19 Kɛ̀ ikuɔ́ nìùbɛ̀ kó bɛkótíbɛ̀ nɛ̀ ikuɔ́ wɑ̃ɑ̃̀bɛ̀ nwɑnti kɛ bo pĩ́ nYesu kɛ nɛ́ yɔtɛ ditĩ̀nnì. Bɛ̀ do bɑntɛ́mu kɛ dò nYesu ɑ̃ntɛ́ bɛm̀bɛ dɛ kó dinɑ́ɑǹhɑ̃ntírì.
20 Kɛ̀ bɛ̀ɛ tɑ̃ɑ̃tɛ́ bɛnìtìbɛ̀ kɛ̀ bɛ̀ ndò mbɛ̀ tu bɛnitisɑ̀ɑ̀bɛ̀ kɛ bo díí nYesu, kɛ́yɑ̀ bɛ̀ bo ò pĩ̀ńnɛ̀ o nɑ́ɑǹtì miɛkɛ kɛ́duɔ́ kùmɑ̀ndɑ́ɑ̀.
21 Kɛ̀ bɛ̀ɛ ò bekɛ kɛ dɔ̀: Okótì ti yɛ̃́mu kɛ dò nhɑ tú wèè nɑ̀ɑ́ ntimɔ́mmɔnti kɛ tiè nweti weti, kɛ í yĩɛ̃̀kù òmɔù bɑ́ kòò tu wè kɛ bɛnkú Kuyie nkó kucɛ kɛ tũ ntimɔ́mmɔnti.
22 Dɛ̀ wenni kɛ dò ntí nyietì dɑ̀ḿpóò okpɑ̀ɑ̀tì diɛwè wèè bo Odommɑ̀ɑ̀, kɛ̀ ti bɑ́ nyietì?
23 Kɛ̀ Yesu bɑntɛ́ bɛ̀ dɔ́mɛ̀ kóò dìí nkɛ dɔ̀: Bɛnkɛnɛ̀ fɛdífɛ̀ fɛ̀mɑ́ɑ̀ kɛ̀ n yɑ̀. Kɛ̀ bɛ̀ɛ ò duɔ́ nkòo bɛ̀ bekɛ kɛ dɔ̀:
24 We nte diyuu dii nnɛ̀ diyètìrì dii ndɛ̀ɛ̀ wɑ̃̀ri fɛ ĩ́nkɛ̀? Kɛ̀ bɛ̀ɛ ò tɛ̃̀ńnɛ́ kɛ dɔ̀: Sesɑɑ, okpɑ̀ɑ̀tìdiɛwè wèè bo Odommu.
