Dagiti Salmo 51:4-11

⁴Nagbasolak kenka, sika laeng ti nagbasolak ken nagaramidak ti dakes iti imatangmo; hustoka tunggal agsaoka; nalinteg iti panangukommo.

⁵Kitaem, naiyanakak iti kinadakes; sipud pay inyinawnak ti inak, nagbasolakon.

⁶Kitaem, tarigagayam ti kinapudno iti pusok; iti pusok impakaammom kaniak ti kinasirib.

⁷Pasin-awennak babaen iti hisopo, ket dumalusakto; ugasannak, ket napudpudawakto ngem iti niebe.

⁸Ipangngegmo kaniak ti rag-o ken ragsak tapno agrag-oda dagiti tulang a tinukkolmo.

⁹Ilemmengmo ti rupam manipud kadagiti basolko ken punasem amin dagiti kinadakesko.

¹⁰Parsuaem kaniak, O Dios, ti nadalus a puso ken ikkannak iti baro ken napudno nga espiritu.

¹¹Saannak a papanawen iti imatangmo, ken dimo ipanaw kaniak ti Espiritu Santom.