19 Taman i dad to mwè i knun demela to, fagu di klabè, nun kalmola.
20 I kfulung faldam flingen di satu to gal tamlo, na tamlo kenen di dalan di gunun dad to, na di fadyan, du kayeanku lingela i tdoan.
21 Falbongan i taluan di gufusuk banwe, na balù nè gustifun dad to,
22 na manan, “Gamu dad kulang kfulung faldam, kan ku fadlug gamu di làyu kfulung? Gamu dad madoy, kilen i katlagyu madoy? Gamu dad là fulung faldam, tan i kloyu mnang i glut kfulung?
23 Ku flinge gamu i kngakgu gamu, nun fye fngewegu gamu mdà di fandamgu, na fgadègu gamu i kfulunggu faldam.
24 Kabay du knagolyu agu di katlogu gamu, na landè flinge deg di kalakgu,
25 na fbayàyu i kafngewegu gamu, na làyu dnawat i kngakgu gamu,
26 taman di kakel i bong kaflayamyu nulégu gamu, na di kakel i bong klikòyu nadoygu gamu.
27 Na di kakel i too sè klikòyu, na too sè kaflayamyu, na too sè ksamuk mlibut di gamu, tloyu agu. Kabay di katloyu deg, là agu tmimel gamu, fanngabalyu agu, bay làyu agu teen.
