EBREEɄSɄTY 5

1

2

3

4

5

6

7

8

9

10

11

12

13

¹Ya̱ naxwiiñ yʉ teedywyindsʉngópkʉty yajtukwijtstútp ma̱ yʉ ja̱ꞌa̱yʉty, es yajtuknika̱jxpéty éxtʉm ja ja̱ꞌa̱yʉty ja kyudʉnaabyʉ ma̱ Dios, es tmayꞌat twindsʉꞌʉgʉt ja Dios mʉt jaꞌagyʉjxm ja ja̱ꞌa̱yʉdyʉ pyojpʉ.

²Es komʉ tadʉ teedywyindsʉngópkʉty pojpʉ ja̱ꞌa̱yʉty nandʉꞌʉn, mba̱a̱t tmʉdaty ja paꞌꞌayoꞌon mʉt ja tsuudʉjkʉty es diꞌibʉ tuundʉgooy ka̱jxtʉgooydyʉp,

³pa̱a̱ty koonʉm tmoꞌoyʉt ja Dios ja windsʉꞌkʉn mʉt jaꞌagyʉjxmʉ kyʉꞌʉmbojpʉ, nandʉꞌʉn mʉt jaꞌagyʉjxmʉ ja̱ꞌa̱yʉdyʉ pyojpʉ.

⁴Ni pʉ́n mba̱a̱t kyanaybyʉjtaꞌagyʉty kʉꞌʉm éxtʉmʉ teedywyindsʉngópk, Dios yʉꞌʉ dʉꞌʉn diꞌibʉ wyinꞌijxypy diꞌibʉ yajtʉkʉyaampy ma̱ tya̱dʉ tuunk, dʉꞌʉn éxtʉm jékyʉp twinꞌijxy ja Arón.

⁵Es nan ni yʉ Kristʉ kyanaybyʉjtákʉ kʉꞌʉm éxtʉmʉ teedywyindsʉngópk, Dios yʉꞌʉ dʉꞌʉn diꞌibʉ pyʉjták ja Kristʉ, éxtʉm jyʉnáñ ma̱ jyaaybyajtʉn: Ʉjts mij xyTyeetyꞌa̱jtp. Tyámʉts ngʉxʉꞌʉgʉt kots mij nꞌUꞌunkꞌáty.

⁶Es nandʉꞌʉn ja̱a̱ybyéty ꞌyity jatuk peky: Mijtsʉ dʉꞌʉn mdeetyꞌa̱jtp winʉ xʉʉ winʉ tiempʉ, dʉꞌʉn éxtʉmʉ Melkisedek.

⁷Ko tya̱dʉ Jesús jyikyꞌajty ya̱ naxwiiñ, net kya̱jxtáky es mʉk jyʉʉy, es tꞌamdooy tpʉjktsooy ja Dios diꞌibʉ mba̱a̱t kyutiky es kyaj ja Jesús ttuknáxʉt ja oꞌkʉn. Amʉdoona̱jxʉ Dios jaꞌagyʉjxm ko tmʉmʉdooy.

⁸Es oy jyaDiosꞌuꞌungʉty, jya̱jt tmʉmʉdówʉt ja Tyeety jaꞌagyʉjxm ko ꞌyayooy;

⁹es ko ttuunda̱a̱y tʉgekyʉ diꞌibʉ Dios tsyejpy, jaꞌagyʉjxm dyajnitséky winʉ xʉʉ winʉ tiempʉ nidʉgekyʉ diꞌibáty nandʉꞌʉn mʉmʉdoojʉp,

¹⁰es ja Dios tʉ pyʉjtaꞌagyʉty teedywyindsʉngópk, dʉꞌʉn éxtʉmʉ Melkisedek.

¹¹Taanʉm may diꞌibʉts nꞌaktukjaygyukʉyaampy, per tsip es ndukniꞌíxʉdʉt miidsʉty, mʉt ko tʉ mjʉmbittʉ kujuun.

¹²Taaxyʉp miidsʉty mjayaꞌʉxpʉjknʉ ma̱ wiinkpʉty, mʉt ko tʉ jyajknʉ ma̱ miits xyꞌaxá̱jʉdʉ Jesús; per mdʉgoyꞌa̱jtxʉdʉp pʉ́n mdukꞌʉxpʉ́kʉdʉp jatʉgok jemy ja tʉyꞌa̱jtʉn diꞌibʉ kyaj tsyípʉty ma̱ Diosʉ ꞌyayuk. Pes miidsʉty dʉꞌʉn mꞌakꞌittʉ éxtʉmʉ maxuꞌungʉn diꞌibʉ kyaj mba̱a̱t tjeꞌxy ja kudʉꞌʉtspʉ, tsyojktʉp pʉ́n yajtsiꞌidsʉdʉp.

¹³¿Es wiꞌix mba̱a̱t tuꞌugʉ maxuꞌunguꞌunk diꞌibʉ tsiꞌtsp ndukꞌʉxpʉjkʉm ja jikyꞌa̱jtʉnʉ oybyʉ es diꞌibʉ axʉʉk? Kyaj mba̱a̱t tjaygyukʉ, ¿kʉdii?

¹⁴Esʉ tadʉ jeꞌxyʉ tʉꞌʉtspʉ, yʉꞌʉ jeꞌeyʉ taadʉ pʉ́n myʉda̱jtypy ja tyʉts; es nandʉꞌʉn ja ʉxpʉjkʉnʉ tsippʉ, yʉꞌʉ jyaygyujkʉp jeꞌeyʉ ja ja̱ꞌa̱y diꞌibʉ mba̱a̱t tmʉwinma̱ꞌa̱ñbyaaty yʉ oybyʉ esʉ axʉʉkpʉ.