Dagiti Proverbio 4:13-27

¹³Petpetam ti disiplina, saanmo nga ib-ibbatan; bantayam, ta isu ti biagmo.

¹⁴Saanmo a suroten ti wagas dagiti nadangkes ken saanmo nga ar-aramiden ti wagas dagiti agar-aramid iti dakes.

¹⁵Liklikam daytoy, saanka a mapmapan iti daytoy; liklikam daytoy ket magnaka iti sabali a dalan.

¹⁶Ta saanda a makaturog agingga a makaaramidda iti dakes ken saanda a makaturog agingga nga adda maipatublakda.

¹⁷Ta kankanenda ti tinapay ti kinadangkes ken in-inumenda ti arak ti kinaranggas.

¹⁸Ngem ti dalan ti agar-aramid iti umno ket kas iti panagbannawag a lumawlawag; rumanraniag agingga nga umay ti naan-anay a kinaraniag ti aldaw.

¹⁹Ti dalan dagiti nadangkes ket kasla sipnget - saanda nga ammo no ania iti pakaitibtibkulanda.

²⁰Anakko, ipangagmo dagiti sasaok; denggem dagiti ibagbagak.

²¹Saanmo nga ik-ikkaten kadagitoy ti panagkitam; salimetmetam dagitoy dita pusom.

²²Ta dagiti sasaok ket biag kadagiti mangsapul kadagitoy ken salun-at iti entero a bagida.

²³Pagtalinaedem a natalged ti pusom ken ikagumaam daytoy a bantayan, ta manipud iti daytoy ket agayus ti ubbog ti biag.

²⁴Ikkatem ti panagul-ulbodmo ken ibellengmo dagiti dakes a panagsarsaritam.

²⁵Arigna nga ikitam a deretso dagiti matam ken iti sangoanam laeng ti kitkitam.

²⁶Agaramidka iti nasimpa a pagnaan dagiti sakam; ket natalgedto dagiti amin a dalanmo.

²⁷Saanka a sumiasi a mapan iti kannawan wenno kannigid; iyadayom ti sakam iti dakes.