. Askatamaroko Niospa Yõshi Shara mato mẽra naneano afe rafesharakãfe mato yonomasharanõ.
19Nãskakẽ mã ranã Niosnoa yoinõnãkãfe isharakõikai. Nõko xini David mẽxotaima fanãipaoni keskariai mãri Nios Ifofaax aõnoax fanãikãfe mã ranã mãto õiti mẽraxõ nõko Ifo shinãi inimayanã.
20Pena tii aichora fakãfe Epa Niospa noko afama mĩshti faxõfaino, nõko Ifo Cristo shinãyanã nõ Ifo sharafanõ.
21Cristo nikasharapai, mã ranã nikanõnãsharakõikãfe.
22Kẽromãri a mãto Ifo Jesús mã nikasharai keskafakĩ, mãto fenefo ato nikasharakõikãfe mato yoisharaifãfe, mãto Ifo Jesús mã nikai keskafakĩ.
23Cristo nõko xanĩfofinakõia nõ nikasharai keskafakĩ, kẽrofãferi ãto fenefo nikasharakani ãto xanĩfomãiyakẽ. Askatari Cristo noko ifimis nõ nikasharakõitiro oa nõ afe yorakõifo keskaraxõ.
24Nãskakẽ kẽromã ãfe fene nikasharatiro ãfe xanĩfomãiyakẽ a nõko Ifo Jesús chanĩmara faafo tiito nikasharaifo keskafakĩ.
25Nõ Cristo Ifofaano noko noikõiax aakõi nokoõnoax nani. Nãskarifakĩ feronãfakefãfe, mãto ãfifo noisharakõikãfe.
26Mã ãfe meka chanĩmara faito, oa noko fãka choka keskara faxõ noko katoni, oa nõ afaa chakafamisma keskara noko imaxii.
27Mã noko ifiax, nãskax nokoõnoax nani nõko chaka noko soaxoxiki nõ isharanõ. Nã anã nõko Ifo Jesús oaitĩa a chanĩmara faafo tii noko ifixõ sharakõi noko õixii, oa nõ afaa chakafamisma keskara noko õixii.
28A feronãfakefo ãa noimesharaifo keskafakĩ, mãto ãfifo noisharakãfe.
29Akka shinãkapo. Tsõa pishtakai ato yora chakafamisma. Nõko yora nõ mesefakĩ fonãikĩ nõ pimis shara nixiki. Nãskafakĩri Cristo a afe yorafo ato kexesharamis mãmãi nõ afe yorakõifokẽ.
31A Niospa meka yoimisto keneni iskafakĩ: “Nãskakẽ feronãfãke kẽro fiax anã apa fe afa ikano anã ano itiroma. Paxkatiro, ãfi fe ixiki. Askax oa fisti keskara ixiki anã rafema,” ixõ yoikĩ keneni.
32A Niospa meka yoimisto keneni anori taefakĩ tsõa tãpinima. Mã iskaratĩa noko Niospa tãpimasharai a nõko Ifo Cristo Ifofaafo tii afe yorafokanax, oa fisti keskara afe yorafo ixõ keneni.
33Ẽ mato yoi fisti rasichi mãto ãfifo noisharakõikãfe. Mẽxotaima aa mã mã noimeai keskafakĩ mãto ãfifo noisharakãfe. Askatari kẽrofãferi ãto fenefo noisharakõikaxõ nikasharakõinõfo.
