Buk Song 68:4-19

⁴Yumi mas singim song bilong litimapim nem bilong God. Em i save sindaun long ol klaut na wokabaut i go. Stretim rot bilong em. Nem bilong em Bikpela. Yumi amamas long ai bilong em.

⁵God i save stap long ples bilong em yet, na em i save lukautim ol pikinini, papa bilong ol i dai pinis. Na em i save helpim ol meri, man bilong ol i dai pinis.

⁶Em i save givim haus long ol man na meri i stap wanpis na bai ol i sindaun gut long en. Na em i save pinisim kalabus bilong ol kalabusman na ol i stap gut long ples. Tasol ol bikhetman bai i go i stap long ples nogut tru.

⁷God, bipo yu bin i go paslain long ol manmeri bilong yu na yu bringim ol i kam na yu wokabaut long ples drai.

⁸Long dispela taim graun i guria, na bikpela ren i kam daun, long wanem, God, yu kam pinis. Tru tumas, God bilong Israel, yu kam pinis na maunten Sainai i guria moa yet.

⁹God, yu bin mekim traipela ren i kam daun long graun bilong yu, na yu mekim dispela graun nogut i kamap gutpela gen.

¹⁰Ol manmeri bilong yu i wokim ples long dispela graun. Yu gutpela tumas na yu givim kaikai samting long ol dispela rabisman.

¹¹Bikpela i givim tok long ol manmeri bilong en, na planti meri i go autim dispela tok.

¹²Dispela tok i olsem, “Ol king wantaim olgeta ami bilong ol, olgeta i ranawe pinis.” Na ol meri i bin i stap long ples, ol i tilim ol samting ol man i kisim long pait.

¹³Ol meri i bilas nogut tru long silva na gol na ol i luk nais olsem gutpela pisin, bodi bilong en i lait olsem silva na wing bilong en i lait olsem gol. Tasol bilong wanem sampela man i stap long banis bilong sipsip?

¹⁴Taim God I Gat Olgeta Strong i rausim ol king long maunten Salmon na ol i ranawe nabaut, orait em i mekim ren ais i kam daun long dispela maunten.

¹⁵Maunten bilong Basan em i traipela maunten tru. Em i gat planti kil moa.

¹⁶Yu maunten i gat planti kil, bilong wanem yu lukim maunten God i bin makim bilong em i ken sindaun long en na yu ting em i olsem samting nating? Bikpela bai i stap oltaim oltaim long dispela maunten.

¹⁷Bikpela i lusim maunten Sainai na i kam i stap long haus bilong em yet. Em i kam wantaim ol soldia bilong en ol i stap long planti tausen strongpela karis bilong pait.

¹⁸God i bin i go antap long maunten i antap moa, na em i kisim bikpela lain kalabus i go wantaim em. Em i bin kisim ol presen bilong ol bikhetman i bin pait long em. God, Bikpela bai i stap long dispela maunten.

¹⁹Yumi litimapim nem bilong Bikpela. Olgeta de em i save karim ol hevi bilong yumi. God wanpela tasol i save kisim bek yumi.