Dad Nimò 10:10-28

¹⁰Na ta too kenen bitil, na mayè kmaan. Na di lamla mimò i knaan, nun kanteenan.

¹¹Yé teenan ta mgukà i langit, na nun gambet bong kayab nikat di sbalà syungan fayol kel di tanà.

¹²Na nun dad sahal lmanaf, na dad kmamang, na dad anuk di bnas mnè di laman.

¹³Na nun lingen talù di kenen, manan, “Piter, tadag ge. Tmatê ge, na knaanam.”

¹⁴Bay tmimel Piter, manan, “E Amu, là fakayan. Là ti lmen-gu do kmaan i dad magsik gambet ayé, ku demen i là fakaymi dnawat.”

¹⁵Na ta lêan linge i talù ayé, manan di kenen, “Nangam man ku magsik i ta lnaneb Dwata.”

¹⁶Tlu dulêan mkel di ku Piter, na kafnge ayé, ta lê magket i kayab ditù di langit.

¹⁷Na di lam Piter famdam ku dét gumtatek i kanteenan, ta kel déé di Dyopa i dad lagi dek Kornilyu, na snalekla gusablà i gumnè Simon, klola fles di bà labat i gumnè gufanakan.

¹⁸Na tamlo ale, na snalekla ku déé gufanak Simon Piter.

¹⁹Na di lam Piter famdam i kanteenan, ta talù i Mtiu Tulus di kenen, manan, “Nun tlu lagi mngabal ge.

²⁰Taman, tadag ge, na tufa. Na nangam falwe nawam magin dale du do mdek dale.”

²¹Na ta tufa Piter, na manan dale, “Do sa i fanngabalyu. Dét i fandufyu dini?”

²²Na tmimel ale, manla, “Yé mdek gami Kapitan Kornilyu. Tluh to kenen, na toon nafè i Dwata, na lê nafè i dad Dyu kenen. Na yé man satu kasaligan i Dwata di kenen, fngén ge kun du fye falningen i manam di kenen.”

²³Na kafnge ayé, ta nlak Piter ale myak di gumnè gufanakan, na déé gumilèla di kifuh. Na di tmadol du, mdà Piter magin dale, na nun magin dademe dad to ftoo mdà di Dyopa.

²⁴Na di galwen du, ta kel ale di Sisarya. Fatan Kornilyu ale, na ta falan santifun i dad flanekan na dademen sgalak.

²⁵Na kanto fusuk Piter di gumnè ayé, ta snitong Kornilyu kenen, na fles lkuad di saféd blì Piter du fnangamfùan.

²⁶Bay man Piter di kenen, “Nang ge mangamfù di do. Tadag ge, du salngad ate to.”

²⁷Na di lam ale Piter magu fusuk di gumnè, sigi kenen stulen ku Kornilyu, na ta teen Piter i dee dad to stifun déé.

²⁸Na man Piter di dale, “Ta tooyu gadè sa na là fakay ku gami dad Dyu sgalak ku demen lmauy di dad to ise Dyu du yé fnang di gami. Bay yé ta fite Dwata di do na là fakay ku yé fandamgu di dademe dad to na magsik ale ku demen là fakay dnawat.