Dagiti Salmo 37:5-13

⁵Itedmo kenni Yahweh dagiti wagasmo; agtalekka kenkuana, ket agtignayto isuna iti biangmo.

⁶Iparangnanto ti pannakaukommo a kasla iti aldaw ken ti kinaawan basolmo a kasla iti tengnga ti aldaw.

⁷Agtalnaka iti sangoanan ni Yahweh ket urayem isuna a siaanus. Saanka nga agdanag no mapagballigi ti maysa a tao dagiti dakes a wagasna, no agaramid ti dakes a tao kadagiti dakes a panggep.

⁸Saanka a makaunget ken maupay. Saanka nga agdanag; mangaramid laeng daytoy iti riribuk.

⁹Maisinanto dagiti managdakdakes, ngem tawidento dagiti aguray kenni Yahweh ti daga.

¹⁰Iti apagbiit, mapukawto ti dakes a tao; kitaemto ti ayanna, ngem awanto isuna.

¹¹Ngem tawidento dagiti naemma ti daga ken agragsakda iti naindaklan a panagrang-ay.

¹²Agpanggep ti nadangkes a tao a maibusor iti nalinteg a tao ken pagngaretngetenna ti ngipenna a maibusor kenkuana.

¹³Katawaan ti Apo isuna, ta makitana nga umasidegen ti aldawna.