10 I glal i harì mdà di Dwata, taman i kukuman mbaling matlu.
11 Ani kayè Dwata di dad to fabli, ku là mlimbung i timbangla, na too matlu i kafablila.
12 Knang i dad harì i sasè nimò, du én gutadag i kagotla i matlu nimò.
13 I dad harì mayè ale flinge i kaglut, na knabasla i to tmulen i kaglut.
14 I to fulung faldam, too fgal flehew i harì, du ku malbut i harì ken nun fafatin.
15 Kabay ku lehew i harì, mlé kenen i kafye di dad to gaflehewkenen, salngad i ulen mlé fye di dad fule.
16 Fye fa ku nun kfulungam faldam di nun blawenam, na fye fa ku nun kaglabatam di nun salafiam.
17 I to fye mlalò i dalan mawag di ksasè, na i to too fgeye ku tanè i gusalun, landè gaslokan.
18 I bunge i kafdatah na kafdag dunan kalmo.
19 Fye fa i to ku fdanaan i nawan na fadlug di klandean, di gakuf kenen di dad to fdatah na nun alelan di dad tnakula.
20 I to too flinge i tdò kenen, nun gufyen, na nun kafye di to too smalig di Dwata.
21 I to fulung faldam dnagit to nun kaglabat, na i kafye taluan, én gmagan mebe i dad to.
22 I kfulung i to fulung faldam, én gafye na gatgal i nawan, bay i to là fulung faldam, landè gukmamu i katdò kenen.
23 I to fulung faldam, too funa faldam di laan fa talù, taman i taluan too fnaglut i demen to.
24 I fye talù, salngad i tnab too mi i neman, na gafye i laweh.
