1Basa ria boe ma, au ita Ramatuaꞌ a eilaꞌo-limalopen haa reme nusatetu-ikutemaꞌ a mai, ara rapedei rai dae-bafoꞌ a bukun haas fo ramakee ani a. De ani a ta bisa fufuu nai tasiꞌ a, nai madaꞌ lain, ma ta fufuu leo ai-huuꞌ ara neu.
2Ramatuaꞌ a fee si kuasa fo tao ralulutuꞌ madaꞌ lain no tasiꞌ a. Boe ma au ita eilaꞌo-limalope fekeꞌ esa nai nusatetu-ikutemaꞌ a, neme dulu mai. Ana neni eꞌee-dededeꞌ neme Manetualain fo riꞌ nasoda naroo a. Ana naloo nambera nafada eilaꞌo-limalope kahaaꞌ sira nae,
3“Mahani dei! Bosoꞌ tao malulutuꞌ madaꞌ lain, do tasiꞌ a, do ai-huuꞌ ara. Mahani losaꞌ ami tao eꞌee-dededeꞌ neuꞌ Ramatuaꞌ a lahenda nadedenu nara dedei nara dei.”
4Boe ma ara rafada au rae, eilaꞌo-limalope a ee-dedeꞌ heni Ramauaꞌ a lahenda nara so. Sira dedesi na lahenda rifun natun esa haa hulu haa (144.000), reme basa Israel leo nara mai. Siꞌ:
5neme Yahuda leo na, lahenda rifun sana hulu dua; Ruben leo na, lahenda rifun sana hulu dua; Gad leo na, lahenda rifun sana hulu dua;
6Aser leo na, lahenda rifun sana hulu dua; Naftali leo na, lahenda rifun sana hulu dua; Manase leo na, lahenda rifun sana hulu dua;
7Simeon leo na, lahenda rifun sana hulu dua; Lewi leo na, lahenda rifun sana hulu dua; Isaskar leo na, lahenda rifun sana hulu dua;
8Sebulon leo na, lahenda rifun sana hulu dua; Yusuf leo na, lahenda rifun sana hulu dua; ma neme Benyamin leo na mai, lahenda rifun sana hulu dua.
9Boe ma, au ita lahenda dodouinaꞌ, losaꞌ reke doaꞌ dedesi nara. Ara reme basa leo ra, basa nusaꞌ, basa dedeaꞌ ara, ma basa lahenda dae-bafoꞌ a. Basa si tesa rasare ra kadera manapareta ria, no Bibi-lopo Anaꞌ a. Ara pake badu fulaꞌ homu palam a doo na nai lima nara.
10Ara io-oa belaꞌ a rae, “Ami io-oa neuꞌ ami Manetualain ma, fo riꞌ natuuꞌ nai kadera manapareta ia. Ami soꞌu madedema Bibi-lopo Anaꞌ ia boe! Sira siꞌ, poi-tata raa ami. Sira siꞌ, soi fee ami eno masodaꞌ a.”
11Ara dedea basa rae leoꞌ na, boe ma Ramatuaꞌ a eilaꞌo-limalopen reme nusatetu-ikutemaꞌ a rapadei eo raa kadera manapareta a, sundaꞌ undulaka nara losa mata-idu nara neta dae a rasare raa kadera manapareta bauinaꞌ ria. Ketua sira, ma banda kahereꞌ kahaaꞌ ara tao leo naꞌ boe. Basa si doꞌo-tabe neuꞌ Manetualain,
12ma soda rae, “Tebe! Tebe ria! Ami io-oa Manetualain! Ami soꞌu madedema Ramatuaꞌ a nade Na! Ramatuaꞌ a duduꞌa-aafin, manaꞌahiiꞌ. Ramatuaꞌ a kuasan, bau na seli. Ramatuaꞌ a baraꞌai na, kahereꞌ nan seli. Ami hule makasi maroo neuꞌ Ramatuaꞌ a. Ami fee hada-horomata neuꞌ Ramatuaꞌ a ta etu-basan fa. Tebe! Tebe ria!”
13Ara io-oa basa rae leoꞌ na, boe ma neme ketua kadua hulu haaꞌ sira, esa natane au nae, “O malelaꞌ lalenda makadotoꞌ manapake badu fula ia ra, do? Sira reme beaꞌ mai?”
14Tehuu au ataa ae, “Taꞌa Papa. Au ta alelaꞌ sira nana bea. Papa riꞌ bubuluꞌ dai lena.” Boe ma ana nafada au nae, “Sira nana, lahenda fo kalua reme doidoso bauinaꞌ a mai. Sira nana, lahenda fo riꞌ pake Bibi-lopo Anaꞌ ria daa Na, fo safe reniꞌ sira kakao-papake nara, ma tao fula makamoiꞌ sira badu nara.
15Huu ria na de, ara rapadei rai Manetualain kadera manapareta Na matan. Hatu-leledon ara ralalau Ramatuaꞌ a nai Uma Mamaso Na. Ramatuaꞌ a noo si laꞌo naroo. Ramatuaꞌ a nanea nahere si.
16Neuꞌ ko ara ta ramalaa ma mamada soꞌ. Neuꞌ ko ledo a ta haa si soꞌ. Neuꞌ ko rou nara ta olu huu ledo haaꞌ si.
17Bibi-lopo Anaꞌ fo riꞌ naneneaꞌ kadera manapareta a, neuꞌ ko Ria riꞌ dadi neuꞌ sira manafoo na. Neuꞌ ko Ana foo neni si, reu rinuu nai oe mataꞌ fo neni masodaꞌ a. Neuꞌ ko Ramatuaꞌ a oꞌoe-nanasi si, de ara ta bolu-ramatani soꞌ.”
