4 du fye i dad to kulang i kfulung faldam là ale gasyat, na gmadè na fulung i dad lamnok mebe i ktola di fye,
5 gafatnù di gnadè i dad to fulung faldam, na malak i dad to nun kaglabat,
6 du fye glabatla i dad gal gman too mngalam gumtatekan, na i dad fléd gal gman i dad to nun gnadè.
7 Silang ge mbaling to nun gnadè, ku funa nun klikoam di Dwata. I dad to là fulung faldam knangla kfulung, na là ale mayè ku nuntamdò dale.
8 Tingàgu, toom lalò i kafngeweta ge, na nangam nlifet i tdò yéam.
9 Du ku laloam i tdòmi ge, matnù i kafye ldamam, salngad ku lamsak ge i dad fye baweh kas, na matnù i kafyebaweham.
